កាលពីពេលថ្មីៗនេះ បទរបស់តារាចម្រៀងរ៉េបឯករាជ្យ 4T5 ដែលមិនទាន់បានចេញផ្សាយជាផ្លូវការនៅឡើយមានចំណងជើងថា“មុខមាត់មិនសូវសង្ហាតែស្នេហាវិញមួយគំនរ” កំពុងទទួលបានប្រជាប្រិយភាពយ៉ាងខ្លាំងនៅលើបណ្តាញសង្គម Tik Tok ។ ដោយសង្កេតឃើញថាបណ្តាអ្នកលេងនៅលើ Tik Tok មួយចំនួនបាននាំគ្នាប្រើប្រាស់បទចម្រៀងមួយនេះរបស់លោកមកធ្វើជាវិដេអូប្រៀបធៀបរូបភាពរបស់ពួកគេកាលនៅពីក្មេង និងរូបភាពរបស់ពួកគេបច្ចុប្បន្ន។ មិនថាឡើយសូម្បីតែលោក MC Sey ដែលជាសមាជិកនៃអតីតផលិតកម្ម រួមគ្នា MC Movement ក៏បានចូលរួមថតវិដេអូមានប្រើនូវបទចម្រៀងមួយនេះរបស់លោកដូចគ្នាកាលពីថ្ងៃអាទិត្យសប្តាហ៍មុននេះ និងបានចែករំលែកនៅលើបណ្តាញសង្គមហ្វេសប៊ុក។ យ៉ាងណាមិញអ្វីដែលកាន់តែពិសេសសំរាប់បទចម្រៀងមួយនេះផងដែរ មហាជនក៏បានរកឃើញថាការពិតទៅបទចម្រៀង«មុខមាត់មិនសូវសង្ហាតែស្នេហាវិញមួយគំនរ» នេះគឺជាបទ Free Style បានលំនាំពីបទភ្លេង នៃបទ«ចិត្តព្រៃផ្សៃ» របស់លោកព្រាបសុវត្ថិ ដោយបានកែច្នៃភ្លេងទៅជាចង្វាក់ Trap Beat វិញ និងក្លាយជា Version មួយទៀតយ៉ាងពិរោះប្លែកតែម្តង។ ប៉ុន្តែយើងនៅមិនដឹងនៅឡើយទេ ថាលោក 4T5 នឹងមានគំរោងចេញផ្សាយបទចម្រៀងមួយនេះជាផ្លូវការរឺអត់ ថ្វីបើលោក MC Sey ក៏បានចូលរួមផ្សព្វផ្សាយបទចម្រៀងមួយនេះក្តី។ ចុះទស្សនិកជនវិញយល់ឃើញយ៉ាងណាដែរ?
