កាលពីថ្ងៃទី២២ថ្មីៗកន្លងទៅនេះ ផលិតកម្មបារមីបានបង្ហោះសារមួយនៅលើទំព័រហ្វេសប៊ុកផ្លូវការរបស់ពួកគេដោយបាននាំយកសេចក្តីប្រកាសជាផ្លូវការមួយមកបង្ហាញសាធារណជនដើម្បីអនុវត្តន៍នាពេលខាងមុខ។ នៅក្នុងសារមួយនោះផងដែរ បារមីបានលើកឡើងពីបំរាមសំរាប់អនុវត្តន៍លើជនដែលរំលោភបំពានលើសិទ្ធិរបស់អ្នកនិពន្ធ។ បារមីបង្ហាញភាពតឹងរឹង និងម៉ត់ចត់ក្នុងការការពារកម្មសិទ្ធិបញ្ញាសិល្បកររបស់ខ្លួន ដោយកាលពីថ្មីៗនេះកំពូលសិល្បកររបស់ពួកគេ លោកវណ្ណដាទើបតែបែកធ្លាយអស់បទចំរៀងរហូតទៅដល់២២បទដោយសារការលួចបញ្ចេញ និងចែកចាយតគ្នាដោយសេរីនៅលើបណ្តាញអ៊ីធឺណែត។
យោងទៅតាមច្បាប់ការពារសិទ្ធិរបស់អ្នកនិពន្ធរបស់រដ្ឋសភា និងព្រឹទ្ធសភាបានចែងនៅក្នុងមាត្រាទី៦៤បទល្មើសនៃការផលិតស្នាដៃ រឺផលិតឡើងវិញស្នាដៃត្រូវពិន័យប្រាក់ចាប់ពី៥លានរៀលទៅ២៥លានរៀល ឬជាប់ពន្ធនាគារពី៦ខែទៅ១ឆ្នាំ។ ចំណែកឯការនាំចូល រឺនាំចេញផលិតផលពីបទល្មើសដែលជាការផលិតឡើងវិញ នឹងត្រូវពិន័យប្រាក់ពី២លានរៀលទៅ១០លានរៀល។ រីឯបទល្មើសនៃការសម្តែង រឺការផ្សព្វផ្សាយត្រូវពិន័យពី១លានរៀលទៅ៥លានរៀល។ ក្រៅពីនេះផងដែរបារមីក៏ទទួលបានការការពារពីអនុសញ្ញាទីក្រុងប៊ែនស្តីពីកិច្ចការពារស្នាដៃអក្សរសាស្រ្ត និងសិល្បៈរបស់អ្នកនិពន្ធនៅជុំវិញពិភពលោកផងដែរ។
