គ្រាប់មីនគឺឧបករណ៍គ្រឿងផ្ទុះដែលកប់ក្នុង ឬនៅលើដី ដែលមានន័យថានឹងអាចផ្ទុះឡើងនៅខណៈពេលមួយណាក៏បាន ដែលមានការបង្កឡើងនូវសម្ពាធ ដូចជានៅខណៈពេលមាននរណាម្នាក់ដើរលើវា ឬរថយន្តបើកកាត់វា។ យោងតាមមន្ត្រីអ៊ុយក្រែន នៅតំបន់ខ្លះនៃប្រទេសរុស្ស៊ី បានដាក់មីនរហូតទៅដល់ចំនួនប្រាំឯណោះនៅក្នុងមួយម៉ែត្រការ៉េ និងខ្លះទៀតក៏ត្រូវបានកប់ឡើងនៅក្នុងស្រទាប់ខុសៗគ្នា ធ្វើអោយវាមានការពិបាកក្នុងការដោះ និងបណ្តាលអោយផ្ទៃដីរបស់ប្រទេសនេះពោរពេញដោយមីន។ យោងតាមព័ត៌មានដែលអាចរកបាន ប្រទេសរុស្ស៊ីបានប្រើប្រាស់នូវមីនចំនួនពីរប្រភេទសំខាន់ៗ ដែលក្នុងនោះគឺជាគ្រាប់មីនប្រឆាំងរថក្រោះ និងគ្រាប់មីនប្រឆាំងមនុស្ស។ មីនប្រឆាំងរថក្រោះត្រូវបានរចនាឡើងដើម្បីកំណត់គោលដៅលើរថយន្តជាពិសេសគឺរថក្រោះដោយបំផ្លាញតួរបស់វាជាដើម។ ប្រភេទមីនទាំងនេះគឺមានទំហំធំជាងមីនប្រឆាំងមនុស្ស ហើយជាធម្មតាត្រូវបានកប់ឡើងនៅក្រោមដី។ ពួកវាអាចផ្ទុះឡើងដោយសារទម្ងន់នៃយានយន្តដែលឆ្លងកាត់លើពួកវា ដែលបណ្តាលឱ្យមានការផ្ទុះ និងបំផ្លាញលើយានយន្តនោះ។ ក្នុងចំណោមមីនប្រឆាំងរថក្រោះរបស់រុស្ស៊ី គឺមានមីន tm62 ដែលត្រូវបានបំផ្ទុះឡើងនៅពេលដែលមានរថយន្តបើកឆ្លងកាត់វា ដែលបណ្តាលឱ្យមានការខូចខាតយ៉ាងធ្ងន់ធ្ងរចំពោះរថក្រោះតាមរយៈការបំផ្លាញផ្លូវកង់របស់វា រឺជ្រៀតចូលទៅក្នុងពាសដែករបស់វា។
មីនដែលគួរឱ្យកត់សម្គាល់មួយទៀតគឺមីន PT k1r ដែលជាមីនប្រឆាំងរថក្រោះទំនើបបំផុតនៅក្នុងឃ្លាំងអាវុធរបស់រុស្ស៊ី ដោយវាប្រើនូវឧបករណ៍Sensorដើម្បីចាប់សញ្ញារកឃើញ និងបញ្ចេញគ្រាប់រំសេវទៅលើយានជំនិះ។ មីននេះអាចរកឃើញគោលដៅតាមរយៈសំឡេង និងរំញ័រ បន្ទាប់មកក៏កំណត់គោលដៅលើដំបូលយានយន្តជាមួយនឹងក្បាលគ្រាប់ទម្ងន់ ២,៨ គីឡូក្រាម។ លើសពីនេះ កងកម្លាំងរុស្ស៊ីក៏បានដាក់ពង្រាយនូវគ្រាប់មីនប្រឆាំងមនុស្សយ៉ាងហោចណាស់ 13 ប្រភេទផ្សេងៗគ្នាចាប់តាំងពីខែកុម្ភៈ ឆ្នាំ២០២២មក នៅក្នុងនោះក៏រួមមាន គ្រាប់មីនផ្ទុះដូចជា PMn2 និង pmn4 ដែលត្រូវបានរចនាឡើងដើម្បីបណ្តាលឱ្យទាហានរបស់សត្រូវរបួសធ្ងន់ធ្ងរ ឬបណ្តាលអោយស្លាប់។ មីនទាំងនេះជាធម្មតាធ្វើអោយផ្ទុះឡើងដោយសម្ពាធពីបន្ទះដែក និងអាចបណ្តាលមកពីអន្ទាក់ខ្សែលួស រឺមេកានិចបំផ្លាញខ្លួនឯងផ្សេងៗផងដែរ។ កងកម្លាំងរុស្ស៊ីក៏បានប្រើប្រាស់នូវមីនដែលអាចគប់បានដូចជា oz72 ដែលអាចធ្វើអោយដំណើរការបានដោយអន្ទាក់ខ្សែលួស រឺមេកានិចបំផ្លាញខ្លួនឯង ដែលធ្វើអោយបញ្ចេញគ្រាប់បែកដែករឺកញ្ចក់ទៅកាន់ទិសដៅផ្សេងៗជាច្រើន និងបណ្តាលឱ្យរងរបួសរហូតទៅដល់ចម្ងាយ 660 ហ្វីតឯណោះ។ ការប្រើប្រាស់គ្រាប់មីនយ៉ាងទូលំទូលាយដោយកងទ័ពរុស្ស៊ី បានផ្លាស់ប្តូរសង្រ្គាម ធ្វើអោយទាហានអ៊ុយក្រែនបានកែសម្រួលនូវយុទ្ធសាស្ត្រ និងតាក់តិចរបស់ពួកគេដើម្បីជម្នះនឹងឧបសគ្គដ៏គ្រោះថ្នាក់នេះ។
