រដ្ឋមន្ត្រីការពារជាតិរបស់ទីក្រុងម៉ានីលបាននិយាយកាលពីថ្ងៃអង្គារថាប្រទេសហ្វីលីពីនសង្ឃឹមថានឹងចុះហត្ថលេខានៅត្រីមាសទីមួយនៃឆ្នាំនេះនូវកិច្ចព្រមព្រៀងមួយជាមួយប្រទេសជប៉ុនដែលអនុញ្ញាតឱ្យមានការដាក់ពង្រាយកងកម្លាំងយោធានៅលើទឹកដីប្រទេសរបស់គ្នាទៅវិញទៅមក។ ចិនកាលពីថ្ងៃអង្គារបានកោះហៅឯកអគ្គរដ្ឋទូតមកពីប្រទេសហ្វីលីពីន និងបានព្រមានប្រទេសនេះថា"កុំលលេងជាមួយភ្លើង"។ ប្រទេសប៉ាគីស្ថានបានថ្កោលទោសយ៉ាងខ្លាំងចំពោះការវាយប្រហារតាមអាកាសរបស់អ៊ីរ៉ង់នៅខាងក្នុងព្រំដែនរបស់ខ្លួនដែលបានសម្លាប់កុមារពីរនាក់ដោយហៅថាជា"ការរំលោភបំពានដែនអាកាសរបស់ខ្លួន" និងព្រមានពីការសងសឹក។
-
ហ្វីលីពីនស្វែងរក “កិច្ចព្រមព្រៀងយោធា” ជាមួយជប៉ុន
យោងតាមសារព័ត៌មាន NIKKEI Asia ចុះផ្សាយថ្ងៃទី១៦ ខែមករាបានអោយដឹងថា រដ្ឋមន្ត្រីការពារជាតិរបស់ទីក្រុងម៉ានីលបាននិយាយកាលពីថ្ងៃអង្គារថា ប្រទេសហ្វីលីពីនសង្ឃឹមថានឹងចុះហត្ថលេខានៅត្រីមាសទីមួយនៃឆ្នាំនេះនូវកិច្ចព្រមព្រៀងមួយជាមួយប្រទេសជប៉ុនដែលអនុញ្ញាតឱ្យមានការដាក់ពង្រាយកងកម្លាំងយោធានៅលើទឹកដីប្រទេសរបស់គ្នាទៅវិញទៅមក។
ហ្វីលីពីនកំពុងពង្រឹងទំនាក់ទំនងរបស់ខ្លួនជាមួយប្រទេសជិតខាង និងប្រទេសផ្សេងទៀត ដើម្បីទប់ទល់នឹងការគំរាមកំហែងដែលទីក្រុងប៉េកាំងកាន់តែឈ្លានពាននៅក្នុងសមុទ្រចិនខាងត្បូង។
រដ្ឋមន្ត្រីក្រសួងការពារជាតិ លោក Gilberto Teodoro បានប្រាប់អ្នកយកព័ត៌មាននៅខាងក្រៅCybersecurity Forum ថា ហ្វីលីពីន និងកាណាដាក៏កំពុងធ្វើការលើអនុស្សរណៈនៃការយោគយល់គ្នាសម្រាប់ការពង្រឹងកិច្ចសហប្រតិបត្តិការលើវិស័យការពារជាតិ។
គួររំលឹកថាជប៉ុន និងហ្វីលីពីនដែលជាសម្ព័ន្ធមិត្តជិតស្និទ្ធរបស់សហរដ្ឋអាមេរិក បានចាប់ផ្តើមការចរចាលើកិច្ចព្រមព្រៀងចូលប្រើប្រាស់កងទ័ពរបស់គ្នាទៅវិញទៅមកកាលពីខែវិច្ឆិកានេះ។
-
ចិនព្រមានហ្វីលីពីនកុំលលេងនឹងភ្លើង
យោងតាមសារព័ត៌មាន GMA News ចុះផ្សាយថ្ងៃទី១៦ ខែមករាបានអោយដឹងថា ប្រទេសចិនកាលពីថ្ងៃអង្គារបានកោះហៅឯកអគ្គរដ្ឋទូតមកពីប្រទេសហ្វីលីពីន និងបានព្រមានប្រទេសនេះថា "កុំលលេងជាមួយភ្លើង" បន្ទាប់ពីប្រធានាធិបតីរបស់ហ្វីលីពីនលោក Ferdinand Marcos Jr. កាលពីថ្ងៃចន្ទបានអបអរសាទរប្រធានាធិបតីជាប់ឆ្នោតរបស់តៃវ៉ាន់លោក Lai Ching-te ចំពោះជ័យជម្នះក្នុងការបោះឆ្នោតរបស់លោក។
អ្នកនាំពាក្យលោក Mao Ning បានប្រាប់ដោយសង្ខេបថា៖«ការកត់សម្គាល់ពាក់ព័ន្ធនឹងលោកប្រធានាធិបតី Marcos គឺជាការបំពានយ៉ាងធ្ងន់ធ្ងរលើគោលការណ៍ចិនតែមួយ និង...ជាការរំលោភបំពានយ៉ាងធ្ងន់ធ្ងរលើការតាំងចិត្តនយោបាយរបស់ហ្វីលីពីនចំពោះភាគីចិន និងការជ្រៀតជ្រែកយ៉ាងធ្ងន់ធ្ងរនៅក្នុងកិច្ចការផ្ទៃក្នុងរបស់ប្រទេសចិន។»
លោក Mao បាននិយាយថា"ប្រទេសចិនបានដាក់ការតវ៉ាយ៉ាងខ្លាំងចំពោះហ្វីលីពីននៅក្នុងឱកាសដំណាក់កាលដំបូងបំផុត" ហើយបានកោះហៅឯកអគ្គរដ្ឋទូតហ្វីលីពីន "ទទួលខុសត្រូវដើម្បីផ្តល់ការពន្យល់បកស្រាយមកកាន់ប្រទេសចិន" ។
លោកបានលើកថា"យើងស្នើឱ្យប្រធានាធិបតីលោក Marcos អានសៀវភៅបន្ថែមទៀត ដើម្បីយល់ឱ្យបានច្បាស់ពីបញ្ហាខាងក្នុង និងខាងក្រៅនៃកោះតៃវ៉ាន់ ដើម្បីអាចឈានមករកការសន្និដ្ឋានត្រឹមត្រូវ"។
-
បន្ទាប់ពីអ៊ីរ៉ាក់ និងស៊ីរី អ៊ីរ៉ង់វាយប្រហារមូលដ្ឋានទ័ពនៅប៉ាគីស្ថាន
យោងតាមសារព័ត៌មាន CNN ចុះផ្សាយថ្ងៃទី១៧ ខែមករាបានអោយដឹងថា ប្រទេសប៉ាគីស្ថានបានថ្កោលទោសយ៉ាងខ្លាំងចំពោះការវាយប្រហារតាមអាកាសរបស់អ៊ីរ៉ង់នៅខាងក្នុងព្រំដែនរបស់ខ្លួនដែលបានសម្លាប់កុមារពីរនាក់ដោយហៅថាជា"ការរំលោភបំពានដែនអាកាសរបស់ខ្លួន" និងព្រមានពីការសងសឹក។
អ៊ីរ៉ង់បាននិយាយថា ខ្លួនបានប្រើប្រាស់“កាំជ្រួចមីស៊ីល និងដ្រូន”ដើម្បីបំផ្លាញទីតាំងបន្ទាយរឹងមាំចំនួនពីររបស់ក្រុមសកម្មប្រយុទ្ធ Sunni Jaish al-Adl រឺត្រូវបានស្គាល់នៅអ៊ីរ៉ង់ថាជា Jaish al-Dhulm នៅក្នុងតំបន់ Koh-e-Sabz នៃខេត្ត Balochistan ភាគនិរតីនៃប្រទេសប៉ាគីស្ថាន។
ការវាយប្រហារកាលពីថ្ងៃអង្គារបានកើតឡើងបន្ទាប់ពីអ៊ីរ៉ង់បានបាញ់មីស៊ីលនៅភាគខាងជើងអ៊ីរ៉ាក់ និងស៊ីរីកាលពីថ្ងៃចន្ទ។
