តារាសម្ដែងអូស្ត្រាលី Alli Simpson បាននិយាយថា នាងពិតជាសំណាងណាស់ដែលនៅមានជីវិត បន្ទាប់ពីបាក់ក ខណៈពេលកំពុងលោតជ្រមុជទឹកក្នុងអាងទឹករាក់។ នាងបានប្រាប់អ្នកតាមដាន Instagram របស់នាងថា នាងនឹងត្រូវពាក់ឧបករណ៍ទ្រកសម្រាប់រយៈពេល 4 ខែបន្ទាប់ ខណៈពេលដែលនាងកំពុងសម្រាកព្យាបាល។
តារាម៉ូដែល និងតារាចម្រៀងដែលជាប្អូនស្រីរបស់តន្ត្រីករ Cody Simpson ក៏បានបង្ហោះរូបថតពីមន្ទីរពេទ្យក្នុងរដ្ឋ Queensland ផងដែរ។ នាងបាននិយាយថាឆ្នាំ 2022 របស់នាងគឺ "មិនមែនជាការចាប់ផ្តើមដ៏អស្ចារ្យនោះទេ" ដោយបន្ថែមថានាងក៏បានធ្វើតេស្តវិជ្ជមានសម្រាប់ Covid-19 ផងដែរ។
Simpson បានពន្យល់ថា នាងបានជ្រមុជ "ចូលទៅក្នុងអាងទឹករាក់ ហើយប៉ះទង្គិចក្បាលរបស់ខ្ញុំនៅខាងក្រោម"។ នាងបានទទួលការស្កែន និងថតកាំរស្មីអ៊ិចផ្សេងៗហើយពេលប្រេះឆ្អឹងធ្ងន់ធ្ងរត្រូវបានគេរកឃើញនាងត្រូវបាន "បញ្ជូនទៅកាន់មន្ទីរពេទ្យក្នុងរថយន្តសង្គ្រោះបន្ទាន់ ដើម្បីធ្វើរោគវិនិច្ឆ័យដោយ គ្រូពេទ្យវះកាត់សរសៃប្រសាទ"។
Simpson ត្រូវបានព្យាបាលនៅមន្ទីរពេទ្យសាកលវិទ្យាល័យ Gold Coast បន្ទាប់ពីឧបទ្ទវហេតុនេះបានកើតឡើងនៅចុងខែធ្នូ។ នាងបានសរសេរថា "មិនតម្រូវឱ្យធ្វើការវះកាត់ភ្លាមៗទេ ហើយខ្ញុំត្រូវបានបញ្ជូនទៅផ្ទះដោយមានឧបករណ៍ទ្រក ដែលខ្ញុំនឹងនៅជាមួយវា 24/7 សម្រាប់រយៈពេល 4 ខែខាងមុខ ខណៈដែលករបស់ខ្ញុំសង្ឃឹមថានឹងជាសះស្បើយឡើងវិញ"។ "ខ្ញុំពិតជាសំណាងណាស់ដែលនៅមានជីវិត និង/ឬមិនពិការ ដោយសារវាគ្រាន់តែមិនប៉ះចំខួរឆ្អឹងខ្នងរបស់ខ្ញុំ"។
តារាសម្តែងរូបនេះ បានប្រាប់អ្នកតាមដាន Instagram របស់នាងចំនួន 1.2 លាននាក់ថា "រយៈពេល 4 ខែនេះ គឺដូចជាទឹកមួយដំណក់ធ្លាក់ចូលទៅក្នុងមហាសមុទ្រអញ្ចឹង នៅពេលដែលប្រៀបធៀបដល់ជីវិតដ៏រីករាយ និងសុខភាពល្អរបស់ខ្ញុំ។"ដូចដែលអ្នកស្រមៃបាន ខ្ញុំបានស្រក់ទឹកភ្នែកមិនចេះចប់ ហើយអរគុណទេវតាដែលឃុំគ្រងខ្ញុំទាំងអស់ ដែលមើលថែខ្ញុំនៅក្នុងអាងទឹកនាពេលយប់នោះ បូករួមទាំងរាល់ពេលចាប់តាំងពីពេលនោះមក"។
នាងបានបង្ហោះ ជាលើកចុងក្រោយបង្អស់ដោយមានសារព្រមានថា៖ "កុំលោតចូលទៅក្នុងអ្វីទាំងអស់ពេល ដែលអ្នកមិនដឹងពីជម្រៅរបស់វា!!!!" បងប្រុសរបស់នាង Cody បានចែករំលែកការបង្ហោះរបស់នាងនៅលើ Instagram របស់គាត់ដោយសរសេរថា "អ្នកគឺជាអព្ភូតហេតុដ៏អស្ចារ្យមួយ។ ខ្ញុំស្រឡាញ់អ្នក ហើយខ្ញុំត្រេកអរជាខ្លាំង ដែលអ្នកមានសុវត្ថិភាព" ។
អត្ថបទដកស្រង់ពី BBC
បកប្រែនិងកែសម្រួលដោយ Mr. Blue