រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ កាលពីយប់មិញ បានចេញសេចក្តីអំពាវនាវមួយដល់បងប្អូន ដែលកំពុងចិញ្ចឹមប្រភេទត្រី ឬវារីសត្វ ដែលមានប្រភពពីក្រៅប្រទេស សូមកុំលែងត្រីទាំងនោះ ចូលក្នុងដែនទឹកធម្មជាតិពីព្រោះអាចធ្វើឲ្យប៉ះពាល់ និងបង្កហានិភ័យដល់មច្ឆជាតិក្នុងស្រុក។
សេចក្ដីប្រកាសព័ត៌មាន ដែលទើបទទួលបាននៅថ្ងៃទី២៦ ខែមករា ឆ្នាំ២០២៤នេះ រដ្ឋបាលជលផល ថ្លែងអំណរគុណចំពោះបងប្អូនប្រជាពលរដ្ឋ ពិសេសអ្នកនេសាទ ដែលបានចូលរួមលែងនូវប្រភេទត្រីកម្រ ត្រីមេពូជ និងវារីសត្វផ្សេងទៀត ជាអាទិ៍ ត្រីរាជ ត្រីគល់រាំង ត្រីត្រសក់ អណ្ដើកហ្លួង អណ្ដើកសមុទ្រ ផ្សោតសមុទ្រ ដែលជាសកម្មភាពដ៏ប្រពៃ ក្នុងការចូលរួមថែរក្សាការពារនូវធនធានជលផល និងទទួលបាននូវការអបអរសាទរយ៉ាងខ្លាំងពីមហាជន។
បើតាមរដ្ឋបាលជលផល ថ្មីៗនេះ មានបងប្អូនខ្លះបានលែងត្រី ដែលមានប្រភពពីក្រៅប្រទេស ចូលក្នុងដែនទឹកធម្មជាតិ ដែលសកម្មភាពនេះ អាចនឹងបង្កហានិភ័យដល់មច្ឆជាតិក្នុងស្រុក។
រដ្ឋបាលជលផល បានបញ្ជាក់ថា វារីសត្វ ឬប្រភេទត្រី ដែលមានប្រភពពីក្រៅប្រទេស មួយចំនួនជាប្រភេទកាច ស៊ីសាច់ជាអាហារ ឬសាយកូនលឿន ប្រសិនបើប្រភេទត្រី ឬវារីសត្វទាំងនោះ មានវត្តមានកាន់តែច្រើន នៅក្នុងដែនទឹកធម្មជាតិ វានឹងស៊ីត្រីក្នុងធម្មជាតិ ដណ្តើមទីជម្រក និងអាចនាំឲ្យប៉ះពាល់ដល់ពូជក្នុងស្រុក។
បញ្ហានេះ រដ្ឋបាលជលផល បានអំពាវនាវដល់បងប្អូនប្រជាពលរដ្ឋ ដែលកំពុងចិញ្ចឹមប្រភេទត្រី ឬវារីសត្វមានប្រភពពីក្រៅប្រទេស ត្រូវថែរក្សាឲ្យបានខ្ជាប់ខ្ជួន ចៀសវាងលែង ឬធ្វេសប្រហែស ឲ្យរួចចូលក្នុងដែនទឹកធម្មជាតិ។ ករណីបងប្អូនមានបំណងលែងត្រី ឬវារីសត្វមានប្រភពពីក្រៅប្រទេស សូមទំនាក់ទំនងមកមន្ត្រីជំនាញជលផល តាមលេខទូរស័ព្ទដូចខាងក្រោម។
រដ្ឋបាលជលផល សូមលើកទឹកចិត្តដល់បងប្អូនប្រជាពលរដ្ឋ ពិសេសអ្នកនេសាទបន្តផ្តល់ព័ត៌មានដល់សមត្ថកិច្ចជលផល និងលែងនូវប្រភេទត្រីកម្រ ត្រីមេពូជ និងវារីសត្វផ្សេងទៀត ដែលនេសាទ បានឲ្យបានផុសផុលថែមទៀត ដែលនេះជាសកម្មភាពដ៏មានតម្លៃមិនអាចកាត់ថ្លៃបាន ក្នុងការចូលរួមថែរក្សា ការពារ និងអភិរក្សធនធានជលផលយើងឲ្យបានគង់វង្ស សម្រាប់កូនចៅជំនាន់ក្រោយ។ លេខទូរស័ព្ទទំនាក់ទំនង៖ ០១២ ៩០៨ ១២១, ០៩៩ ៧៩១ ៩១៩, ០១២ ៩១១ ៤១១៕
