1. Al-Sisi កោះហៅប្រជាជន និងកងទ័ពដើម្បីធ្វើសង្គ្រាមប្រឆាំងនឹងអ៊ីស្រាអែល
យោងតាមសារព័ត៌មាន EFE ចុះផ្សាយថ្ងៃទី១៨ ខែតុលាបានអោយដឹងថា លោកប្រធានាធិdបតីអេហ្ស៊ីប Abdel Fattah al-Sisi កាលពីថ្ងៃពុធបានប្រឆាំងយ៉ាងខ្លាំងចំពោះគំនិតក្នុងការផ្លាស់ទីលំនៅរបស់ជនជាតិប៉ាឡេស្ទីនចូលទៅកាន់ប្រទេសអេហ្ស៊ីប ដោយស្នើជំនួសឱ្យពួកគេអាចត្រូវបានផ្លាស់ទៅកាន់វាលខ្សាច់នៅភាគខាងត្បូងអ៊ីស្រាអែលវិញ រហូតទាល់តែយោធាអ៊ីស្រាអែលបានបញ្ចប់ប្រតិបត្តិការដែលកំពុងបន្តនៅក្នុងតំបន់ហ្គាហ្សានេះ។ លោក Sisi បានព្រមានថា ប្រជាជនអេហ្ស៊ីបរាប់លាននាក់បានត្រៀមខ្លួនរួចរាល់ហើយដើម្បីតវ៉ាតាមដងផ្លូវប្រឆាំងនឹងសំណើណាមួយក្នុងការផ្លាស់ទីអ្នកស្រុក Gaza ទៅកាន់ឧបទ្វីប Sinai របស់អេហ្ស៊ីប។ លោក Sisi បាននិយាយនៅក្នុងសន្និសីទសារព័ត៌មានរួមគ្នាមួយជាមួយនឹងអធិកាបតីអាល្លឺម៉ង់លោក Olaf Scholz ដែលមកទស្សនកិច្ចនៅទីក្រុង Cairo ថា “អេហ្ស៊ីបមានប្រជាជន ១០៥ លាននាក់។ ប្រសិនបើស្ថានការណ៍នេះមកដល់ វានឹងចាំបាច់ក្នុងការកោះហៅប្រជាជនអេហ្ស៊ីបចេញមកសម្តែងការបដិសេធចំពោះសំណើបែបនេះ។ អ្នកនឹងឃើញប្រជាជនអេហ្ស៊ីបរាប់លាននាក់ (…) គាំទ្រជំហររបស់អេហ្ស៊ីបក្នុងរឿងនេះ”។
2. ពូទីនតំរង់កាំជ្រួចមីស៊ីលរុស្ស៊ីឆ្ពោះទៅកាន់នាវាផ្ទុកយន្តហោះអាមេរិក
យោងតាមសារព័ត៌មាន EFE ចុះផ្សាយថ្ងៃទី១៨ ខែតុលាបានអោយដឹងថា លោកប្រធានាធិបតីវ្ល៉ាឌីមៀ ពូទីនបាននិយាយកាលពីថ្ងៃពុធថា កងកម្លាំងអាកាសយានិករុស្ស៊ីនឹងធ្វើការល្បាតអចិន្ត្រៃយ៍លើសមុទ្រខ្មៅជាមួយនឹងយន្តហោះចម្បាំង MiG-31 ប្រដាប់ដោយអាវុធប្រព័ន្ធមីស៊ីលល្បឿនលឿន Kinzhal ។ លោកពូទីនបានប្រាប់អ្នកយកព័ត៌មាននៅទីក្រុងប៉េកាំងបន្ទាប់ពីលោកបានជួបជាមួយលោកប្រធានាធិបតីចិនស៊ី ជីនពីងថា "នេះមិនមែនជាការគំរាមកំហែងទេ... ដោយផ្អែកលើការណែនាំរបស់ខ្ញុំ កងកម្លាំងអាកាសយានិករុស្ស៊ីនឹងចាប់ផ្តើមល្បាតនៅលើមូលដ្ឋានអចិន្ត្រៃយ៍នៅក្នុងតំបន់អព្យាក្រឹតនៃដែនអាកាសលើសមុទ្រខ្មៅ ហើយយន្តហោះ MiG-31 នឹងត្រូវបានបំពាក់ដោយប្រព័ន្ធ Kinzhal" ។ លោកពូទីន បានសង្កត់ធ្ងន់ថា ការប្រកាសនេះមិនមែនបានន័យថាជាការគំរាមកំហែងនោះទេ ប៉ុន្តែជាប្រតិកម្មចំពោះការកើនឡើងអស្ថិរភាព ជាក់ស្តែងនៅក្នុងមជ្ឈិមបូព៌ា។ លោកបានលើកឡើងអំពីការដាក់ពង្រាយនាវាផ្ទុកយន្តហោះរបស់អាមេរិកចំនួនពីរទៅសមុទ្រមេឌីទែរ៉ាណេដើម្បីគាំទ្រអ៊ីស្រាអែលគឺជាកត្តាមួយផងដែរ។
3. Biden ប្តេជ្ញាផ្តល់ជំនួយដល់តំបន់ Gaza
យោងតាមសារព័ត៌មាន Reuters ចុះផ្សាយថ្ងៃទី១៨ ខែតុលាបានអោយដឹងថា លោកប្រធានាធិបតីអាមេរិក Joe Biden បានសន្យាជួយអ៊ីស្រាអែល និងប៉ាឡេស្ទីនក្នុងអំឡុងពេលដំំណើរទស្សនកិច្ចនៅអ៊ីស្រាអែលកាលពីថ្ងៃពុធ។ លោក Biden បាននិយាយថា សហរដ្ឋអាមេរិកនឹងផ្តល់ជំនួយថវិកាថ្មីចំនួន $100 លានដុល្លាសម្រាប់ជំនួយមនុស្សធម៌ដល់ប្រជាជនប៉ាឡេស្ទីននៅតំបន់ Gaza និងតំបន់ West Bank ដែលកាន់កាប់ដោយអ៊ីស្រាអែល។ សង្កេតឃើញថា លោក Biden បានប្រឈមមុខនឹងសម្ពាធយ៉ាងខ្លាំងដើម្បីធានាបាននូវជំនួយរបស់អ៊ីស្រាអែលនឹងអាចចូលទៅដល់តំបន់ហ្គាហ្សាបានតាមរយៈអេហ្ស៊ីប ដើម្បីអាចជួយសម្រាលទុក្ខលំបាករបស់ប្រជាជនស៊ីវិលដែលរស់នៅទីនោះ។ នៅចុងបញ្ចប់នៃដំណើរទស្សនកិច្ចរបស់លោក ការិយាល័យរបស់លោកនាយករដ្ឋមន្ត្រីអ៊ីស្រាអែល Benjamin Netanyahu បានដាក់ចេញសេចក្តីថ្លែងការណ៍មួយថា អ៊ីស្រាអែលនឹងអនុញ្ញាតឱ្យអាហារ ទឹក និងថ្នាំទៅដល់ភាគខាងត្បូងនៃតំបន់ហ្គាហ្សាតាមរយៈអេហ្ស៊ីប។ កន្លងមកអ៊ីស្រាអែលធ្លាប់បានបញ្ជាក់ជាញឹកញាប់ថា ខ្លួននឹងមិនអនុញ្ញាតឱ្យជំនួយរបស់ខ្លួនចូលទៅផ្គត់ផ្គង់ឡើយ ដរាបណាក្រុមហាម៉ាសបានដោះលែងចំណាប់ខ្មាំងប្រមាណ ជា ២០០ នាក់ដែលត្រូវបានចាប់ខ្លួនក្នុងអំឡុងការវាយប្រហារកាលពីថ្ងៃទី ៧ ខែតុលា។
