កាលពីថ្ងៃទី១៨ ខែមិថុនាកន្លងទៅនេះ ទស្សនាវដ្តី The LiFTED Asia ដ៏មានប្រជាប្រិយភាពប្រចាំតំបន់អាស៊ីបានធ្វើការចេញផ្សាយនូវបញ្ជីលេខរៀងថ្មីមួយនៃឈ្មោះសិល្បករទាំង៥០រូបដែលជា The Best Asian Hip Hop MCs នៅក្នុងតំបន់អាស៊ីសំរាប់ឆ្នាំ២០២៤នេះ។​ ដោយនៅក្នុងឆ្នាំនេះផងដែរ ក្រោមការដាក់ពិន្ទុ និងយកចិត្តទុកដាក់យ៉ាងល្អិតល្អន់ ពួកគេក៏បានរកឃើញថា សិល្បករដែលសក្តិសមបំផុតឈរនៅលើតារាងកំពូលនៃបញ្ជី The LiFTED 50 2024 នេះ គឺបានទៅលើសិល្បករស្រីឆ្នើមដំបូងគេបង្អស់តែម្តង ដែលជាអ្នកនាង Awich រ៉េបផ័ររបស់ប្រទេសជប៉ុន។ 

ខណៈលោកវណ្ណដារបស់យើងវិញបានទទួលបានចំណាត់លេខរៀងទី១១នៅក្នុងចំណោមបញ្ជីទាំង៥០រូបនេះ ខណៈដែលកាលពីឆ្នាំមុន លោកទទួលបានរហូតដល់ចំណាត់ថ្នាក់លេខរៀងទី៦ ដែលជាសមិទ្ធផលជោគជ័យដ៏លេចធ្លោមួយ។

យ៉ាងណាមិញ សំរាប់នៅក្នុងឆ្នាំនេះ ថ្វីបើលោកមិនបានស្ថិតនៅក្នុងចំណោម Top 10 ប៉ុន្តែលោកបានរក្សានៅក្នុងតំណែងជួរ Top ផងដែរ ខណៈនាំមុខសិល្បករល្បីៗជាច្រើននាក់ទៀតដូចជា MC Stan របស់ឥណ្ឌាដែលឈរនៅចំណាត់ថ្នាក់លេខរៀងទី៥កាលពីឆ្នាំទៅ និងក៏ដូចជានាំមុខ Milli របស់ថៃផងដែរ។ ប៉ុន្តែនៅក្នុងឆ្នាំនេះគួរអោយកត់សំគាល់ឃើញថា សិល្បករ Top 10 ដែលនាំមុខលោកគឺរួមមាន លេខ២ JP The Wavy ដែលជារ៉េបផ័រជប៉ុន ដៃគូរបស់ Awich, លេខ៣ Divine រ៉េបផ័រឥណ្ឌា, លេខ៤ Emiway bantai រ៉េបផ័រឥណ្ឌា, លេខ៥ Ramengvrl រ៉េបផ័រឥណ្ឌូនេស៊ី, លេខ៦ Jessi រ៉េបផ័រកូរ៉េ, លេខ៧ Flow G រ៉េបផ័រហ្វីលីពីន, លេខ៨ Jay Park រ៉េបផ័រកូរ៉េ, លេខ៩ Youngohm រ៉េបផ័រថៃ និងលេខ១០ក្រុម Digi Ghetto រ៉េបផ័រ​​​ចិន។