ព្រះបន្ទូល របស់ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានធ្វើឡើងខណៈព្រះអង្គយាងជាព្រះរាជាធិបតីដ៏ខ្ពង់ខ្ពស់ សួរសុខទុក្ខ និងប្រោសប្រទានព្រះរាជអំណោយដល់បុគ្គលិក កម្មករផ្នែកប្រមូលសំរាម និងសំអាតទីក្រុង នៅរាជធានីភ្នំពេញ និងប្រកាសទិវាជាតិ នៃទីក្រុងស្អាត នៅកោះនរា កាលពីព្រឹកថ្ងៃទី១៤ ខែកុម្ភៈ ឆ្នាំ២០២៤នេះ។
មានព្រះបន្ទូល ក្នុងឳកាសនោះ ព្រះអង្គបានលើកឡើងថា រាជរដ្ឋាភិបាលកម្ពុជាបានកំណត់យកថ្ងៃទី២៧ ខែកុម្ភៈ ជារៀងរាល់ឆ្នាំ ដើម្បីប្រារព្ធទិវាជាតិទីក្រុងស្អាត សំដៅរួមចំណែកបំផុស និងលើកទឹកចិត្តដល់បងប្អូនប្រជាពលរដ្ឋនៅទូទាំងប្រទេស ព្រមទាំងជំរុញ និងយកចិត្តទុកដាក់ខ្ពស់ក្នុងការលើកកម្ពស់ការអភិវឌ្ឍបៃតង ការប្តូរនូវបដិសណ្ឋារកិច្ចល្អដែលរួមចំណែកដល់ការអភិវឌ្ឍវិស័យទេសចរណ៍ និងការរីកចម្រើនរបស់សង្គមជាតិ។ ទីក្រុងស្អាត ផ្សាភ្ជាប់ទៅនឹងទីក្រុងឆ្លាត ដែលមានភាពទាក់ទាញ មានលក្ខណៈប្រកួតប្រជែងទាំងសេដ្ឋកិច្ចបរិស្ថាន ប្រកបដោយចីរភាព និងការទទួលខុសត្រូវ ដើម្បីលើកកម្ពស់គុណភាពរស់នៅ របស់ប្រជាជនប្រកបដោយសុខមាលភាព សុខភាព សន្តិសុខ វិបុលភាព និងផ្តល់ភាពកក់ក្តៅដល់ភ្ញៀវទេសចរជាតិ និងអន្តរជាតិ ជាពិសេសបំផុសឱ្យមានការចូលរួមយ៉ាងសកម្ម ពីប្រជាពលរដ្ឋគ្រប់រូបតាមរយៈការពង្រឹងការអនុវត្តនូវផែនការទីក្រុងស្អាត ប្រកបដោយបរិស្ថានល្អ ស្អាត ឆ្លាត និងបៃតង។
ព្រះអង្គបន្តថា ក្រោមការដឹកនាំ ដ៏វៃឆ្លាតរបស់សម្ដេចធិបតី ហ៊ុន ម៉ាណែត រាជរដ្ឋាភិបាលបានដឹកនាំសង្គមជាតិ ទាំងទីក្រុង និងជនបទ ទទួលបានសុខ សន្តិភាព និងការអភិវឌ្ឍរីកចម្រើនលូតលាស់លើគ្រប់វិស័យ។ ព្រះអង្គបានអំពាវនាវឱ្យគ្រប់ក្រសួង ស្ថាប័ន អាជ្ញាធររាជធានី ខេត្ត ជាពិសេសជនរួមជាតិទាំងអស់ សូមចូលរួមឲ្យបានផុលផុសក្នុងស្មារតី ទទួលខុសត្រូវខ្ពស់ក្នុងការថែរក្សា បរិស្ថានឱ្យបានល្អស្អាត និងបៃតង ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ ដើម្បីឲ្យកម្ពុជាក្លាយជាគោលដៅទេសចរណ៍ប្រកបដោយគុណភាព និងភាពទាក់ទាញខ្ពស់ សម្រាប់ភ្ញៀវទេសចរជាតិ និងអន្តរជាតិ។
តាមរបាយការណ៍របស់លោក ឃួង ស្រេង អភិបាលរាជធានីភ្នំពេញបានឲ្យដឹងថា បច្ចុប្បន្ន រដ្ឋបាលរាជធានីភ្នំពេញ មានភាពល្អប្រសើរ ធ្វើការងារគ្រប់គ្រង និងអភិវឌ្ឍន៍លើហេដ្ឋារចនាសម្ព័ន្ធរូបវ័ន្ដ ព្រមទាំងថែរក្សាអនាម័យ បរិស្ថានទីក្រុងស្អាត ពោលគឺក្រោយពេល ដែលរាជរដ្ឋាភិបាលបានធ្វើកំណែទម្រង់ លើការងារគ្រប់គ្រង សំរាមសំណល់រឹង ទៅទូទាំងប្រទេសក្នុងនោះនៅរាជធានីភ្នំពេញ បានរៀបចំនីតិវិធី ដេញថ្លៃប្រកួតប្រជែង ជាលក្ខណៈអន្តរជាតិ ដោយបានជ្រើសរើស បានក្រុមហ៊ុនចំនួន៣ ដើម្បីផ្ដល់ សេវាប្រមូល និងដឹកជញ្ជូនសម្រាម ក្នុងរាជធានី។
លោកបន្តថា ក្រុមហ៊ុនទាំង៣ បានចាប់ផ្តើមតាំងពីថ្ងៃទី១ ខែកក្កដា ឆ្នាំ២០២១ រហូតមកដល់ពេលនេះ ដោយទទួលបានការសាទរពីគ្រប់មជ្ឈដ្ឋានថា ផ្ដល់សេវាមានគុណភាពល្អប្រសើរជាងមុន មានមធ្យោបាយ សំភារៈប្រើប្រាស់ថ្មីទំនើប ចំនួនបុគ្គលិក កម្មករឆ្លើយតបទៅនឹងទំហំការងារ។ ទោះជាយ៉ាងណា នៅមានបញ្ហាប្រឈមមួយចំនួនដែលប្រជាពលរដ្ឋមួយចំនួនទុកដាក់សំរាមមិនទាន់បានត្រឹមត្រូវដែលទាមទារឱ្យមានការចូលរួមទាំងអស់គ្នា៕