យើងប្រាកដជាដឹងជាយូរមកហើយថា Baking Soda គឺមិនត្រឹមតែបានគេប្រើសំរាប់តែធ្វើម្ហូបតែមួយមុខទេ។ យើង​អាចប្រើប្រាស់ Baking Soda ដើម្បីសំអាតជុំវិញផ្ទះផងដែរ ចុះសំរាប់សួនច្បារវិញបានទេ? Baking Soda​ ផ្សំឡើងពីធម្មជាតិពិតៗ គ្មានជាតិគីមី និងមានប្រសិទ្ធភាព ដែលល្អបំផុតសំរាប់កំចាត់សត្វល្អិត និងធ្វើអោយសួនច្បាររបស់អ្នកមានភាពស្រស់បំព្រង។

ម្យ៉ាងវិញទៀត Baking Soda ត្រូវបានគេស្គាល់ថាជាសូដ្យូមប៊ីកាបូណាតដែលមានជាតិអាល់កាឡាំងខ្ពស់។ វាដើរតួជាភ្នាក់ងារសំអាតតាមបែបធម្មជាតិ ហើយអាចប្រើសម្រាប់ព្យាបាលជំងឺផ្សិត ថែទាំរុក្ខជាតិ កំចាត់សត្វល្អិតនិងស្មៅ និងអ្វីៗជាច្រើនទៀត។ ប្រសិនបើអ្នកចូលចិត្តចំណាយពេលវេលារបស់អ្នកក្នុងសួនច្បារ ប៉ុន្តែអ្នកមិនចូលចិត្តភាពអាប់អួរដែលបង្កឡើងដោយសារធាតុគីមី Baking Soda គឺជាជំរើសដ៏ល្អបំផុតសំរាប់លោកអ្នក។

ដូច្នេះសូមក្រលេកមើលអត្ថប្រយោជន៏ដ៏ល្អបំផុតរបស់ Baking Soda ដែលយើងអាចប្រើវានៅក្នុងសួនច្បារបានដូចខាងក្រោម៖

១. អាចធ្វើអោយផ្ការីកស្កុះស្កាយ

មានផ្កាមួយចំនួនដែលលូតលាស់ល្អនៅលើដីដែលមានជាតិ អាល់កាឡាំងរួមទាំងជាតិ geraniums, hydrangeas និង begonias ជាដើម។ Baking Soda មានជាតិអាល់កាឡាំង ដូច្នេះការស្រោចទឹករុក្ខជាតិជាមួយនឹង Baking Soda ជួយអោយរុក្ខជាតិលូតលាស់ល្អ។ យើងត្រូវលាយទឹកពីរលីត្រជាមួយ Baking Soda មួយស្លាបព្រាបាយ។ ប្រើវីធីនេះជារៀងរាល់មួយខែម្តងដើម្បីទទួលបានលទ្ធផលល្អបំផុត។

២.​ ការពារជំងឺផ្សិត

មេរោគផ្សិតនឹងបង្កភាពមិនល្អដល់សួនច្បាររបស់អ្នក ហើយវាអាចពិបាកដោះស្រាយជាទីបំផុត។ Baking Soda មិនអាចសម្លាប់ផ្សិតដែលមានស្រាប់នោះទេ ប៉ុន្តែវានឹងការពារកុំឱ្យផ្សិតកើនឡើងនៅពេលអនាគត។ ដើម្បីប្រើប្រាស់ Baking Soda ទប់ស្កាត់និងមេរោគផ្សិត អ្នកត្រូវមានទឹកក្តៅចំនួន មួយភាគបួន សាប៊ូលាងចាន ពីរទៅបីដំណក់ និង Baking Soda ១ស្លាបព្រាកាហ្វេ។ ផ្សំគ្រឿងទាំងអស់ទៅក្នុងចានមួយ បន្ទាប់មកចាក់ចូលទៅក្នុងដបបាញ់។ ក្រឡុកវាអោយបានសប់ បន្ទាប់មកបាញ់សូលុយស្យុងនេះទៅលើរុក្ខជាតិរបស់អ្នកនៅពេលព្រឹក​ដែលមានសីតុណ្ហភាពទាប។ អ្នកត្រូវប្រាកដថា អ្នកបានបាញ់កំពូលនិងបាតស្លឹករុក្ខជាតិដើម្បីផ្តល់នូវការគ្របដណ្តប់ពេញលេញដល់រុក្ខជាតិ។

៣.​សំអាតស្លឹកនៃរុក្ខជាតិ

យើងទាំងអស់គ្នាប្រាកដជាបានដឹងអំពីរស្មីសំយោគនៅក្នុងមេរៀនវិទ្យាសាស្ត្រនៅសាលារបស់យើងរួចហើយ។ រុក្ខជាតិមិនអាចរស់បានទេ បើគ្មានការធ្វើរស្មីសំយោគហើយការធ្វើបែបនេះបានពួកវាត្រូវការពន្លឺព្រះអាទិត្យ។ ដើម្បីជួយឱ្យរុក្ខជាតិស្រូបយកពន្លឺព្រះអាទិត្យបានច្រើនបំផុត អ្នកគួរតែប្រាកដថាស្លឹករបស់វាមានការលាងសំអាតបានត្រឹមត្រូវ។

យើងត្រូវផ្សំ Baking Soda កន្លះស្លាបព្រាកាហ្វេ និងទឹកត្រងឬទឹកចម្រោះមួយលីត្រ។ បន្ទាប់មកជូតស្លឹករុក្ខជាតិរបស់អ្នកជាមួយក្រណាត់ ឬអេប៉ុង ដែលបានជ្រលក់ចូលក្នុងសូលុយស្យុងនោះ ហើយយើងគួរតែធ្វើបែបនេះជារៀងរាល់ថ្ងៃដើម្បីទទួលបានផលល្អ។

៤. ការពារជំងឺដែលបង្កលើប៉េងប៉ោះ

ការដាំប៉េងប៉ោះនៅផ្ទះជាជំរើសដ៏ល្អបំផុត ព្រោះប៉េងប៉ោះសំបូរទៅដោយវីតាមីននិងមានរសជាតិឆ្ងាញ់ ហើយយើងមិនបាច់ចំណាយថវិកាដើម្បីទិញវានោះទេ។ តែប្រសិនបើប៉េងប៉ោះរបស់អ្នក មានមេរោគផ្សិតនោះអ្នកនិងមិនមានប៉េងប៉ោះ ដើម្បីបរិភោគនោះទេ។ ដើម្បីបងា្ករការឆ្លងមេរោគផ្សិត អ្នកត្រូវផ្សំថ្នាំអាស្ពីរីន ២គ្រាប់ជាមួយទឹក ២ហ្គាឡុង និង Baking Soda ២ស្លាបព្រា។ ដាក់ល្បាយសូលុយស្យុងនេះទៅក្នុងដបបាញ់ ហើយបាញ់លើរុក្ខជាតិរបស់អ្នកជារៀងរាល់ថ្ងៃ។

៥. ការពារផ្កាដែលបានកាត់ហើយអោយនៅស្រស់បានយូរ

ផ្កាស្រស់បន្ថែមភាពស្រស់បំព្រងដល់ផ្ទះបាយឬបន្ទប់ទទួលភ្ញៀវរបស់អ្នក។ ប៉ុន្តែត្រឹមតែមួយថ្ងៃសោះ ផ្កាប្រែជាក្រៀមស្វិតស្រពោន តើយើងគួរតែទុកផ្កានោះលំអនៅក្នុងផ្ទះរបស់យើងទេ? អ្នកអាចធ្វើអោយផ្ការបស់អ្នកនៅតែមានភាពស្រស់បំព្រងដោយប្រើ Baking Soda។ គ្រាន់តែលាយ Baking Soda មួយស្លាបព្រាបាយជាមួយទឹកពីរលីត្រ បន្ទាប់មកចាក់ល្បាយនោះទៅក្នុងថូផ្ការបស់អ្នក។ ផ្លាស់ប្តូរវារៀងរាល់ពីរថ្ងៃម្តងដើម្បីទទួលបានលទ្ធផលបានយូរ។

៦. ធ្វើអោយរុក្ខជាតិ របស់អ្នកលូតលាស់ល្អ

យើងអាចធ្វើអោយរុក្ខជាតិដែលមិនសូវលូតលាស់ល្អអោយលូតលាស់ល្អឡើងវិញដោយប្រើ Baking Soda ។​ ដើម្បីទទួលបានទឹកល្បាយ Baking Soda ដែលមានប្រសិទ្ធភាពខ្ពស់ យើងត្រូវការទឹកចម្រោះឬត្រង ១ហ្គាឡុង Baking Soda ១ស្លាបព្រាកាហ្វេ អាម៉ូញាក់កន្លះស្លាបព្រាកាហ្វេ និងអំបិលអេសផម ១ស្លាបព្រាកាហ្វេ។ ផ្សំគ្រឿងផ្សំទាំងអស់ទៅក្នុងធុង បន្ទាប់មកកូរឱ្យរលាយអំបិលនិង Baking Soda ។ ដាក់ល្បាយទាំងអស់ទៅក្នុងធុងស្រោច រុក្ខជាតិរបស់អ្នកហើយប្រើជាប្រចាំខែ។ ដោយប្រើវិធីនេះ រុក្ខជាតិទាំងអស់នឹងលូតលាស់បានយ៉ាងល្អ ជាពិសេសផ្កាកុលាប។

៧. ធ្វើអោយប៉េងប៉ោះ របស់អ្នកមានរសជាតិផ្អែម

យើងត្រូវតែមានវីធីសាស្រ្តក្នុងការដាំប៉េងប៉ោះ ដើម្បីទទួលបានរសជាតិឆ្ងាញ់។ ដើម្បីទទួលបានប៉េងប៉ោះដែលមានរសជាតិផ្អែម អ្នកត្រូវបន្ថែម Baking Soda និងអំបិល Epsom ហើយប្រោះលើដីដែលនៅជុំវិញប៉េងប៉ោះ ហើយស្រោចទឹកតាមក្រោយ។ នៅពេលដែលដីនៅជុំវិញរុក្ខជាតិប៉េងប៉ោះរបស់អ្នកមិនសូវមានជាតិអាស៊ីតនោះផ្លែប៉េងប៉ោះរបស់អ្នកក៏មិនមានជាតិអាសុីតដែរ។

៨. ព្យាបាលរោគផ្សិតនិងធូលី

មេរោគផ្សិតនិងធូលី ងាយនឹងធ្វើអោយប៉ះពាល់ដល់រុក្ខជាតិផ្សេងៗ។​ ប្រសិនបើមេរោគផ្សិតនេះបានកើតឡើងលើរុក្ខជាតិរបស់អ្នកហើយ អ្នកត្រូវព្យាបាលវាជាមួយ Baking Soda ។ ដើម្បីទទួលបានល្បាយ​នេះអ្នកត្រូវលាយទឹក ១ហ្គាឡុងជាមួយ Baking Soda ១ស្លាបព្រា។ ទុកឱ្យម្សៅសូដារលាយអស់ បន្ទាប់មកបន្ថែមប្រេងរុក្ខជាតិ ១ស្លាបព្រានិងសាប៊ូលាងចាន ១ស្លាបព្រា។ ចាក់ល្បាយចូលទៅក្នុងដប បន្ទាប់មកបាញ់ទៅលើត្រសក់ និងរុក្ខជាតិដទៃទៀតរបស់អ្នក នៅថ្ងៃដែលមានអាកាសធាតុក្តៅ។ ជៀសវាងការបាញ់ល្បាយនេះ នៅពេលមានពន្លឺព្រះអាទិត្យខ្លាំងព្រោះវាអាចធ្វើឱ្យរុក្ខជាតិឡោក និងរលួយ។

៩. តេស្តកំរិត pH ដី

ការដឹងពី pH ដីរបស់អ្នកគឺជារឿងត្រឹមត្រូវសម្រាប់ការដាំរុក្ខជាតិរបស់អ្នកដើម្បីទទួលបានផលល្អ។ ខណៈពេលដែលរុក្ខជាតិខ្លះ លូតលាស់ល្អលើដីដែលមានជាតិអាសុីត រុក្ខជាតិខ្លះដុះលូតលាស់នៅក្នុងបរិស្ថានអាល់កាឡាំង។ ដីដែលមានជាតិអាស៊ីត ឬអាល់កាឡាំងច្រើន អាចប៉ះពាល់ដល់លទ្ធភាពដែលរុក្ខជាតិអាចស្រូបយកសារធាតុរ៉ែតាមរយៈឬសរបស់វា។ វាងាយស្រួលនិងរហ័សក្នុងការធ្វើតេស្ត pH ដីជាមួយ Baking Soda ។ គ្រាន់តែមានទឹកខ្មេះកន្លះពែង ទឹកកន្លះពែង និង Baking Soda​ ១ស្លាបព្រា។ យកដីពីរពែងពីសួនច្បាររបស់អ្នក ដើម្បីយកមកពិសោធន៏បន្ទាប់មកចាក់ល្បាយទៅក្នុងពែងនោះ។

ដីចេញពពុះបង្ហាញថាដីមានជាតិអាល់កាឡាំង។ ប្រសិនបើដីមិនមានពពុះទេ វាបង្ហាញថាដីមានជាតិអាស៊ីត។ អ្នកអាចបាច Baking Soda​ ពាសពេញលើដី មុនពេលស្រោចទឹកដើម្បីកាត់បន្ថយជាតិអាស៊ីតរបស់វា។ អ្នកអាចសាកល្បងដីរបស់អ្នករៀងរាល់សប្តាហ៍ដោយប្រើវីធីខាងលើរហូតដល់ដីមិនឡើងពពុះ។

១០. កំចាត់ស្មៅយ៉ាងមានប្រសិទ្ធភាព

Baking Soda គឺជាជម្រើសធម្មជាតិដ៏មានប្រសិទ្ធភាពមួយ ជំនួសអោយផលិតផលគីមីដែលអាចប្រើសម្រាប់កំចាត់ស្មៅនៅក្នុងសួនច្បាររបស់អ្នក។ អ្នកគ្រាន់តែបង្សើមស្មៅនៅក្នុងសួនរបស់អ្នក ដោយប្រើទុយោឬកំប៉ុងទឹកដើម្បីធ្វើឱ្យវាសើមបានល្អ។ បន្ទាប់មកប្រោះ Baking Soda មួយពែងលើស្មៅរបស់អ្នក ដោយប្រើអំបោសដើម្បីបាច។ ធ្វើបែបនេះម្តងគត់ក្នុងមួយសប្តាហ៍ដើម្បីទទួលបានលទ្ធផលល្អ។ ប្រសិនបើប្រើ Baking Soda តែម្យ៉ាងក៏មិនអាចកំចាត់ស្មៅបានទេ យើងត្រូវលាយ Baking Soda ជាមួយទឹកខ្មេះនិងសាប៊ូលាងចានហើយចាក់វាដោយផ្ទាល់ទៅលើស្មៅរបស់អ្នក។

១១. ធ្វើជាទឹកបាញ់សំរាប់ថែរក្សាសួនច្បារ

Baking Soda ពិតជាមានសារៈប្រយោជន៏មែនទែនសំរាប់សួនច្បារ។ វាជួយធ្វើឱ្យរុក្ខជាតិរបស់អ្នកមានសុខភាពល្អ ការពារសត្វល្អិតដែលបំផ្លាញសួនច្បាររបស់អ្នក និងកាត់បន្ថយហានិភ័យនៃជំងឺដែលអាចបង្កលើដំណាំរបស់អ្នក។ លោកអ្នកក៏អាចប្រើ Baking Soda ដើម្បីជាទឹកបាញ់ថែរក្សាសួនរបស់អ្នក។ គ្រាន់តែផ្សំទឹកមួយលីត្រ (ក្តៅគឺល្អបំផុត) ជាមួយជីរុក្ខជាតិ​ Baking Soda ២ស្លាបព្រាបាយ និងសាប៊ូលាងចាន ១ស្លាបព្រា។ បន្ថែមប្រេងត្រី ១ ស្លាបព្រាប្រសិនបើអ្នកមាន។ នៅពេលគ្រឿងផ្សំទាំងនេះត្រូវបានលាយបញ្ចូលគ្នាបានត្រឹមត្រូវ ហើយចាក់វាទៅក្នុងដបបាញ់។

បាញ់រុក្ខជាតិរបស់អ្នកជាមួយទឹកជាមុនសិន ព្រោះវាក៏អាចកំចាត់សត្វល្អិតបានមួយផ្នែកដែរ។ អ្នកគួរតែប្រើ Baking Soda ក្នុងមួយខែម្តងជាការប្រសើរប្រើ នៅពេលល្ងាចដើម្បី ចៀសវាងការរលួយដោយសារពន្លឺព្រះអាទិត្យបន្ទាប់ពីលាបរួច។

១២. កម្ចាត់សត្វល្អិតចង្រៃដែលបង្កគ្រោះថ្នាក់

គ្មានអ្វីពិបាកជាងការខំប្រឹងមើលថែដំណាំនៅក្នុងសួនរបស់អ្នកតែវានៅតែស្វិត ក្រៀមស្រពោន និង​ងាប់។ សំណាងដែលយើងមាន​ Baking Soda ដែលអាចការពារកុំឱ្យរឿងបែបនេះកើតមានឡើង។ អត្ថប្រយោជន៏របស់​ Baking Soda មួយទៀតនោះគឺជាថ្នាំសំលាប់សត្វល្អិតដោយគ្មានជាតិគីមី។

ដើម្បីប្រយុទ្ធប្រឆាំងនឹងសត្វល្អិត អ្នកត្រូវការទឹកក្តៅមួយលីត្រជាមួយ Baking Soda ១-២ ស្លាបព្រាកាហ្វេ។ បន្ថែមប្រេងអូលីវធម្មជាតិ ១ស្លាបព្រាបាយ និងសាប៊ូលាងចានចំនួន ១២ដំណក់ បន្ទាប់មកចាក់ចូលក្នុងដបបាញ់ហើយក្រឡុកវា។ បាញ់ល្បាយនេះជារៀងរាល់ថ្ងៃ ទៅលើរុក្ខជាតិរបស់អ្នករហូតដល់សត្វល្អិតលែងមាន។ ដើម្បីបងា្ករការកើតឡើងវិញ សូមបន្តប្រើប្រាស់វាជារៀងរាល់សប្តាហ៍ម្តង។

សត្វល្អិតមានផ្សេងៗគ្នាត្រូវការប្រើប្រាស់ Baking Soda តាមវីធីសាស្ត្រផ្សេងៗគ្នាដើម្បីកំចាត់វា ដូចខាងក្រោម៖

ការប្រើប្រាស់ Baking Soda ដើម្បីកំចាត់សត្វស្រមោច 

ការលាយបញ្ចូលគ្នារវាងម្សៅស្ករ និង Baking Soda គឺវិធីសាស្ត្រធម្មជាតិដ៏ល្អបំផុតប្រឆាំងនឹងស្រមោច។ ប្រសិនបើអ្នកធ្លាប់មានស្រមោចនៅក្នុងផ្ទះបាយរបស់អ្នក ហើយវាជាប្រភេទសត្វដែលចូលចិត្តស្ករ។ បន្ទាប់មករោយជុំវិញរន្ធស្រមោច ពួកវានឹងស៊ីល្បាយនោះ​ បន្ទាប់មកយកល្បាយនោះត្រលប់ទៅសំបុករបស់ពួកវាវិញ។ អ្នកត្រូវតែជ្រើសរើសម្សៅស្ករអោយបានត្រឹមត្រូវ ដើម្បីអោយប្រាដកថា ស្រមោចបានសុីដោយទាំង Baking Soda។

ដើម្បីកំចាត់សត្វសុច

សួនច្បាររបស់អ្នកប្រកដជាមានគំនរស្លឹកឈើឬគំនរជីកំប៉ុស្តជាក់ជាពុំខាន។ ខណៈពេលដែលជីកំប៉ុស្តអាចផ្តល់អត្ថប្រយោជន៍ វាក៏អាចទាក់ទាញសត្វល្អិតចង្រៃរួមទាំងសត្វសុចផងដែរ។ ដើម្បីកម្ចាត់សត្វសុច ​អ្នកត្រូវលាយទឹកមួយហ្គាឡុងជាមួយ Baking Soda ចំនួន៤​ស្លាបព្រា បន្ទាប់មកអ្នកត្រូវបាញ់ល្បាយលើជីកំប៉ុស្តឬស្លឹកឈើនោះ។ វាអាចសំលាប់សត្វសុចបានភ្លាមៗ។

ដើម្បីកំចាត់សត្វមានស្លាប

សត្វល្អិតដែលនៅលើដី​ ដូចជាសត្វកន្លាត ចូលរស់នៅលើដីដែលត្រជាក់និងមានជីវជាតិ ដែលវាជាសត្រូវដ៏អាក្រក់បំផុតរបស់អ្នកថែសួន ដើម្បីកំចាត់សត្វដែលស៊ីរុក្ខជាតិអ្នក។ គ្រាន់តែប្រោះ Baking Soda នៅជុំវិញដីដាំដំណាំរបស់អ្នក។ ប្រោះម្សៅនោះឡើងវិញបន្ទាប់ពីភ្លៀងម្តងៗ។

ដើម្បីកំចាត់សត្វខ្យងគ្មានស្នូក

សត្វនេះជាសត្វចង្រៃដែលជាសត្រូវសួនច្បារអាក្រក់បំផុតមួយក្នុងចំណោមប្រភេទផ្សេងទៀត។ ដើម្បីកំចាត់ពួកវាបាន ភាគច្រើនគេចូលចិត្តប្រើសារជាតិគីមី។ គ្រាន់តែប្រោះ Baking Soda ដោយផ្ទាល់ទៅលើសត្វខ្យងនោះដោយប្រុងប្រយ័ត្នដើម្បីចៀសវាងមានការខូចខាតដល់រុក្ខជាតិរបស់អ្នក។ អ្នកក៏អាចរោយ Baking Soda នៅជុំវិញរុក្ខជាតិរបស់អ្នក ដើម្បីការពារពីសត្វប្រភេទនេះ។

កំចាត់ដង្កូវដែលចូលចិត្តសុីស្ពៃក្តោប

ដង្កូវស្ពៃក្តោបគឺជាដង្កូវតូចៗដែលចូលចិត្តសុីបន្លែដូចជាខាត់ណា ស្ពៃក្តោបនិងប្រូខូលី។ ពួកវាអាចត្រូវបានសម្លាប់ដោយការលាយចូលគ្នានៃ Baking Soda និងម្សៅមី។ រៀងរាល់​បីទៅបួនថ្ងៃម្តង សូមប្រោះល្បាយនេះទៅលើរុក្ខជាតិរបស់អ្នកដើម្បីការពារពីដង្កូវនេះ។

សេចក្តីសន្និដ្ឋាន

មិនថាផ្សំជាមួយទឹក ឬប្រោះដោយផ្ទាល់លើរុក្ខជាតិ ឬដីទេ Baking Soda  ពិតជាមានអត្ថប្រយោជន៍ច្រើនណាស់នៅក្នុងសួនច្បារ។ ចងចាំថា អ្នកត្រូវធ្វើតាមការណែនាំនៅក្នុងការណែនាំខាងលើនេះដោយប្រុងប្រយ័ត្ន នៅពេលប្រើ Baking Soda នៅក្នុងសួនច្បាររបស់អ្នក។ Baking Soda ជាជំរើសដ៏ត្រឹមត្រូវសំរាប់សួនច្បាររបស់អ្នក ប៉ុន្តែវាក៏អាចសម្លាប់រុក្ខជាតិរបស់អ្នកបានដែរ ប្រសិនបើអ្នកប្រើច្រើនពេកក្នុងពេលតែមួយ។

ជាពិសេសនៅពេលដែលអ្នកប្រើវាដើម្បីកំចាត់ស្មៅ ត្រូវប្រាកដថា រុក្ខជាតិរបស់អ្នកគ្មានការប៉ះពាល់​ ម្យ៉ាងទៀតវាក៏អាចធ្វើអោយស្លឹកឈើរបស់លោកអ្នកមានភាពរលួយ ពេលដែលប្រើ Baking Soda ​ក្នុងកំរិតលើសលប់ពេក៕

អត្ថបទដកស្រង់ពី Tim Russell

បកប្រែ និងកែសម្រួលដោយ កញ្ញា ឆេងមួយ