ខានបានស្គាល់រសជាតិផ្តឺសង្សារចាស់ពីតារារ៉េបយូរហើយ!ដូចជាបទ«កុលាបខ្មៅ» រឺ«ចំរៀងជូនEx» របស់លោកវណ្ណដា មានអីលោក 1NE បានចេញបទថ្មីរំលឹកនូវរសជាតិទាំងនេះឡើងវិញក្រោមទំនុកស្ទាយល៍របស់លោកដែលមានចំណងជើងថា«D.O.B Happy Birthday»។ មិនត្រឹមតែរសជាតិនិងស្ទាយល៍ច្រៀងប្លែកប៉ុណ្ណោះទេ តាមរយៈបទចម្រៀងនេះផងដែរ លោក 1NE ក៏បានផ្តល់កិត្តិយសអោយមិត្តស្រីរបស់លោកចូលរួមច្រៀង និងសម្តែង ដោយកញ្ញាត្រូវបានស្គាល់ឡើងដោយឈ្មោះថា Dydy។ នេះគឺត្រូវរាប់បានថាជាបទចម្រៀងរសជាតិថ្មីមួយទៀតហើយពីតារារ៉េបក្នុងស្រុក1NE របស់យើង បន្ទាប់ពីបទផ្ទុះល្បីៗរបស់លោកជាច្រើនបទត្រូវបានទំលាក់ដូចជា «2k24» «អន់ Noob» «អួត Smoke gang» និងរួមទាំងបទ«ខ្ញុំអញ្ចឹង I'm like this» ជាដើម។
សង្កេតឃើញថាប្រជាប្រិយរបស់លោក 1NE បានកើនឡើងជាគំហុករាប់ចាប់តាំងពីបទ«ច្បារអំពៅBoy» មក។ ដោយលោកមិនត្រឹមតែធ្វើអោយគេគ្រប់គ្នាស្គាល់ថាលោកជាសិល្បករមួយរូបរបស់ផលិតកម្ម CG Movement ប៉ុណ្ណោះទេ តែក៏បានធ្វើអោយគេចាប់អារម្មណ៍លោកក្នុងនាមជាតារារ៉េបមួយរូបដែលមានឈ្មោះថា 1NE ជាមួយនឹងភាពលេចធ្លោរបស់លោក។ ស្របពេលដើរទន្ទឹមគ្នានឹងការផលិតបទចម្រៀងនៅក្នុងផលិតកម្ម លោក 1NE ក៏បានបញ្ចេញបទចម្រៀងផ្ទាល់ខ្លួនបង្ហោះឡើងនៅលើឆាណែលយូធូបដាច់ដោយឡែករបស់លោក រួមទាំងគ្រប់គ្រងនូវក្រុមដែលលោកបង្កើតនិងដឹកនាំដោយខ្លួនឯងផ្ទាល់មានឈ្មោះថា«Go Squad»ផងដែរ។ គួរបញ្ជាក់ផងដែរថា ពិតដូចជាបទចម្រៀងនេះ បទ«D.O.B Happy birthday» ត្រូវបានទំលាក់ឡើងនៅក្នុងថ្ងៃខួបកំណើតរបស់លោកតែម្តងនៅថ្ងៃទី28 ខែមិថុនា។ តើទស្សនិកជនពេញចិត្តនូវបទរសជាតិថ្មីនេះខ្លាំងកម្រិតណា?
