កូវីដ-19 បានធ្វើឱ្យផែនការធ្វើដំណើររបស់ប្រជាជនចិនរាប់លាននាក់ ថយចុះក្នុងឱកាសបុណ្យចូលឆ្នាំថ្មី សម្រាប់រយៈពេលបីឆ្នាំជាប់គ្នា។ មុនជំងឺរាតត្បាត ការប្រារព្ធពិធីនេះនឹងឃើញការធ្វើដំណើរចំនួន 3 ពាន់លាន ដែលបានធ្វើឡើងនៅទូទាំងប្រទេសចិន និងជាការធ្វើចំណាកស្រុកប្រចាំឆ្នាំដ៏ធំបំផុតរបស់ពិភពលោក។ ប៉ុន្តែការផ្ទុះនៃមេរោគឡើងវិញបានបង្ខំមនុស្សជាច្រើនឱ្យលុបចោលផែនការរបស់ពួកគេ។

មន្ត្រីចិន - នៅតែបន្តអនុវត្តយុទ្ធសាស្រ្តគ្មានករណីឆ្លង - បានអនុវត្តវិធានការតឹងរ៉ឹង មុនពេលកីឡាអូឡាំពិករដូវរងាឆ្នាំ 2022 ចាប់ផ្តើម។ បុណ្យចូលឆ្នាំថ្មី - ត្រូវបានគេស្គាល់ផងដែរថាជាពិធីបុណ្យនិទាឃរដូវនៅក្នុងប្រទេសចិន - ចាប់ផ្តើមនៅថ្ងៃទី 1 ខែកុម្ភៈ ឆ្នាំនេះ។ វាត្រូវបានគេចាត់ទុកយ៉ាងទូលំទូលាយថា ជាពេលវេលាដ៏សំខាន់បំផុតក្នុងការចំណាយពេលជាមួយក្រុមគ្រួសារ, មនុស្សរាប់រយលាននាក់ដែលបានប្រកបរបរចិញ្ចឹមជីវិតនៅក្នុងទីក្រុងបានធ្វើដំណើរត្រឡប់ទៅស្រុកកំណើតរបស់ពួកគេ ដើម្បីប្រារព្ធពិធីបុណ្យជាមួយគ្នា។

ក្រសួងដឹកជញ្ជូនចិនបានប៉ាន់ប្រមាណថា ការធ្វើដំណើរចំនួន 1.18 ពាន់លាននឹងត្រូវធ្វើឡើងនៅឆ្នាំនេះ។ ខណៈពេលដែលតួលេខនៅតែឆ្ងាយពីតួលេខមុនការរាតត្បាត, នៅតែមានការព្រួយបារម្ភថា វាអាចប្រែទៅជាព្រឹត្តិការណ៍រីករាលដាលខ្លាំង។ ពលរដ្ឋចិនត្រូវបានដាក់ឱ្យស្ថិតក្រោមការឃ្លាំមើលរបស់រដ្ឋាភិបាលយ៉ាងតឹងរ៉ឹងដោយមានប្រព័ន្ធកូដពណ៌កំណត់ថា តើពួកគេអាចធ្វើដំណើរបានឬអត់។ ពួកគេតម្រូវឱ្យបង្ហាញលេខកូដសុខភាពពណ៌បៃតងនៅលើទូរស័ព្ទរបស់ពួកគេ ដែលបង្ហាញថាពួកគេមិនបានស្ថិតនៅក្នុងតំបន់ដែលមានមេរោគកូវីត-19 មុនពេលឡើងជិះរថយន្តដឹកជញ្ជូនសាធារណៈ និងឆ្លងកាត់ចំណុចផ្លូវហាយវេ។

ការទទូចរបស់ប្រទេសចិនក្នុងការបន្តគោលនយោបាយលុបបំបាត់មេរោគ បានឃើញក្រុមមន្ត្រីអនុវត្តការធ្វើតេស្តទ្រង់ទ្រាយធំ និងដាក់ការបិទខ្ទប់ភ្លាមៗដែលប៉ះពាល់ដល់មនុស្សរាប់លាននាក់ក្នុងការឆ្លើយតបទៅនឹងការផ្ទុះឡើងជាបន្តបន្ទាប់នៅទូទាំងប្រទេស។ ព្រឹត្តិការណ៍កីឡាអូឡាំពិករដូវរងា ដែលគ្រោងនឹងចាប់ផ្តើមនៅថ្ងៃដំបូងនៃពិធីបុណ្យនិទាឃរដូវ បានដាក់សម្ពាធកាន់តែខ្លាំងលើមន្ត្រីក្នុងតំបន់ ដែលបានបិទសាលាក្រុង និងទីក្រុងទាំងមូល ដើម្បីប្រយុទ្ធប្រឆាំងនឹងការរីករាលដាលនៃមេរោគនេះ។

វិធានការត្រូវបានជួបនឹងការខកចិត្តជាពិសេស ពលករចំណាកស្រុកនៅតែរងគ្រោះខ្លាំងជាងគេ ដោយសារពិធីបុណ្យនិទាឃរដូវតំណាងឱ្យថ្ងៃដ៏មានតម្លៃបំផុតក្នុងមួយឆ្នាំ ដែលពួកគេអាចត្រឡប់ទៅជួបមនុស្សជាទីស្រលាញ់របស់ពួកគេនៅឯផ្ទះ។ អ្នកប្រើប្រាស់នៅលើប្រព័ន្ធផ្សព្វផ្សាយសង្គមចិន Weibo បានសរសេរថា ពលករចំណាកស្រុកដែលខំប្រឹងទាំងយប់ទាំងថ្ងៃ រស់នៅឆ្ងាយផ្ទះ ត្រឡប់មកស្រុកកំណើតជួបជុំគ្រួសារវិញក្នុងឱកាសបុណ្យប្រចាំឆ្នាំត្រឹមតែប៉ុន្មានថ្ងៃប៉ុណ្ណោះ តើខុសឬ?

អត្ថបទដកស្រង់ពី BBC
បកប្រែនិងកែសម្រួលដោយ Mr. Blue