ម៉ាកយីហោអាមេរិក និងអឺរ៉ុបកំពុងរងការវាយប្រហារដោយការធ្វើពហិការនៅទូទាំងមជ្ឈិមបូព៌ា ដោយអ្នកប្រើប្រាស់ងាកទៅរកជម្រើសក្នុងស្រុក ក្នុងការតវ៉ាប្រឆាំងនឹងការគាំទ្ររបស់រដ្ឋាភិបាលលោកខាងលិចចំពោះអ៊ីស្រាអែលនៅខណៈពេលមានសង្រ្គាមនៅតំបន់ហ្គាហ្សា។
-
អាមេរិកកំពុងបញ្ជូនអាវុធដល់អ៊ីស្រាអែលស្ងាត់ៗ
យោងតាមសារព័ត៌មាន Bloomberg ចុះផ្សាយថ្ងៃទី15 ខែវិច្ឆិកាបានអោយដឹងថា មន្ទីរបញ្ចកោណបានបង្កើនជំនួយយោធាដល់អ៊ីស្រាអែលដោយស្ងាត់ៗដោយផ្តល់តាមសំណើដែលរួមមានកាំជ្រួចដឹកនាំដោយឡាស៊ែរបន្ថែមទៀតសម្រាប់កងនាវាកាំភ្លើង Apache ក៏ដូចជាគ្រាប់ផ្លោង 155មីលីម៉ែត្រ ឧបករណ៍មើលពេលយប់ គ្រាប់បែកបង្កប់ក្នុងលេនដ្ឋាន និងរថក្រោះកងទ័ពថ្មីនេះបើយោងតាមក្រសួងការពារជាតិ។
ការផ្តល់អាវុធទៅកាន់ប្រទេសអ៊ីស្រាអែលកំពុងកើនឡើងហួសពីការរំពឹងទុកត្រឹមឧករណ៍ស្ទាក់ចាប់មីស៊ីល Iron Dome និងគ្រាប់បែកឆ្លាតវៃ Boeing Co. ។ វាមានការកើនឡើងបើទោះបីជាមន្ត្រីរដ្ឋបាលលោក Biden ព្រមានអ៊ីស្រាអែលកាន់តែខ្លាំងឡើងអំពីការគប្បីបញ្ចៀសការស្លាប់ជនស៊ីវិលនៅតំបន់ហ្គាហ្សាស្ទ្រីប។
-
កងកម្លាំងអាមេរិកត្រូវបានវាយប្រហារយ៉ាងហោចណាស់ 4ដងពីស៊ីរី
យោងតាមសារព័ត៌មាន CNN ចុះផ្សាយថ្ងៃទី13 ខែវិច្ឆិកាបានអោយដឹងថា កងកម្លាំងអាមេរិកបានរងការវាយប្រហារយ៉ាងហោចណាស់បួនដងថែមទៀតដោយកងកម្លាំងគាំទ្រដោយអ៊ីរ៉ង់នៅក្នុងប្រទេសស៊ីរីបន្ទាប់ពីយោធាអាមេរិកបានធ្វើការវាយប្រហារតាមអាកាសទៅលើគោលដៅដែលពាក់ព័ន្ធជាមួយកងឆ្មាំបដិវត្តន៍អ៊ីស្លាមរបស់អ៊ីរ៉ង់កាលពីថ្ងៃអាទិត្យនេះបើតាមមន្ត្រីអាមេរិកម្នាក់បានប្រាប់ CNN ។
ការវាយប្រហារទាំងបួនលើកបានកើតឡើងបន្ទាប់ពីសហរដ្ឋអាមេរិកបានវាយប្រហារទីកន្លែងហ្វឹកហាត់និងផ្ទះសុវត្ថិភាពមួយកាលពីថ្ងៃអាទិត្យនៅជិតទីក្រុង Abu Kamal និង Mayadin រៀងខ្លួន។ នៅពេលនេះមន្ទីរបញ្ចកោណមិនទាន់បានតាមដានការរងរបួសឬការខូចខាតណាមួយពីការវាយប្រហារចុងក្រោយទាំងបួននេះទេ។
រដ្ឋមន្ត្រីការពារជាតិលោក Lloyd Austin បាននិយាយអំពីការវាយប្រហាររបស់សហរដ្ឋអាមេរិកកាលពីថ្ងៃអាទិត្យថា"ប្រធានាធិបតីមិនមានអាទិភាពខ្ពស់ជាងការការពារសុវត្ថិភាពរបស់កងទ័ពអាមេរិកនោះទេ សហរដ្ឋអាមេរិកនឹងការពារខ្លួន បុគ្គលិករបស់ខ្លួន និងផលប្រយោជន៍របស់ខ្លួន" ។
-
មជ្ឈិមបូព៌ាធ្វើពហិការប្រឆាំងលោកខាងលិច
យោងតាមសារព័ត៌មាន Telegraph ចុះផ្សាយថ្ងៃទី12 ខែវិច្ឆិកាបានអោយដឹងថា ម៉ាកយីហោអាមេរិកនិងអឺរ៉ុបកំពុងរងការវាយប្រហារដោយការធ្វើពហិការនៅទូទាំងមជ្ឈិមបូព៌ាដោយអ្នកប្រើប្រាស់ងាកទៅរកជម្រើសក្នុងស្រុកក្នុងការតវ៉ាប្រឆាំងនឹងការគាំទ្ររបស់រដ្ឋាភិបាលលោកខាងលិចចំពោះអ៊ីស្រាអែល នៅខណៈពេលមានសង្រ្គាមនៅតំបន់ហ្គាហ្សា។
ម៉ាកល្បីៗមួយចំនួនរបស់អាមេរិក រួមមាន McDonalds, Starbucks, Coca-Cola និង Domino's Pizza ត្រូវបានជាគោលដៅកំណត់ការវាយប្រហារដោយយុទ្ធនាការធ្វើពហិការរួមជាមួយនឹងម៉ាក Puma របស់ប្រទេសអាល្លឺម៉ង់ និងCarrefour របស់បារាំង។
ចាប់ពីសប្តាហ៍នេះអ្នកនយោបាយទួរគីប្រហែលជានឹងលែងស្រេកឃ្លានជាមួយកូកា-កូឡា ឬញ៉ាំអាហារសម្រន់ Nestlé ផលិតនៅប្រទេសស្វីសទៀតហើយ ដោយសារម៉ាកយីហោលោកខាងលិចត្រូវបានដកចេញពីអគារសភា។
