សូម៉ាលីវាយប្រហារលើកប៉ាល់អ៊ីស្រាអែលដោយបិទបាំងជាមួយនឹងមីស៊ីលយេម៉ែន ហើយបានបង្កើនសម្ពាធដល់អាមេរិកដើម្បីបញ្ឈប់សង្គ្រាមនៅតំបន់ហ្គាហ្សា ខណៈដែលវាប្រែក្លាយមកជាកប៉ាល់អ៊ីស្រាអែល Central Park ត្រូវបានវាយប្រហារដោយចោរសមុទ្រសូម៉ាលី។ កប៉ាល់អាមេរិក USS Mason បានឆ្លើយតបដោយការជួយសង្គ្រោះកប៉ាល់នោះបានដោយជោគជ័យ ប៉ុន្តែវាក៏ត្រូវប្រឈមនឹងការបាញ់ប្រហារដោយមីស៊ីលផ្លោងពីប្រទេសយេម៉ែន! តើយេម៉ែនបានសម្របសម្រួលជាមួយសូម៉ាលីក្នុងការកំណត់គោលដៅវាយប្រហារលើកប៉ាល់អ៊ីស្រាអែលនៅសមុទ្រក្រហមនិងឈូងសមុទ្រ Aden ដែរឬទេ? នេះស្របគ្នាទៅនឹងការប្រកាសពន្យារពេលបទឈប់បាញ់រយៈពេលពីរថ្ងៃ ព្រមជាមួយនឹងការបង្ហាញកម្លាំងរបស់ក្រុមហាម៉ាសនៅភាគខាងជើងហ្គាហ្សាក្នុងអំឡុងពេលប្រគល់ចំណាប់ខ្មាំងអ៊ីស្រាអែល ដែលបង្ហាញពីការបរាជ័យរបស់អ៊ីស្រាអែលក្នុងការគ្រប់គ្រងភាគខាងជើងហ្គាហ្សា! តើការពន្យារបទឈប់បាញ់នឹងនាំឱ្យមានបទឈប់បាញ់និងសង្គ្រាមនៅហ្គាហ្សាឬទេ?
-
សូម៉ាលីវាយប្រហារកប៉ាល់អ៊ីស្រាអែលនៅឈូងសមុទ្រ Aden
យោងតាមសារព័ត៌មាន Reuters ចុះផ្សាយថ្ងៃទី២៨ ខែវិច្ឆិកាបានអោយដឹងថា មន្ទីរបញ្ចកោណបាននិយាយកាលពីថ្ងៃចន្ទនេះថា មានការប៉ុនប៉ងប្លន់កប៉ាល់ពាណិជ្ជកម្មមួយគ្រឿងនៅឈូងសមុទ្រ Aden កាលពីថ្ងៃអាទិត្យ ដែលហាក់ដូចជាប្រតិបត្តិការឡើងដោយចោរសមុទ្រសូម៉ាលីប្រដាប់ដោយអាវុធ និងមិនមែនពីសំណាក់ក្រុមសកម្មប្រយុទ្ធ Houthi នៃប្រទេសយ៉េមែននោះឡើយ បើទោះបីជាមានការបាញ់មីស៊ីលមួយចំនួនក្រោយមកពីទឹកដីដែលគ្រប់គ្រងដោយក្រុម Houthi នៅក្នុងប្រទេសយេម៉ែនក៏ដោយ។
អ្នកនាំពាក្យមន្ទីរបញ្ចកោណ ឧត្តមសេនីយ៍ទោលោក Patrick Ryder បាននិយាយថា "យើងកំពុងបន្តវាយតម្លៃ ប៉ុន្តែការចង្អុលបង្ហាញដំបូងគឺថាមនុស្សទាំងប្រាំនាក់ដែលនៅលើនោះគឺជាជនជាតិសូម៉ាលី" ។
លោក Ryder បានបន្ថែមថា "ច្បាស់ណាស់ថាឧប្បត្តិហេតុនេះគឺទាក់ទងនឹងក្រុមចោរសមុទ្រ"។
នាវាដឹកប្រេងនេះមានឈ្មោះថា Central Park គ្រប់គ្រងដោយក្រុមហ៊ុន Zodiac Maritime Ltd ដែលជាក្រុមហ៊ុនគ្រប់គ្រងកប៉ាល់អន្តរជាតិដែលមានទីស្នាក់ការកណ្តាលនៅទីក្រុងឡុងដ៍ ដែលជាកម្មសិទ្ធិរបស់គ្រួសារ Ofer របស់អ៊ីស្រាអែល។
-
នាវាចម្បាំងអាមេរិកជួយសង្គ្រោះនាវាដឹកប្រេងអ៊ីស្រាអ៊ែល
យោងតាមសារព័ត៌មាន The Guardian ចុះផ្សាយថ្ងៃទី២៧ ខែវិច្ឆិកាបានអោយដឹងថា នាវាចម្បាំងកងទ័ពជើងទឹកអាមេរិកបានឆ្លើយតបទៅនឹងហេតុការណ៍ប៉ន់ប៉ងប្លន់កប៉ាល់ដឹកប្រេងអ៊ីស្រាអែល Central Park កាលពីថ្ងៃអាទិត្យនេះដោយការជួយសង្គ្រោះ។
យោធាអាមេរិកបាននិយាយថា អ្នកវាយប្រហារទាំងអស់ត្រូវបានបញ្ជូនទៅលើនាវាចម្បាំង Mason របស់សហរដ្ឋអាមេរិក ហើយកប៉ាល់ Central Park និងនាវិកនៅលើនោះមានសុវត្ថិភាពល្អនោះទេ។
លោក Ryder បានប្រាប់អ្នកយកព័ត៌មានថា កងទ័ពជើងទឹកអាមេរិកបានធ្វើការបាញ់ព្រមាននៅពេលដែលក្រុមអ្នកវាយប្រហារបានព្យាយាមរត់គេចខ្លួន ប៉ុន្តែមិនមានអ្នករងរបួសនោះទេ។
លោកបានបន្ថែមថាមានកប៉ាល់យោធាចិនចំនួនបីគ្រឿងនៅក្នុងតំបន់នោះ ប៉ុន្តែពួកគេមិនបានបញ្ចេញប្រតិកម្មឆ្លើយតបនោះទេ។ ស្ថានទូតចិនប្រចាំទីក្រុងវ៉ាស៊ីនតោនមិនអាចទាក់ទងបានភ្លាមៗទេជុំវិញការលើកឡើងនេះ។
-
ប៉ាឡេស្ទីននៅទីក្រុង Ramallah អបអរសាទរក្រុមហាម៉ាស
យោងតាមសារព័ត៌មាន The Times of Israel ចុះផ្សាយថ្ងៃទី២៧ ខែវិច្ឆិកាបានអោយដឹងថា ប្រជាជនប៉ាឡេស្ទីននៅទីក្រុង Ramallah បានទទួលស្វាគមន៍ការវិលត្រឡប់មកវិញរបស់អតីតអ្នកទោសប៉ាឡេស្ទីន ដែលត្រូវបានដោះលែងដោយអ៊ីស្រាអែលនៅក្នុងផ្នែកមួយនៃកិច្ចព្រមព្រៀងចំណាប់ខ្មាំង ដោយពួកគេបានធ្វើការកោតសរសើរឡើងមួយដ៏កម្រសម្រាប់ក្រុមភេរវករហាម៉ាស។
លោក Omar Atshan ត្រូវបានទទួលស្វាគមន៍ដោយមនុស្សរាប់រយនាក់នៅពេលដែលលោក និងអ្នកផ្សេងទៀតបានមកដល់ទីក្រុង Ramallah កាលពីថ្ងៃអាទិត្យ ដែលជាក្រុមចុងក្រោយបំផុតនៃអ្នកទោសចំនួន 39 នាក់ដែលត្រូវបានដោះលែងជាថ្នូរនឹងចំណាប់ខ្មាំងជនស៊ីវិលអ៊ីស្រាអែលដែលត្រូវបានចាប់ពង្រត់ដោយក្រុមសកម្មប្រយុទ្ធហាម៉ាស់នៅតំបន់ហ្គាហ្សា។
ក្នុងវីដេអូដែលត្រូវបានគេចែករំលែកតាមអ៊ីនធឺណិត មានការប្រារព្ធពិធីបានផ្ទុះឡើងខណៈដែលលោក Atshan បានមកដល់ និងឱបម្តាយរបស់លោក។
