ម្ចាស់បទ«Noob»​​​ កំពុងផ្ទុះខ្លាំង លោក 1NE បានចេញផ្សាយបទចម្រៀងថ្មីមួយទៀតកាលពីថ្ងៃទី០១ ខែធ្នូកន្លងទៅនេះ ដែលមានចំណងជើងថា«អួត» រឺហៅម្យ៉ាងទៀតថា«SMOKE GANG» ដែលជាបទប្រើប្រាស់សម្រាប់នៅក្នុងហ្គេម GTA តំណាងអោយក្រុម Smoke Gang ដែលនៅក្នុងនោះ។ 

កាលពីថ្មីៗនេះផងដែរ លោក​​​1NE ក៏ទើបតែបានចូលរួមជាមួយនឹងកម្មវិធី «អ្នកជិតខាង» នៅស្ថានីយ៍ទូរទស្សន៍ប៉ុស្តិ៍ PNN និងមានសកម្មភាពសម្តែងនៅក្នុងក្លឹបកំសាន្តពេលរាត្រីជាច្រើនដែលកាន់តែបង្ហាញអោយឃើញថាប្រជាប្រិយភាពរបស់លោកគឺកាន់់តែលោតផ្លោះបន្ទាប់ពីលោកបានចេញផ្សាយ និងធ្វើអោយកក្រើកឡើងជាមួយនឹងបទ«Noob» រឺហៅថា«អន់» របស់លោក។ ជាក់ស្តែងនៅក្នុងវិដេអូសម្ភាន៍របស់លោកនៅក្នុងកម្មវិធី«អ្នកជិតខាង» មានចំនួនទស្សនារហូតដល់1.1លាន View ឯណោះ។ 

បើនិយាយពី Color នៃបទចម្រៀងរបស់លោកពីមួយបទទៅមួយបទវិញ កត់សម្គាល់ឃើញថាមានភាពស៊ីសង្វាក់គ្នាល្អ ដែលបង្ហាញពីតំលៃរួមមួយនៃសមត្ថភាពរបស់លោកក្នុងការរំលេចចេញនូវភាពមានមោទនភាព និងកិត្តិយសសម្រាប់ខ្លួនឯងក្នុងនាមជាបុគ្គលម្នាក់។ គួររំលឹកផងដែរថា កាលពីនៅក្នុងកម្មវិធី«អ្នកជិតខាង» លោក 1NE ក៏បានបកស្រាយទាក់ទងនឹងអត្ថន័យប៉ារ៉ូលចំរៀងដ៏ល្បីរបស់លោកមួយឃ្លាថា«គ្នាខ្ញុំតិចតែតាន់» ដូចគ្នា ដោយលោកបានលើកឡើងថាលោកចង់សំដៅដោយភាពសាមគ្គីភាព និងស្មារតីតែមួយ ថ្វីបើយើងមានគ្នាតិច តែកំលាំងរួបរួមរបស់យើងនឹងអាចបុកចូលបានខ្លាំង។

ចំណែកកាលពីពេលថ្មីៗនេះ លោកក៏បានចូលរួមសម្តែងជាកិត្តិយសនៅក្នុងព្រឹត្តិការណ៍ជើងឯកថ្នាក់ជាតិកីឡាអេឡិចត្រូនិកផងដែរនូវបទ«Fight For Nation» សម្រាប់នៅក្នុងវិញ្ញាសា Mobile Legends: Bang Bang។ ចុះតើទស្សនិកជនពេញចិត្តបទថ្មីរបស់លោក 1NE កម្រិតណា?