គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃនេះ បានអំពាវនាវឲ្យគណបក្សនយោបាយមួយ ដែលមិនមានបញ្ជីបេក្ខជនឈរឈ្មោះបោះឆ្នោត ត្រូវបញ្ឈប់សកម្មភាពគំរាមកំហែង សមាជិកក្រុមប្រឹក្សាឃុំ-សង្កាត់របស់ខ្លួន ជាអង្គបោះឆ្នោត ហើយបើមិនបញ្ឈប់ទេ គ.ជ.ប នឹងមានវិធានការតាមផ្លូវច្បាប់ តែយ៉ាងណា គ.ជ.ប មិនបានបង្ហាញឈ្មោះគណបក្សនយោបាយណាមួយនោះឡើយ។
សេចក្ដីថ្លែងការណ៍របស់ គ.ជ.ប នៅថ្ងៃទី១៥ ខែកុម្ភៈ នេះ បានលើកឡើងថា ការឃោសនាបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ មានរយៈពេល១៤ ថ្ងៃ ដោយចាប់ផ្តើមពីថ្ងៃទី១០ ដល់ថ្ងៃទី២៣ ខែកុម្ភៈ ឆ្នាំ២០២៤ ហើយរហូតមកដល់ពេលនេះ ការឃោសនា បានប្រព្រឹត្តទៅអស់រយៈពេល៥ថ្ងៃហើយ។ គណបក្សនយោបាយដែលបានដាក់បញ្ជីបេក្ខជនឈរឈ្មោះបោះឆ្នោត បានធ្វើសកម្មភាពឃោសនាបោះឆ្នោតដោយសេរី តាមកម្មវិធី និងលទ្ធភាពរៀងៗខ្លួន។ ចំណែកគណៈកម្មការរៀបចំការបោះឆ្នោត គ្រប់លំដាប់ថ្នាក់ រួមនឹងអាជ្ញាធរមានសមត្ថកិច្ច បានបង្កលក្ខណៈងាយស្រួល និងការពារសន្តិសុខ សុវត្ថិភាព ដល់គណបក្សនយោបាយ ដើម្បីធ្វើការឃោសនាបោះឆ្នោត ស្របតាមច្បាប់ បទបញ្ជា និងនីតិវិធី សម្រាប់ការបោះឆ្នោត។
ជាមួយគ្នានោះ គណៈកម្មាធិការជាតិរៀបចំការបោះឆ្នោត (គ.ជ.ប) បានកត់សម្គាល់ឃើញថា ក្នុងរយៈពេលនេះ មានគណបក្សនយោបាយមួយ ដែលគ្មានបញ្ជីបេក្ខជនឈរឈ្មោះបោះឆ្នោតបានធ្វើសកម្មភាពគំរាមកំហែង សមាជិកក្រុមប្រឹក្សាឃុំ សង្កាត់របស់ខ្លួន ជាអ្នកបោះឆ្នោត ឱ្យបោះឆ្នោតជូនគណបក្សនេះ ឬគណបក្សនោះ ដែលជាការរំលោភសិទ្ធិក្នុងការសម្រេចចិត្តរបស់អ្នកបោះឆ្នោត រំលោភការសម្ងាត់នៃការបោះឆ្នោត និងធ្វើឱ្យបាត់ទំនុកចិត្តលើការបោះឆ្នោត។
មាត្រា៧១ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដែលត្រូវយកមកអនុវត្តក្នុង ការបោះឆ្នោតជ្រើសតាំងសមាជិកព្រឹទ្ធសភា បានចែងថា ...គ្រប់គណបក្សនយោបាយ បេក្ខជន ឬអ្នកគាំទ្រទាំងអស់ មិនត្រូវធ្វើការគំរាមកំហែង បំភិតបំភ័យ និងលួងលោមឱ្យបុគ្គលផ្តិតមេដៃ ឬស្បថ ឬសន្យាបោះឆ្នោតឱ្យគណបក្សណាមួយឡើយ..."។
គណៈកម្មាធិការជាតរៀបចំការបោះឆ្នោត បានអំពាវនាវឱ្យគណបក្សនយោបាយ ដែលធ្វើ សកម្មភាពខុសច្បាប់ បញ្ឈប់ជាបន្ទាន់ ដើម្បីឱ្យការឃោសនាបោះឆ្នោតប្រព្រឹត្តទៅដោយរលូន ក៏ដូចជាការបោះឆ្នោតទទួលបានជោគជ័យ។ ករណីនៅតែប្រព្រឹត្តខុសច្បាប់ទៀត គណៈកម្មាធិការជាតិរៀបចំការបោះឆ្នោត នឹងចាត់វិធានការតាមផ្លូវច្បាប់ជាធរមាន។ បើតាម គ.ជ.ប ការរក្សាការសម្ងាត់ នៃការបោះឆ្នោត គឺជាគោលការណ៍នៃលទ្ធិប្រជាធិបតេយ្យ។
ចំពោះករណីនេះ បើទោះបីជាគណៈកម្មាធិការជាតិរៀបចំការបោះឆ្នោត (គ.ជ.ប) មិនបានបញ្ជាក់ចំឈ្មោះគណបក្សណាមួយក៏ដោយ តែគេអាចសន្និដ្ឋានបានថា គណបក្សនោះ គឺគណបក្សភ្លើងទៀន ដែលគណបក្សនេះ សមាជិក សមាជិកា មានតំណែងជាក្រុមប្រឹក្សាឃុំ សង្កាត់ តែគណបក្សនេះ មិនមានសិទ្ធិចូលរួមនៅក្នុងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥នោះទេ ហើយគណបក្សនេះ ត្រូវបានគណបក្សមួយចោទប្រកាន់ថា បានធ្វើការគំរាមកំហែង បំភិតបំភ័យ សមាជិករបស់ខ្លួន មិនឲ្យបោះឆ្នោតគាំទ្រគណបក្សដទៃ ក្រៅពីគណបក្សសន្ទៈខ្មែរ ដែលសម្ព័ន្ធភាពនយោបាយរបស់ខ្លួន។
គណបក្សកម្លាំងជាតិ ថ្មីៗនេះ បានអះអាងថា មេដឹកនាំគណបក្សភ្លើងទៀន បានគំរាមកំហែង ក្រុមប្រឹក្សាឃុំ សង្កាត់ ដែលមានចំនួន២,១៩៨រូប មិនឲ្យទៅបោះឆ្នោតគាំទ្រគណបក្សនយោបាយណាមួយ ក្រៅពីគណបក្សសន្ទៈខ្មែរនោះឡើយ ហើយថែមទាំងបានណែនាំ និងរៀបចំឲ្យសមាជិករបស់ខ្លួន ដែលជាអង្គបោះឆ្នោត គូសសញ្ញាសម្គាល់សម្រាប់ការបោះឆ្នោតព្រឹទ្ធសភា នាពេលខាងមុខទៀតផង។
គណបក្សកម្លាំងជាតិ បានបញ្ជាក់នៅក្នុងលិខិតរបស់ខ្លួនថា គណបក្សភ្លើងទៀន មិនអាចបង្គាប់បញ្ជា ឬបង្ខិតបង្ខំ ឬព្រមានសមាជិកគណបក្ស ជាពិសេសក្រុមប្រឹក្សាឃុំ សង្កាត់ ដើម្បីឲ្យទៅបោះឆ្នោតជូនគណបក្សនយោបាយណាមួយ ដែលផ្ទុយពីឧត្តមគតិ និងមនសិការរបស់ពួកគេបានឡើយ៕