កងទ័ពអ៊ីស្រាអែលបានអះអាងថា ខ្លួនបានរកឃើញផ្លូវបើកចំនួន 800 ដែលនាំឆ្ពោះទៅកាន់បណ្តាញផ្លូវរូងក្រោមដីដ៏ស្មុគស្មាញ និងទីកន្លែងលាក់ខ្លួនរបស់ក្រុមចលនាហាម៉ាស ដោយបន្ថែមថាកងកម្លាំងរបស់ពួកគេបានបំផ្លាញផ្លូវបើកទាំងនោះជាងពាក់កណ្តាល។ កងទ័ពអ៊ីស្រាអែលបានរាយការណ៍ថា ពួកគេបានបំផ្លាញផ្លូវបើកនៃរូងក្រោមដីចំនួន 500 ចេញពីផ្លូវបើកទាំង 800 ដែលត្រូវបានរកឃើញដោយប្រើវិធីសាស្រ្តផ្សេងៗដូចជា"ការដាក់គ្រាប់បែក និងការបិទទាំងស្រុង" ។

1. បុគ្គលិក Amazon ដាក់សម្ពាធក្រុមហ៊ុនទម្លាក់កុងត្រាចោលជាមួយអ៊ីស្រាអែល

យោងតាមសារព័ត៌មាន The Washington Post ចុះផ្សាយថ្ងៃទី០២ ខែធ្នូបានអោយដឹងថា បុគ្គលិក Amazon ជាង 100 នាក់នៅក្នុងទីក្រុងចំនួន 20 បានប្រមូលផ្តុំគ្នាដើម្បីញ៉ាំនំ knafeh និងប្រារព្ធទិវាអបអរសាមគ្គីភាពអន្តរជាតិរបស់ប្រជាជនប៉ាឡេស្ទីន ដែលជាទិវាអំពីការទទួលស្គាល់សិទ្ធិអំណាចរបស់ប្រជាជនប៉ាឡេស្ទីន ប៉ុន្តែនៅក្នុងការិយាល័យចំនួនពីរ ព្រឹត្តិការណ៍នេះត្រូវបានរំខានដោយខិតបណ្ណ័ផ្សព្វផ្សាយដែលសរសេរឡើងថា "ការចាប់ជំរិត" នៅខាងលើរូបថតរបស់ចំណាប់ខ្មាំងអ៊ីស្រាអែល។

បុគ្គលិកដែលចូលរួមក្នុងពិធីអបអរកាលពីថ្ងៃពុធនេះ "មានអារម្មណ៍ថាពួកគេកំពុងត្រូវបានបំភិតបំភ័យ"។

ឧប្បត្តិហេតុនេះបានកើតឡើងបន្ទាប់ពីមានភាពតានតឹងកើនឡើងជាច្រើនសប្តាហ៍រវាងសមាជិកនៃបុគ្គលិកជនជាតិអារ៉ាប់របស់ក្រុមហ៊ុន Amazon ដែលបានជំរុញឱ្យក្រុមហ៊ុនទម្លាក់កុងត្រា Cloud Computing ជាមួយនឹងអ៊ីស្រាអែល និងបង្ហាញការគាំទ្រដល់បុគ្គលិកប៉ាឡេស្ទីន។

2. កងកម្លាំងការពារអ៊ីស្រាអែលរកឃើញផ្លូវរូងក្រោមដីចំនួន 800 នៅហ្គាហ្សា

យោងតាមសារព័ត៌មាន The Times of Israel ចុះផ្សាយថ្ងៃទី០៣ ខែធ្នូបានអោយដឹងថា កងកម្លាំងការពារអ៊ីស្រាអែលបាននិយាយកាលពីថ្ងៃអាទិត្យថា កងទ័ពរបស់ខ្លួនបានរកឃើញរូងក្រោមដីជាង 800 នៅតំបន់ហ្គាហ្សាស្ទ្រីប ចាប់តាំងពីការចាប់ផ្តើមនៃការវាយលុករបស់ក្រុមភេរវករហាម៉ាសនៅចុងខែតុលា។

យោធាបាននិយាយថា ប្រហែលជាង 500 នៃរូងក្រោមដីត្រូវបានបំផ្លាញរួចមកហើយ ដោយការដាក់គ្រាប់បែកធំបំផ្ទុះ និងការបិទច្រកផ្លូវតែម្តង។

យោងតាមកងកម្លាំងការពារអ៊ីស្រាអែលបានអោយដឹងថា ផ្លូវរូងក្រោមដីជាច្រើនត្រូវបានតភ្ជាប់ទៅនឹង "ទ្រព្យសម្បត្តិយុទ្ធសាស្ត្រ" របស់ក្រុមហាម៉ាស។

យោធាបាននិយាយថា ខ្លួនក៏បានបំផ្លាញផ្លូវរូងក្រោមដីដែលមានចម្ងាយរាប់រយគីឡូម៉ែត្រ បន្ថែមពីលើនេះផងដែរ។ ពួកគេ​​​បាននិយាយថាទីតាំងរបស់ពួកវាទាំងនោះ​គឺស្ថិត​នៅ​ក្នុង​តំបន់​ស៊ីវិល ហើយ​ភាគច្រើន​មាន​ទីតាំង​នៅ​ជិត ឬ​ខាងក្នុង​គ្រឹះស្ថាន​អប់រំ សាលាមត្តេយ្យ វិហារ​ឥស្លាម និង​សួន​កុមារជាដើម​។

3. អ៊ីស្រាអែលមិនបានប្រាប់ផែនការសង្គ្រាមរបស់ហាម៉ាសទៅកាន់អាមេរិក

យោងតាមសារព័ត៌មាន Politico ចុះផ្សាយថ្ងៃទី០១​​​ ខែធ្នូបានអោយដឹងថា មិនមានការចង្អុលបង្ហាញណាមួយឡើយថា អ៊ីស្រាអែលបានចែករំលែកផែនការសង្គ្រាមសម្ងាត់របស់ក្រុមហាម៉ាសជាមួយអាមេរិក ដែលជាផែនការលម្អិតនៃការវាយប្រហារថ្ងៃទី7 ខែតុលាជាមួយនេះបើយោងតាមមន្ត្រីអាមេរិកបីនាក់នោះទេ។

កាសែត New York Times បានរាយការណ៍កាលពីថ្ងៃព្រហស្បតិ៍ថា មន្ត្រីអ៊ីស្រាអែលបានទទួលផែនការប្រយុទ្ធរបស់ក្រុមហាម៉ាសនៃការវាយប្រហារថ្ងៃទី 7 ខែតុលា មានឈ្មោះថា "Jericho Wall" នៅជាងមួយឆ្នាំមុនពេលកើតហេតុ ប៉ុន្តែបានច្រានចោលថាវាហួសពីសមត្ថភាពរបស់ពួកគេក្នុងការទប់ទល់ជាមួយនឹងក្រុមសកម្មប្រយុទ្ធនេះ។

ក្រុមមន្ត្រីបានប្រាប់កាសែត Times ថាប្រសិនបើយោធាអ៊ីស្រាអែលពិតជាបានយកចិត្តទុកដាក់ជាមួយនឹងឯកសារប្រហែល40ទំព័រនេះច្បាស់លាស់ នោះពួកគេនឹងអាចការពារពីការវាយប្រហារដែលបានសម្លាប់ជនជាតិអ៊ីស្រាអែលជាង 1,200 នាក់នេះបាន។