ហ្សាកាតា- អគ្គីភ័យបានឆាបឆេះអគារពន្ធនាគារមួយដែលមានអ្នកទោសដ៏ច្រើនកុះករនាវេលាទៀបភ្លឺថ្ងៃពុធ នៅពេលដែលអ្នកទោសកំពុងដេកលក់យ៉ាងស្កប់ស្កល់ បានធ្វើឲ្យមនុស្ស41នាក់ស្លាប់និងរងរបួសជាច្រើននាក់ទៀត បើតាមសេចក្តីរាយការណ៍របស់មន្រ្តីពន្ធនាគារ។ភ្លើងបានឆាបឆេះនៅក្នុងខេត្ត បានតិន ចាប់តាំងពីម៉ោង១រហូតដល់ម៉ោង២ទៀបភ្លឹនៅក្នុងពន្ធនាគារ តាំងហ្គេរ៉ាំង អគារC ដែលពោរពេញទៅដោយអ្នកទោសគ្រឿងញៀន ហើយត្រូវបានគេពន្លត់បានទាំងស្រុងនៅវេលាម៉ោង៣ទៀបភ្លឹថ្ងៃដដែល។

តាមរយះកញ្ចក់ទូរទស្សន៍ គេបានឃើញអណ្តាតភ្លើងឆេះយ៉ាងសន្ធោរសន្ធៅនឹងមានផ្សែងខ្មួលខ្មាញ់ឡើងទៅលើចេញពីដំបូលអគារ ព្រមទាំងអ្នកពន្លត់អគ្គីភ័យកំពុងមមាញឹកក្នុងការពន្លត់ភ្លើង។អ្នកទោស41នាក់បានស្លាប់ 8នាក់រងរបួសធ្ងន់ និង70នាក់ទៀតរងរបួសស្រាល។

អាជ្ញាធរកំពុងធ្វើការស៊ើបអង្កេតអំពីមូលហេតុនៃការឆាបឆេះពន្ធនាគារដែលស្ថិតខាងក្រៅទីក្រុង ហ្សាកាតារមួយនេះ ដែលគេមានការសង្ស័យទៅលើខ្សែរភ្លើងប៉ះគ្នា ។ពន្ធនាគារនេះមានអ្នក ទោសរហូតដល់ទៅជាង2,000នាក់ ដែលសមត្ថភាពរបស់វាអាចដាក់មនុស្សបានតែ600នាក់ប៉ុណ្ណោះ។