តារាសម្តែង Arnold Schwarzenegger បានជួបគ្រោះថ្នាក់ចរាចរណ៍នៅទីក្រុង Los Angeles ។ ប៉ូលីសទីក្រុង Los Angeles បាននិយាយថា ស្ត្រីម្នាក់បានរងរបួសនៅក្នុងករណីរថយន្តគ្រឿងបុកគ្នាចំនួន ៤គ្រឿង ដែលបានកើតឡើងកាលពីរសៀលថ្ងៃសុក្រ។
រូបថតពីកន្លែងកើតហេតុបានបង្ហាញរថយន្តប្រភេទ SUV ដ៏ធំមួយនៅលើរថយន្តបីផ្សេងទៀតនៅផ្លូវប្រសព្វក្បែរផ្ទះរបស់តារាសម្តែងរូបនេះនៅក្នុងសង្កាត់ Brentwood ។ សមត្ថកិច្ចបានបន្តថា ពុំមានការចាប់ខ្លួន និងការពាក់ព័ន្ធនឹងគ្រឿងញៀន និងគ្រឿងស្រវឹងនោះទេ។
អតីតអ្នកនាំពាក្យរបស់អភិបាលរដ្ឋកាលីហ្វ័រញ៉ា បានបញ្ជាក់ប្រាប់កាសែត Los Angeles Times ថា គាត់បានបើករថយន្ត SUV នៅពេលដែលឧបទ្ទវហេតុកើតឡើង ប៉ុន្តែមិនមានរបួសអ្វីនោះទេ។ រូបថតក្រោយគ្រោះថ្នាក់បានបង្ហាញតារាសម្តែងអាយុ ៧៤ ឆ្នាំម្នាក់នេះ ឈរនៅម្ខាងផ្លូវនិយាយជាមួយអ្នកបើកបរ និងប៉ូលីសផ្សេងទៀត។
របាយការណ៍របស់ប៉ូលីសដែលបានមើលឃើញដោយ CBS Los Angeles បាននិយាយថា លោក Schwarzenegger "នៅជិតផ្លូវប្រសព្វនៃមហាវិថី Sunset និង Allenford Avenue នៅពេលដែលការប៉ះទង្គិចបានកើតឡើងជាមួយរថយន្ត Prius ពណ៌ក្រហមកំពុងបត់ចូល ខណៈដែលវាបន្តឆ្លងកាត់សញ្ញាភ្លើងក្រហមដើម្បីបត់ឆ្វេង។" និងបានបន្ថែមថា រថយន្ត SUV នេះកិនពីលើរថយន្ត Prius ពណ៌ក្រហម ហើយបន្ទាប់មកបានទៅបុកនឹងរថយន្តពីរផ្សេងទៀត។
គេហទំព័រសារព័ត៌មាន TMZ បានរាយការណ៍ថា ស្ត្រីដែលបើករថយន្ត Prius បានរងរបួសក្បាល ហើយត្រូវបានបញ្ជូនទៅមន្ទីរពេទ្យ ប៉ុន្តែរបួសរបស់នាងមិនត្រូវបានគេគិតថា គំរាមកំហែងដល់អាយុជីវិតនោះទេ។ អ្នកតំណាងម្នាក់បានប្រាប់ទស្សនាវដ្តី PEOPLE ថា "គាត់មិនអីទេ ការព្រួយបារម្ភតែមួយគត់របស់គាត់នៅពេលនេះគឺសម្រាប់ស្ត្រីដែលរងរបួស"៕
អត្ថបទដកស្រង់ពី BBC
បកប្រែនិងកែសម្រួលដោយ Mr. Blue