កូរ៉េ​ខាងជើង​បាន​បាញ់​មី​ស៊ី​ល​ផ្លោង​យ៉ាងតិច​មួយ​គ្រាប់​ចូល​ទៅកាន់​ដែនទឹក​នៅ​ឆ្នេរសមុទ្រ​ភាគ​ខាងកើត​នៃ​ឧបទ្វីប​កូរ៉េនេះ​បើតាម​អគ្គសេនាធិការ​ចម្រុះ​កូរ៉េខាងត្បូង(JCS)។ ភ្នំភ្លើងមួយនៅប្រទេសអ៊ីស្លង់បានផ្ទុះឡើងកាលពីថ្ងៃអាទិត្យបន្ទាប់ពីមានការរញ្ជួយដីជាញឹកញាប់បានអង្រួនឧបទ្វីប Reykjanes ដោយជំរុញឱ្យមានការជម្លៀសប្រជាជននៅក្នុងទីក្រុងមួយ។ មេដឹកនាំពិភពលោកបានអបអរសាទរចំពោះលោក Lai Ching-te ដែលបានឈ្នះការបោះឆ្នោតប្រធានាធិបតីតៃវ៉ាន់ ដោយបានសរសើរពីចំនួនអ្នកទៅបោះឆ្នោតមានកម្រិតខ្ពស់ និងដំណើរការមានលទ្ធិប្រជាធិបតេយ្យ។

1.កូរ៉េ​ខាងជើង​បាន​បាញ់​មី​ស៊ី​ល​ផ្លោង​ទៅកាន់​ឆ្នេរសមុទ្រ​ភាគ​ខាងកើត​ឧបទ្វីប​កូរ៉េ

យោងតាមសារព័ត៌មាន CNN ចុះផ្សាយថ្ងៃទី១៤ ខែមករាបានអោយដឹងថា កូរ៉េ​ខាងជើង​បាន​បាញ់​មី​ស៊ី​ល​ផ្លោង​យ៉ាងតិច​មួយ​គ្រាប់​ចូល​ទៅកាន់​ដែនទឹក​នៅ​ឆ្នេរសមុទ្រ​ភាគ​ខាងកើត​នៃ​ឧបទ្វីប​កូរ៉េនេះ​បើតាម​អគ្គសេនាធិការ​ចម្រុះ​កូរ៉េខាងត្បូង (JCS) ។ ឆ្មាំឆ្នេរសមុទ្ររបស់ប្រទេសជប៉ុន ដែលដកស្រង់ព័ត៌មានពីក្រសួងការពារជាតិបានប្រកាសថា កាំជ្រួចមីស៊ីលផ្លោងដែលត្រូវបានបាញ់ដោយកូរ៉េខាងជើងនេះ បានហោះប្រហែល1,000គីឡូម៉ែត្រមុននឹងធ្លាក់ចូលសមុទ្រ។

JCS បាននិយាយថា កាំជ្រួចនេះត្រូវបានបាញ់ចេញពីតំបន់ព្យុងយ៉ាងនៅម៉ោងប្រហែល 2:55 រសៀលម៉ោងក្នុងស្រុកកាលពីថ្ងៃអាទិត្យ។

JCS បាននិយាយថាយោធាកូរ៉េខាងត្បូង សហរដ្ឋអាមេរិក និងជប៉ុនកំពុងធ្វើការរួមគ្នាដើម្បីវិភាគព័ត៌មានលម្អិតបន្ថែមនៃមីស៊ីលនេះ ដោយបន្ថែមថា យោធាកូរ៉េខាងត្បូងកំពុងត្រៀមជំហរយ៉ាងពេញលេញ ខណៈពេលក៏ចែករំលែកព័ត៌មានពីមីស៊ីលរបស់កូរ៉េខាងជើងនេះយ៉ាងជិតដិតជាមួយសហរដ្ឋអាមេរិក និងជប៉ុន។

2. ភ្នំភ្លើងផ្ទុះនៅអ៊ីស្លង់បន្ទាប់ពីមានការរញ្ជួយដីជាបន្តបន្ទាប់

យោងតាមសារព័ត៌មាន The New York Times ចុះផ្សាយថ្ងៃទី១៤ ខែមករាបានអោយដឹងថា ភ្នំភ្លើងមួយនៅប្រទេសអ៊ីស្លង់បានផ្ទុះឡើងកាលពីថ្ងៃអាទិត្យបន្ទាប់ពីមានការរញ្ជួយដីជាញឹកញាប់បានអង្រួនឧបទ្វីប Reykjanes ដោយជំរុញឱ្យមានការជម្លៀសប្រជាជននៅក្នុងទីក្រុងមួយនៅជិតកន្លែងស្នាមប្រេះឆាបានផ្ទុះឡើង និងបានបញ្ចេញកម្អែភ្នំភ្លើងកាលពីខែមុន។ យោងតាមប្រព័ន្ធផ្សព្វផ្សាយក្នុងស្រុក និងទីភ្នាក់ងារការពារជនស៊ីវិលរបស់ប្រទេសបានឱ្យដឹងថា ការផ្ទុះនេះបានកើតឡើងនៅម៉ោងប្រហែល8ព្រឹកម៉ោងក្នុងស្រុកនៅជិតតំបន់ Sundhnjúkar ភាគខាងជើងនៃទីក្រុង Grindavik។ លោក Magnus Tumi Gudmundsson អ្នកជំនាញខាងភ្នំភ្លើងដែលផ្តល់យោបល់ដល់ទីភ្នាក់ងារការពារជនស៊ីវិលបាននិយាយថាលោកបានជិះឧទ្ធម្ភាគចក្រឆ្មាំឆ្នេរសមុទ្រដើម្បីហោះហើរអង្កេតមើលការផ្ទុះនេះនៅប្រហែលជា10 នាទីបន្ទាប់ពីវាត្រូវបានរាយការណ៍ថាបានចាប់ផ្តើម។

3.មេដឹកនាំពិភពលោកអបអរសាទរប្រធានាធិបតីថ្មីនៅតៃវ៉ាន់

យោងតាមសារព័ត៌មាន The Guardian ចុះផ្សាយថ្ងៃទី១៤ ខែមករាបានអោយដឹងថា មេដឹកនាំពិភពលោកបានអបអរសាទរចំពោះលោក Lai Ching-te ដែលបានឈ្នះការបោះឆ្នោតប្រធានាធិបតីតៃវ៉ាន់ ដោយបានសរសើរពីចំនួនអ្នកទៅបោះឆ្នោតមានកម្រិតខ្ពស់ និងដំណើរការមានលទ្ធិប្រជាធិបតេយ្យ ដែលបានទាក់ទាញកំហឹងពីទីក្រុងប៉េកាំង ដែលសង្ឃឹមថានឹងឃើញគណបក្សកាន់អំណាចរបស់តៃវ៉ាន់ត្រូវបានបណ្តេញចេញ។ លោក Lai បានឈ្នះអំណាចអាណត្តិទី 3 ដែលមិនធ្លាប់មានពីមុនមកសម្រាប់គណបក្ស Progressive Democratic Progressive (DPP) នៅក្នុងការបោះឆ្នោតកាលពីថ្ងៃសៅរ៍ ជាមួយនឹងសម្លេងឆ្នោតច្រើនជាង 40%។ លោក Lai កំពុងចូលកាន់តំណែងបន្តពីលោកស្រី Tsai Ing-wen នៃគណបក្ស DPP ដែលជាប្រធានាធិបតីចាប់តាំងពីឆ្នាំ 2016 ដោយសន្យាថានឹងបន្តកិច្ចខិតខំប្រឹងប្រែងគោលនយោបាយការបរទេសរបស់នាងក្នុងការទប់ទល់នឹងផែនការរបស់ចិនក្នុងការបញ្ចូលតៃវ៉ាន់ជារបស់ខ្លួន។ អ្នក​នាំពាក្យ​ក្រសួង​ការបរទេស​សហរដ្ឋ​អាមេរិក​បាន​អបអរសាទរ​ប្រជាជន​តៃវ៉ាន់​ "សម្រាប់​ការ​បង្ហាញ​ពី​ភាព​រឹងមាំ​នៃ​ប្រព័ន្ធ​ប្រជាធិបតេយ្យ​ដ៏​រឹងមាំ​របស់​ពួកគេ​ និង​ដំណើរការ​បោះឆ្នោត"។