ប្រទេសទួរគី: នៅថ្ងៃទី 4 កញ្ញាឆ្នាំ 2021 រដ្ឋមន្ត្រីក្រសួងសុខាភិបាលនៃប្រទេសទួរគីលោក ហ្វាហ៍រ៉េតទីន កូកា (Fahrettin Koca) បានបញ្ជាក់ឲ្យដឹងថា ចំពោះវីរុសកូវីដ-19 បំប្លែងខ្លួនថ្មី បានធ្វើឱ្យជីវិតរបស់ពលរដ្ឋទួរគី ដែលបានឆ្លងវាហើយ ជាង 90% បានបាត់បង់ជីវិតដោយសារតែ ពួកគាត់មិនបានចាក់វ៉ាក់សាំង ឬក៏ចាក់វ៉ាក់សាំងមិនគ្រប់ដូស។

លោក ហ្វាហ៍រ៉េតទីន កូកា (Fahrettin Koca) រដ្ឋមន្ត្រីក្រសួងសុខាភិបាលទួរគី បានបញ្ជាក់ទៀតថា ប្រជាពលរដ្ឋទួរគីដែលបានឆ្លងវីរុស covid-19 ប្រភេទបំលែងថ្មី ភាគច្រើនមានអាយុចាប់ពី 15-45ឆ្នាំ ហើយប្រជាពលរដ្ឋទួរគីដែលបានបាត់បង់ជីវិតប្រមាណ 90% នៃអ្នកដែលស្លាប់ គឺសុទ្ធតែមិនបានចាក់វ៉ាក់សាំង និងចាក់វ៉ាក់សាំងមិនគ្រប់ដូស។

លោករដ្ឋមន្ត្រីបានបន្តទៀតថា យុទ្ធនាការក្នុងការចាក់វ៉ាក់សាំងនៅប្រទេសទួរគីបានចាប់ផ្ដើមឡើងតាំងពីថ្ងៃទី 14 មករា ឆ្នាំ 2021 មកម្ល៉េះ ដោយវ៉ាក់សាំងចម្បងដែលចាក់សម្រាប់ពលរដ្ឋទួរគី គឺប្រភេទវ៉ាក់សាំងស៊ីណូវ៉ាក់ (Sinovac) របស់ចិន។

សូមបញ្ជាក់ផងដែរថាគិតត្រឹមថ្ងៃទី 4 កញ្ញា ឆ្នាំ 2021 នេះ ប្រទេសទួរគីមានអ្នកឆ្លងសរុបចំនួន 6,458,630 នាក់ និងព្យាបាលជាសរុបចំនួន 5,886,912 នាក់ និងអ្នកបាត់បង់ជីវិតសរុប 57,559 នាក់៕
អត្ថបទ និងរូបភាពដោយ កណ្ដាប់ដៃដែក