នៅព្រឹកថ្ងៃទី១៩ ខែកុម្ភៈ ឆ្នាំ២០២៤ នេះ គម្រោងសាងសង់ស្ពានឆ្លងទន្លេ ចាក់អង្រែក្រោម-ព្រែកប្រា ដែលមានតម្លៃប្រមាណ៦០លានដុល្លារ ចាប់ផ្តើមសម្ពោធបើកការដ្ឋានដំណើរការជាផ្លូវការហើយ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោក វ៉ាង វិនធៀន ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជា មានិតចិនប្រចាំកម្ពុជា។
តាមរបាយការណ៏បានឲ្យដឹងថា គម្រោងស្ថាបនាស្ពាននេះ មានតម្លៃប្រមាណ៦០លានដុល្លារអាមេរិក សាងសង់រយៈពេល៤២ខែ ដោយប្រើឥណទានសម្បទានពីមិត្តចិន មានទទឹង២៧ ម៉ែត្រ, ៤គន្លងរថយន្ត ,២កន្លងម៉ូតូ និង២គន្លងថ្មើរជើង។ ស្ពានដ៏សំខាន់នេះ កើតឡើងដោយការគិតគូរខ្ពស់របស់រាជរដ្ឋាភិបាល ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា តាមរយៈក្រសួងសាធារណការ និងដឹកជញ្ជូន។ ស្ពានឆ្លងទន្លេបាសាក់ ចាក់អង្រែក្រោម- ព្រែកប្រា មានប្រវែងសរុប១.៦៥០ ម៉ែត្រ (ប្រវែងស្ពាន៨៤៥,៧០ម៉ែត្រ, ទទឹងផ្លូវ២៧ម៉ែត្រ, ផ្លូវតភ្ជាប់ក្បាលស្ពានប្រវែង៨០៤,៣០ម៉ែត្រ, ទទឹងផ្លូវ២៧ម៉ែត្រ) សាងសង់ដោយក្រុមហ៊ុនសំណង់សៀងហៃ, ទីប្រឹក្សាគម្រោង ដោយក្រុមហ៊ុនក្វាងចូវវ៉ានអាន។
នៅពេលសាងសង់រួច ស្ពាននេះនឹងជួយ៖ ១-កាត់បន្ថយការកកស្ទះចរាចរណ៍លើស្ពានព្រះមុនីវង្សឆ្លងកាត់ទន្លេបាសាក់ ភ្ជាប់ផ្លូវជាតិលេខ១ នៅខណ្ឌច្បារអំពៅ។ ២- ជួយពង្រឹងដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិតេជោក្រុងតាខ្មៅ ជាពិសេសធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ។ ៣-កាត់បន្ថយការកកស្ទះចរាចរណ៍នៅតាមដងទន្លេបាសាក់ និងជួយពន្លឿនការអភិវឌ្ឍតំបន់នោះផងដែរ។
មានប្រសាសន៏នៅក្នុងពិធីនោះ សម្តេចមហាបវរធិបតី ហ៊ុន ម៉ាណែត បានលើកឡើងថា គោលដៅអភិវឌ្ឍន៍ហេដ្ឋារចនាសម្ព័ន្ធ នៅក្នុងប្រទេសកម្ពុជា គឺរាជរដ្ឋាភិបាល មិនមានការដកថយនោះឡើយ។ មានផ្លូវកាន់តែរឹងមាំ ក្តីសង្ឃឹមកាន់តែរឹងមាំ មានផ្លូវកាន់តែច្រើន ក្តីសង្ឃឹមក៏កាន់តែច្រើន។ សម្តេចបន្តថា ផ្លូវស្ពានដូចសរសៃឈាម នៅពេលសរសៃឈាមទៅដល់ណា ជួយចិញ្ចឹមសរីរាង្គនៅទីនោះ។ ចំណែកផ្លូវ គឺជួយសម្រួលក្នុងការធ្វើចរាចរណ៍ កាត់បន្ថយការចំណាយ និងផ្តល់ឱកាសឲ្យប្រជាពលរដ្ឋ អាចប្រកបរបបរកស៊ី ដឹកទំនិញលក់ដូរ ធ្វើអាជីវកម្ម ដើម្បីចិញ្ចឹមគ្រួសារ ក៏ដូចជាធ្វើពាណិជ្ជកម្មផ្សេងៗ។
បើតាមការបញ្ជាក់របស់សម្តេចធិបតី ហ៊ុន ម៉ាណែត បានឲ្យដឹងថា បច្ចុប្បន្នកម្ពុជា មានស្ពានឆ្លងកាត់ទន្លេចំនួន២៥ស្ពាន។ ក្នុងនោះ ស្ពានចំនួន១៩ ធ្វើរួចរាល់, ៣ស្ពានកំពុងសាងសង់ និង៣ស្ពានទៀត កំពុងសិក្សា ក្នុងនោះនឹងមាន ស្ពានវែងជាងគេ ប្រវែងជាង៣គីឡូម៉ែត្រ នៅខេត្តកំពង់ឆ្នាំងផងដែរ។ ដោយឡែក គម្រោងស្ពានពីផ្សារចាស់ទៅអរិយក្សត្រ ក៏កំពុងសិក្សាដែរ។
ទាក់ទងបញ្ហានេះ ក្រសួងសាធារណការបានឲ្យដឹងដែរថា ស្ពានឆ្លងកាត់ទន្លេបាសាក់ ចាក់អង្រែក្រោម-ព្រែកប្រា ដែលកំពុងបើកការដ្ឋានសាងសង់ គឺជាស្ពានទី១៦ ហើយ បើគិតក្នុងចំណោមស្ពានធំៗ ដែលបានសាងសង់ក្រោមឥណទានសម្បទានពីសាធារណរដ្ឋប្រជាមានិតចិន រួមមាន៖ ១. ស្ពានមិត្តភាពកម្ពុជា-ចិន (សេកុងស្ទឹងត្រែង) ២. ស្ពានមិត្តភាព កម្ពុជា-ចិន (ព្រែកក្ដាម) ៣. ស្ពានមិត្តភាពកម្ពុជា-ចិន(ព្រែកតាមាក់) ៤. ស្ពានមិត្តភាពកម្ពុជា-ចិន (ជ្រោយចង្វារទី២) ៥. ស្ពានមិត្តភាពកម្ពុជា-ចិន (មេគង្គស្ទឹងត្រែង) ៦. ស្ពានមិត្តភាពកម្ពុជា-ចិន (តាខ្មៅ) ៧. ស្ពានមិត្តភាពកម្ពុជា-ចិន (កោះធំ) ៨. ស្ពានអាកាសមិត្តភាពកម្ពុជា-ចិន (សែនសុខ) ៩. ស្ពានមិត្តភាពកម្ពុជា-ចិន (ស្ទឹងត្រង់-ក្រូចឆ្មារ) ១០. ស្ពានមិត្តភាពកម្ពុជា-ចិន (កោះអន្លង់ចិន) ១១. ស្ពានមិត្តភាពកម្ពុជា-ចិន (ឆ្លងកាត់ទន្លេមេគង្គក្រចេះ) ១២-១៥. ស្ពានរំលង ឬស្ពានអាកាសចំនួន៤កន្លែង (កាត់ពីលើផ្លូវជាតិលេខ៤ លេខ៣ លេខ២ និងលេខ២១) ដែលជាផ្នែកនៃគម្រោងផ្លូវក្រវាត់ក្រុងទីបី ១៦. ស្ពាន ឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា)៕