លោកប្រធានាធិបតីJoe-Biden បានថ្លែងទៅកាន់មហាសន្និបាតអង្គការសហប្រជាជាតិកាលពីថ្ងៃអង្គារ៍ថា លោកនឹងធ្វើការជាមួយនឹងសភាដើម្បីឲ្យទទួលបាននូវមូលនិធិទ្វេរដងនៅមុនឆ្នាំ២០២៤ គឺទឹកប្រាក់ចំនួន១១,៤ពាន់លានដុល្លារអាមេរិកជារៀងរាល់ឆ្នាំសំរាប់ជួយប្រទេសកំពុងអភិវឌ្ឍន៍ដើម្បីប្រយុទ្ធប្រឆាំងនឹងបំរែបំរួលអាកាសធាតុ ហើយដែលវានឹងជួយផងដែរឲ្យសំរេចគោលដៅនៃពិភពលោកដែលមានគំរោងជាងមួយទសវត្យរ៍មកហើយដើម្បីចលនាសាច់ប្រាក់ចំនួន១០០ពាន់លានដុល្លារក្នុងមួយឆ្នាំទៅកាន់ប្រទេសដែលក្រីក្រ។
“ កាលពីខែមេសា ខ្ញុំបានប្រកាសថាសហរដ្ឋអាមេរិកនឹងតំលើងថវិការទ្វេរដងដើម្បីផ្តល់ឲ្យប្រទេសកំពុងអភិវឌ្ឍន៍ដើម្បីដោះស្រាយវិបត្តិបរិស្ថាន តែថ្ងៃនេះខ្ញុំមានមោទនភាពនឹងប្រកាសថា ខ្ញុំនឹងធ្វើការជាមួយនឹងសភាដើម្បីស្វែងរកថវិការទ្វេរដងម្តងទៀតដើម្បីធ្វើឲ្យសហរដ្ឋអាមេរិកក្លាយទៅជាអ្នកដឹកនាំខាងបរិស្ថានសាធារណៈនិងជាអ្នកផ្គត់ផ្គង់ថវិការលើសគេ។
សេចក្តីប្រកាសរបស់លោកBiden នេះបានបញ្ចេញឲ្យដឹងមុនពេលប្រហែលជាមិនដល់៦សប្តាហ៍ផង ដែលនឹងមានការប្រជុំកំពូលស្តីអំពីបរិស្ថានរបស់អង្គការសហប្រជាជាតិ ដែលគ្រោងនឹងធ្វើនៅ Glasgow (Scotland)។អង់គ្លេសគឺជាអ្នកដឹកនាំកិច្ចប្រជុំកំពូលនេះ ដោយលោកនាយករដ្ឋមន្ត្រី Borris Johnsonជាអ្នកដឺកនាំអង្គប្រជុំ ដែលលោកបាននិយាយថា កិច្ចប្រជុំនេះមានសារៈសំខាន់ណាស់ វាជាគន្លឹះនៃការកសាងទំនុកចិត្តរវាងប្រទេសកំពុងអភិវឌ្ឍន៍និងប្រទេសអភិវឌ្ឍ ដើម្បីទទួលបាននូវថវិការ១០០ពាន់លានក្នុង១ឆ្នាំដូចការអះអាងតាំងពីឆ្នាំ២០២០ ។របាយការណ៍មួយដែលបញ្ចេញឲ្យដឹងកាលពីសប្តាហ៍មុន ដោយអង្គការសេដ្ឋកិច្ចនិងកិច្ចសហប្រតបត្តិការសំរាប់ការអភិវឌ្ឍន៍ បាននិយាយថាប្រទេសអ្នកមានទំនងហាក់ដូចជាភ្លេចការធ្វើវិភាគទាន១០០ពាន់លានដុល្លារកាលពីឆ្នាំមុន ជួយចំពោះប្រទេសកំពុងអភិវឌ្ឍន៍ដើម្បីដោះស្រាយការប្រឈមជាមួយនឹងកាបំរែបំរួលបរិស្ថានបន្ទាប់ពីមានការតំឡើងមូលនិធិតិចជាង២%នៅឆ្នាំ២០១៩។
