Irishexaminer-

លោកប្រធានាធិបតី Joe Biden បានបញ្ចេញនូវកាព្រមានចំពោះប្រជាពលរដ្ឋអាមេរិកបច្ចុប្បន្នដែលកំពុងរស់នៅក្នុងប្រទេសអ៊ុយក្រែន ឲ្យចាកចេញពីប្រទេសយ៉ាងឆាប់រហ័សតាមដែលអាចធ្វើទៅបាន។ ថ្លែងនៅក្នុងកិច្ចសម្ភាសន៍ជាមួយនឹង NBC លោក Biden បានប្រាប់ Lester Holt ថា "រឿងអាចក្រឡាប់ចាក់លឿនបំផុត" ខណៈដែលការគំរាមឈ្លានពានរបស់រុស្សីកាន់តែកើនឡើង “ពលរដ្ឋអាមេរិកាំងគួរតែចាកចេញក្នុងពេលនេះ” លោកប្រធានាធិបតីបាននិយាយ។

“វាមិនដូចយើងធ្វើសង្រ្គាមជាមួយអង្គការភេវរករទេ យើងកំពុងពាក់ព័ន្ធជាមួយនឹងកងទ័ពដ៏ធំមួយនៅក្នុងពិភពលោក វាជាស្ថានភាពមួយដែលខុសគ្នា ហើយវាអាចក្លាយទៅជារឿងមួយឆ្កួតមួយរំពេច”។ ថ្មីៗនេះក្រសួងការបរទេសអាមេរិកបានចេញនូវការទូន្មាន ដោយនិយាយថា ពួកគេមិនអាចនឹងជំលៀសពលរដ្ឋអាមេរិក នៅពេលដែលរុស្សីកំពុងមានសកម្មភាពនៅក្នុងអ៊ុយក្រែនទេ និងបានព្រមានថា សេវាកម្មស្ថានកុងស៊ុលជាប្រចាំនឹងមានការប៉ះពាល់ធ្ងន់ធ្ងរ។

លោក Biden បានបន្ទរនូវចម្លើយនេះ ដោយនិយាយថា លោកនឹងមិនបញ្ជូនកងទ័ពអាមេរិកចូលទៅក្នុងអ៊ុយក្រែនដើម្បីសង្រ្គោះពលរដ្ឋអាមេរិក ដែលប៉ុនប៉ងរត់ចេញពីអ៊ុយក្រែននោះទេ។ "វានឹងក្លាយទៅជាសង្រ្គាមលោក នៅពេលដែលទាហ៊ានរុស្សីនិងអាមេរិកចាប់ផ្តើមបាញ់គ្នាទៅវិញទៅមក"។ បើយោលទៅតាមសារព័ត៌មាន NBC, មន្ត្រីចារកម្មអាមេរិកបាននិយាយថា រុស្សីនឹងធ្វើការឈ្លានពានជាទ្រង់ទ្រាយធំ ដែលរថក្រោះអាចនឹងចូលទៅដល់ទីក្រុង Kyiv ក្នុងរយៈពេល៤៨ម៉ោង។

លោក Biden បានបន្ថែមថា លោកប្រធានាធិបតីរុស្សី Vladimir Putin “មានភាពវ័យឆ្លាតគ្រប់គ្រាន់នឹងមិនធ្វើអ្វីមួយដែលមានផលប៉ះពាល់ជាអវិជ្ជមានលើពលរដ្ឋអាមេរិកាំងទេ”។ ទន្ទឹមគ្នានោះដែរ លោកនាយករដ្ឋមន្ត្រីអង់គ្លេស Boris Johnson បាននិយាយថា មិនត្រូវអនុញ្ញាតឲ្យលោក Putin បករើសាច់ដុំក្នុងអឺរ៉ុបខាងកើតនោះទេ និងបានព្រមានថាទ្វីបនេះបានប្រឈមទៅនឹងវិបត្តិសន្តិសុខដ៏ធំអស់ជាច្រើនទសវត្សរ៍មកហើយ។ លោក Johnson បានចង្អុលបង្ហាញថា ការគាំទ្រខាងយោធាបន្ថែមទៀត នឹងត្រូវបញ្ជូនទៅបើសិនជារុស្សីឈ្លានពានអ៊ុយក្រែន៕