បន្ទាប់ពីស្ងប់ស្ងាត់ដោយសារការ Lockdown អស់មួយរយៈ ពេលនេះ Big Mountain Music Festival របស់ប្រទេសថៃបានចាប់ផ្តើមរៀបចំកម្មវិធីការប្រគុំតន្រ្តីសារជាថ្មីម្តងទៀតហើយបន្ទាប់ពីការវិលត្រលប់មកជាលើកទី១២ក្នុងឆ្នាំ២០២២នេះ ដើម្បីបង្កើតការជួបជុំដ៏អស្ចារ្យសំរាប់ភ្ញៀវចូលរួមទស្សនាបានរីករាយជាមួយតន្រ្តី និងអាចបោះតង់លេងកំសាន្តជុំៗគ្នានៅលើជំរាលស្មៅបៃតងខ្ចី។ ក្រោមវត្តមានសិល្បករអញ្ជើញចូលរួមកម្មវិធី Big Mountain Music Festival នេះ ឃើញថារួមមានសិល្បករប្រទេសថៃដ៏ល្បីៗជាច្រើនរាប់សិបនាក់ ហើយក្នុងនោះក៏គួរអោយចាប់អារម្មណ៍ផងដែរក៏ឃើញមានវត្តមានសិល្បករខ្មែរមួយរូបគឺជាលោកវណ្ណដា។
លោកវណ្ណដាត្រូវបានអញ្ជើញចូលរួមក្នុងកម្មវិធី Big Mountain Music Festival ដែលហៅកាត់ថា BMMF នេះនៅក្នុង
ប្រទេសថៃដែលត្រូវបានធ្វើឡើងនៅក្នុងទីតាំង The Ocean Khao Yai នាថ្ងៃទី ១០-១១ ខែធ្នូខាងមុខនេះ។ សំរាប់ឆាកសម្តែងក្នុងកម្មវិធី Big Mountain Music Festival ក្នុងឆ្នាំ២០២២នេះត្រូវបានរៀបចំជាថ្មីជាមួយនឹងឆាកពិសេសៗមួយចំនួនដូចជា Block Stage, Cow Stage, Mountain Stage ជាដើម។ ហើយសំរាប់លោកវណ្ណដាផងដែរ លោកនឹងឡើងសម្តែងនៅលើឆាក Block Stage នេះដោយក្នុងនោះក៏ឃើញថាមានវត្តមានរបស់សិល្បករថៃមករួមការងារនៅកម្ពុជាផងដែរមានដូចជាលោក Sprite x Guygeegee x Og bobby សម្តែងនៅលើឆាកតែមួយផងដែរ។ គួរបញ្ជាក់ផងដែរកម្មវិធីនេះត្រូវបានគាំទ្រឡើងពីភេសជ្ជៈ Pepsi។ ចំពោះសំបុត្រចូលរួមទស្សនាអ្នកទាំងអស់គ្នាអាចទិញជាសាច់ប្រាក់ក៏បាន រឺក៏បង់តាមរយៈ Installment Card ក្នុងរយៈពេល៣ខែ។ ចំពោះតំលៃសំបុត្រ Early Cow Ticket អាចរកទិញបានក្នុងតម្លៃ១៦០០បាត ត្រូវបានចាប់ផ្តើមដាក់លក់នៅក្នុងរយៈពេល២ថ្ងៃនៅថ្ងៃទី១-២ ខែកញ្ញាខាងមុខនេះ ភ្ជាប់មកជាមួយការអាចទិញជា Early Cow Installment Card ក្នុងតំលៃដូចគ្នាធ្វើឡើងនៅថ្ងៃទី១។ ចំនែកឯសំបុត្រ Regular ត្រូវបានដាក់លក់ជាពីរលើក លើកទី១ក្នុងតំលៃ ២៣០០បាត ចាប់ផ្តើមពីថ្ងៃទី១ដល់ទី៣០ ខែតុលា ហើយលើកទី២ក្នុងតំលៃ ២៥០០បាត ចាប់ផ្តើមពីថ្ងៃទី១ខែវិច្ឆិកាដល់ថ្ងៃទី១១ ខែធ្នូខាងមុខនេះ។
