អត្តសញ្ញាណ Rapper នីមួយៗមានភាពខុសប្លែកគ្នា និងគួរអោយចាប់អារម្មណ៍។ ធ្លាក់មកដល់បទក្រោយរបស់តារាចម្រៀងរ៉េប 4T5 នេះផងដែរ កត់សម្គាល់ឃើញថាលោកនៅតែរំលឹកទស្សនិកជនអោយទទួលបានស្ទាយល៍ និងរសជាតិរបស់លោកសារជាថ្មីបន្ទាប់ពីបែកគ្នាអស់រយៈពេលប្រហែលជិតកន្លះឆ្នាំ។ នៅក្នុងបទថ្មីរបស់លោក 4T5 ផងដែរ មិនទាន់ចេញជាផ្លូវការនៅឡើយ ទេ ត្រឹមតែជា Teaser highlight ចំរៀងខ្លីៗ និងសកម្មភាពថតដែលលោកបានបង្ហោះឡើងនៅលើ Story ក៏ដូចជានៅលើឆាណែល Telegram តែប៉ុណ្ណោះ។ 

ប៉ុន្តែក៏គួរអោយកត់សម្គាល់ផងដែរថា បទចម្រៀងនេះមានរសជាតិប្លែកខ្លាំងណាស់ ហាក់ដូចជាពិពណ៌នាពីអារម្មណ៍ចាស់ៗកាលពីមុនដែលលោកមានកាលរស់នៅភូមិស្រុកកំណើត។ គួរបញ្ជាក់ផងដែរថា បទនេះមានចំណងជើងថា«Phum II» និងត្រូវបានបង្ហោះឡើងកាលពីថ្ងៃទី០៧ ខែវិច្ឆិកាកន្លងទៅនេះ។ក្រោយបានស្តាប់ Teaser ប្រហែល១០វិនាទីនេះ ធ្វើអោយអ្នកស្តាប់ទទួលបានអារម្មណ៍ហាក់ដូចជានឹកអាឡោះអាល័យដល់កុមារភាពរបស់ពួកគេគឺជ្រួតជ្រាបប៉ះដល់បេះដូងតែម្តង នេះក៏ធ្វើអោយទស្សនិកនឹកឃើញឡើងវិញដល់ស្ទាយល៍ចាស់របស់លោក 4T5 ដែលជាអត្តសញ្ញាណសម្រាប់លោកនោះគឺភាពស្មោះត្រង់នឹងអារម្មណ៍ខ្លួនឯង។ 

បទចម្រៀងរបស់លោក ​​​4T5 បាននាំអារម្មណ៍ទស្សនិកជនខិតជិតទៅដល់បេះដូងរបស់ពួកគេផងដែរ ខណៈពេលដែលមនុស្សគ្រប់គ្នារវល់និងស្ទើរតែភ្លេចនូវកុមារភាពរបស់ពួកគេទៅហើយ។ ចុះទស្សនិកជនយល់ឃើញយ៉ាងណាដែរសម្រាប់បទចម្រៀងមួយនេះ? យ៉ាងណាមិញផងដែរ គួររំលឹកថាលោក 4T5 បានជ្រើសរើសដើរលើផ្លូវជាសិល្បករឯករាជ្យដោយចាកចេញពីផលិតកម្ម CG Movement ប៉ុន្តែសង្កេតឃើញថាលោកនៅតែមានទំនាក់ទំនងល្អជាមួយផលិតកម្ម ក៏ដូចជា Rapper ផ្សេងទៀតដែលនៅក្នុងផលិតកម្មដោយតាមរយៈឃើញពីការបង្ហាញការគាំទ្រគ្នាទៅមក។