កាលពីពេលថ្មីៗនេះ មហាជនមួយចំនួនបានធ្វើការផ្គូផ្គងប្រៀបធៀបបទថ្មីរបស់លោកវណ្ណដារួមគ្នានឹងលោកវណ្ណថាន«មិនអាចវិលវិញ» ទៅនឹងបទមួយរបស់លោកជីដេវីតដែលមានចំណងជើងថា«គាំងចិត្ត» ដែលបានចេញផ្សាយកាលពីរយៈពេលមួយខែមុន។ គួររំលឹកផងថា កាលពីថ្ងៃទី១៥ ខែមីនាកន្លងទៅនេះ បន្ទាប់ពីម្ចាស់បទកំលោះស្រុកខ្មែរទាំងពីររូបបានត្រលប់មកចាប់ដៃគ្នាសាជាថ្មី និងទម្លាក់បទថ្មីមួយនេះរបស់ពួកគេភ្លាម ស្រាប់តែមានសន្ទុះការគាំទ្រ និងចូលទស្សនាជាច្រើន ដោយ Concept មួយបទគឺហាក់បានលាយបញ្ចូលគ្នានៃតន្រ្តីសម័យទំនើប និងសម័យសង្គមរាស្រ្តនិយមយ៉ាងគួរអោយចាប់អារម្មណ៍។ ដោយបើកក្បាលឡើងជាមួយនឹងបទមរតកសំណៀងដើម«ចំរៀងសោកា»ផងដែរ ដែលបន្ទាប់មកក៏បន្តដោយលោកវណ្ណថាន និងលោកវណ្ណដាច្រៀងទួញសោកសាសងគ្នាបញ្ចូលមនោសញ្ចេតនារបស់ពួកលោកតបទៅកាន់នៃបទចម្រៀងមួួយនោះ។
យ៉ាងណាមិញ ទន្ទឹមនឹងមានការគាំទ្រយ៉ាងខ្លាំងក្លា ក៏មានបណ្តាទស្សនិកជនមួយចំនួនបានចាប់ផ្តើមធ្វើការផ្គូផ្គង និងដុតអាយដលរបស់ពួកគេលេង ដោយថា Concept បទចម្រៀងនេះរបស់ពួកគេគឺដូចគ្នាទៅនឹងបទ«គាំងចិត្ត» របស់លោកជីដេវីត ដែលត្រូវបានច្រៀងឡើងនៅខាងមុខឆាកដែលមានផ្ទាំងវាំងននក្រហមពីក្រោយផងដែរ។ ដូចជាខមមិនរបស់ Page Troll ដ៏ល្បី អាក្លូ បានសរសេរឡើងថា«គាំងចិត្តណាស់ប្តី» ចំណែកផេក អាកច់ដៃគូរបស់អាក្លូ ក៏បានខមមែនតបវិញថា«Copy MV គាំងចិត្តរបស់ Idol អញ G-Devith។ បកទៅលើការបញ្ចេញមតិឡើងបែបនេះ ក៏មានទស្សនិកជនខ្លះទៀតក៏បានបកស្រាយឡើងថា Concept បែបនេះគឺមានឡើងតាំងពីបទ«ជួបលែងឃ្លាត» របស់ថេណាមកម្ល៉េះ។ ខណៈអ្នកខ្លះទៀតក៏បានលើកពីបទ«ស្រាមួយកែវ» របស់ La Cima Cartel ថែមទៀត និងសូម្បីតែបទ«គេភ្លេចអស់ហើយ» របស់លោកលីម តិចម៉េង។ ប៉ុន្តែក៏មានខ្លះទៀតបាននិយាយឡើងថា ខុសហើយការពិតនេះគឺគ្រាន់តែរបៀប Marketing របស់លោកជីដេវីតសហការជាមួយនឹងលោកវណ្ណដាតែប៉ុណ្ណោះ។
