បរទេស៖ ធនាគារអភិវឌ្ឍន៍អាស៊ី (ADB) បានទម្លាក់ការព្យាករណ៍កំណើនសេដ្ឋកិច្ចតំបន់អាស៊ី នៅឆ្នាំ ២០២១នេះ ដោយសារការចាក់វ៉ាក់សាំងយឺត, ការកើនឡើងនូវករណីឆ្លង និងការបិទខ្ទប់។ នេះបើតាមការចេញផ្សាយរបស់ទីភ្នាក់ងារព័ត៌មាន Reuters។ធនាគារ ADB បានព្យាករពីកំណើន ៧,១% ដែលថយចុះពីការព្យាករណ៍កាលពីខែមេសាដែលថានឹងកើនឡើង ៧,៣% ប៉ុន្តែបាននិយាយថា ការងើបឡើងវិញផ្នែកសេដ្ឋកិច្ច «នៅមានភាពផុយស្រួយ» និងបានព្រមានពី «ស្នាមរបួសដ៏យូរអង្វែង» ដែលបណ្តាលមកពីការរាតត្បាតនៃជំងឺកូវីដ-១៩។

ធនាគារ ADB បានព្រមានទៀតថា ការពន្យារពេលចាប់ផ្តើមយុទ្ធនាការចាក់វ៉ាក់សាំង និងវត្តមាននៃវីរុសកូវីដ-១៩បំប្លែងខ្លួនថ្មីៗគឺស្ថិតក្នុងចំណោមហានិភ័យធំបំផុតដល់សេដ្ឋកិច្ចនៅតំបន់អាស៊ី ហើយអាចនឹងមានផលវិបាករយៈពេលយូរ។អត្រាចាក់វ៉ាក់សាំងមិនមានភាពស្មើគ្នានៅទូទាំងតំបន់អាស៊ីដែលតិចជាង ១ភាគ៣ នៃពលរដ្ឋនៅតំបន់នេះបានចាក់វ៉ាកសាំងពេញលេញគិតត្រឹមចុងខែសីហា បើធៀបទៅនឹងជាង ៥០%នៅសហរដ្ឋអាមេរិក និងជិត ៦០%នៅសហភាពអឺរ៉ុប។ នេះបើតាមធនាគារ ADB បាននិយាយក្នុងរបាយការណ៍បច្ចុប្បន្នភាពស្តីពីចក្ខុវិស័យអភិវឌ្ឍអាស៊ី៕

អត្ថបទ៖ ថូ សិរីវឌ្ឍន៍