រដ្ឋសភានៃព្រះរាជាណាចក្រកម្ពុជា នៅថ្ងៃសុក្រ ទី១ ខែមីនា ឆ្នាំ២០២៤ នេះ បានបើកសម័យប្រជុំរដ្ឋសភាជាវិសាមញ្ញ នីតិកាលទី៧ ក្រោមអធិបតីភាពដ៏ខ្ពង់ខ្ពស់ សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា។
សម័យប្រជុំរដ្ឋសភាជាវិសាមញ្ញ នីតិកាលទី៧ នាថ្ងៃនេះ មានរបៀបវារៈចំនួន៣គឺ៖ ទី១-ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ចំនួន២រូប ដោយរដ្ឋសភា នីតិកាលទី៧ , ទី២- សេចក្តីព្រាងច្បាប់ស្តីពី ការអនុម័តយល់ព្រមលើពិធីសារសម្រាប់ធ្វើវិសោធនកម្មកិច្ចព្រមព្រៀង ម៉ារ៉ាកេស ស្តីពីការបង្កើតអង្គការពាណិជ្ជកម្មពិភពលោក ដើម្បីបញ្ចូលកិច្ចព្រមព្រៀងស្តីពីការឧបត្ថម្ភធនជលផល និងទី៣- សេចក្តីព្រាងច្បាប់ស្តីពី ការដឹកជញ្ជូនតាមផ្លូវទឹក។
តាមលទ្ធផលនៃកិច្ចប្រជុំបានបញ្ជាក់ថា មន្រ្តីចំនួន២រូបដែលត្រូវបានបោះឆ្នោតជ្រើសតាំងជាសមាជិកព្រឹទ្ធសភានោះគឺទី១, ឯកឧត្តម សុខ ឥសាន និងឯកឧត្តម ហេង ហាលីម។
គួររំលឹកថា សមាជិកព្រឹទ្ធសភា សម្រាប់នីតិកាលទី៥នេះ មានចំនួន៦២រូប។ ក្នុងនោះសមាជិក២រូប ត្រូវបានចាត់តាំងដោយព្រះមហាក្សត្រ និងសមាជិក២រូបទៀត ត្រូវបានជ្រើសតាំងដោយរដ្ឋសភា តាមមតិភាគច្រើន ហើយ៥៨រូប ជ្រើសរើសតាមការបោះឆ្នោត។
សូមបញ្ជាក់ថា ព្រះរាជាណាចក្រកម្ពុជា បានរៀបចំការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ កាលពីថ្ងៃអាទិត្យ ទី២៥ ខែកុម្ភៈ ឆ្នាំ២០២៤ ដោយមានគណបក្សចំនួន៤ ចូលរួមប្រកួតប្រជែង គឺគណបក្សប្រជាជនកម្ពុជា, គណបក្សហ្វ៊ុនស៊ិនប៉ិច, គណបក្សកម្លាំងជាតិ និងគណបក្សឆន្ទៈខ្មែរ។ ហើយតាមលទ្ធផលបឋមបង្ហាញថា គណបក្សប្រជាជនកម្ពុជា ដែលកំពុងដឹកនាំប្រទេស ទទួលបានសំឡេងគាំទ្រយ៉ាងច្រើនលើសលប់ រហូត៥៥អាសនៈ គណបក្សឆន្ទៈខ្មែរ ទទួលបានចំនួន៣អាសនៈ។ ចំណែកគណបក្សហ៊្វុនស៊ិនប៉ិច និងគណបក្សកម្លាំងជាតិ មិនទទួលបានអាសនៈនោះទេ៕
