យ៉ាងហោចណាស់មានមនុស្ស103នាក់ត្រូវបានសម្លាប់កាលពីថ្ងៃពុធ និង188នាក់ទៀតបានរងរបួសនៅក្នុងទីក្រុង Kerman របស់អ៊ីរ៉ង់បន្ទាប់ពីមានការបំផ្ទុះពីរលើកនៅជិតកន្លែងបញ្ចុះសពរបស់លោកមេបញ្ជាការយោធា Qasem Soleimani ដែលក្រុមមន្ត្រីបានហៅថានេះជាការវាយប្រហារភេរវកម្ម។ ប្រធានក្រុមប្រដាប់អាវុធដ៏មានឥទ្ធិពលរបស់លីបង់គឺក្រុមហេសបូឡា បាននិយាយកាលពីថ្ងៃពុធថា ការសម្លាប់របស់អ៊ីស្រាអែលលើប្រមុខរងក្រុមសម្ព័ន្ធមិត្តប៉ាឡេស្ទីនហាម៉ាសនៅក្នុងទីក្រុង Beirut គឺជា"ឧក្រិដ្ឋកម្មគ្រោះថ្នាក់ដ៏ធំមួយដែលយើងមិនអាចនៅស្ងៀមបាន"។ សហរដ្ឋអាមេរិកបានឈានដល់កិច្ចព្រមព្រៀងយ៉ាងស្ងាត់ស្ងៀមលើការបន្តវត្តមានយោធារបស់ខ្លួននៅឯមូលដ្ឋានយោធាដ៏ធំមួយនៅឯប្រទេសកាតាសម្រាប់រយៈពេល 10 ឆ្នាំទៀត។

1. មនុស្សជាង100នាក់ស្លាប់ក្នុងការបំផ្ទុះពីរលើកក្បែរផ្នូរមេបញ្ជាការអ៊ីរ៉ង់

យោងតាមសារព័ត៌មាន CNN ចុះផ្សាយថ្ងៃទី០៣ ខែមករាបានអោយដឹងថា យ៉ាងហោចណាស់មានមនុស្ស103 នាក់ត្រូវបានសម្លាប់កាលពីថ្ងៃពុធ និង188 នាក់ទៀតបានរងរបួសនៅក្នុងទីក្រុង Kerman របស់អ៊ីរ៉ង់បន្ទាប់ពីមានការបំផ្ទុះពីរលើកនៅជិតកន្លែងបញ្ចុះសពរបស់លោកមេបញ្ជាការយោធា Qasem Soleimani ដែលក្រុមមន្ត្រីបានហៅថានេះជាការវាយប្រហារភេរវកម្ម។

ទូរទស្សន៍រដ្ឋបានលើកឡើងថា ក្នុងចំណោមការបំផ្ទុះទាំងនេះ យ៉ាងហោចណាស់ក៏មានមួយដែរ ត្រូវបានបង្កឡើងដោយគ្រាប់បែក ដោយហេតុការណ៍នេះបានកើតឡើងនៅក្នុងថ្ងៃគំរប់ខួបលើកទីបួននៃការស្លាប់របស់លោក Soleimani ដោយសារការវាយប្រហារដោយដ្រូនរបស់សហរដ្ឋអាមេរិក និងបានកាន់តែបង្កើនភាពតានតឹងនៅក្នុងសង្គ្រាមអ៊ីស្រាអែល និងហាម៉ាស។

ការផ្ទុះលើកទីមួយមានចម្ងាយ 700 ម៉ែត្រពីផ្នូររបស់លោក Soleimani និងលើកទីពីរគឺចម្ងាយ 1 គីឡូម៉ែត្រ នៅខណៈពេលដែលអ្នកធ្វើធម្មយាត្រាទៅដំណើរទៅទស្សនាទីកន្លែងនោះ។

គួររំលឹកថាលោក Soleimani ត្រូវ​បាន​សម្លាប់​ដោយ​ការ​វាយ​ប្រហារ​តាម​អាកាស​របស់​សហរដ្ឋ​អាមេរិក​ដែល​បញ្ជា​ដោយ​អតីត​ប្រធានាធិបតីលោក Donald Trump នៅ​អាកាសយានដ្ឋាន​អន្តរជាតិ Baghdad កាល​ពី​បួន​ឆ្នាំ​មុន​នៅក្នុង​ពី​ថ្ងៃ​ពុធ។

2. ប្រមុខហេសបូឡាប្រតិកម្មចំពោះការសម្លាប់ប្រមុខរងហាម៉ាស

យោងតាមសារព័ត៌មាន Reuters ចុះផ្សាយថ្ងៃទី០៤ ខែមករាបានអោយដឹងថា ប្រធានក្រុមប្រដាប់អាវុធដ៏មានឥទ្ធិពលរបស់លីបង់គឺក្រុមហេសបូឡា បាននិយាយកាលពីថ្ងៃពុធថា ការសម្លាប់របស់អ៊ីស្រាអែលលើប្រមុខរងក្រុមសម្ព័ន្ធមិត្តប៉ាឡេស្ទីនហាម៉ាសនៅក្នុងទីក្រុង Beirut គឺជា "ឧក្រិដ្ឋកម្មគ្រោះថ្នាក់ដ៏ធំមួយដែលយើងមិនអាចនៅស្ងៀមបាន"។

នៅក្នុងសុន្ទរកថាតាមទូរទស្សន៍ លោក Sayyed Hassan Nasrallah បានចែករំលែកការរំលែកទុក្ខដល់ក្រុមហាម៉ាសចំពោះការឈ្លានពានរបស់អ៊ីស្រាអែលកាលពីយប់ថ្ងៃអង្គារដែលបានសម្លាប់លោក Saleh al-Arouri ។

ការវាយប្រហារកាលពីថ្ងៃអង្គារបានសំដៅទៅកាន់ជាយក្រុង Beirut ភាគខាងត្បូងនៃ តំបន់ Dahiyeh ដែលអ្នកវិភាគបានលើកឡើងថា វាក៏អាចជាសារមួយពីអ៊ីស្រាអែលទៅកាន់ក្រុមហេសបូឡាផងដែរថា សូម្បីតែបន្ទាយដ៏រឹងមាំរបស់ពួកគេ ក៏អ៊ីស្រាអែលអាចទៅដល់បានដែរ។  

វា​ជា​ការ​វាយ​ប្រហារ​លើក​ដំបូង​ដែល​វាយ​លុក​ក្រុង​ Beirut បន្ទាប់​ពី​ជិតរយៈពេល​បី​ខែ​នៃ​ការ​បាញ់​ប្រហារ​ជារៀងរាល់ថ្ងៃ​រវាង​យោធា​អ៊ីស្រាអែល និង​ក្រុមហេសបូឡាដែល​ភាគច្រើនស្ថិតនៅក្នុងតំបន់​ព្រំដែន។

3. អាមេរិក​សម្រេច​កិច្ចព្រមព្រៀង​ស្ងាត់ៗ​ជាមួយ​កាតាលើមូលដ្ឋានយោធាដ៏ធំបំផុត

យោងតាមសារព័ត៌មាន CNN ចុះផ្សាយថ្ងៃទី០២ ខែមករាបានអោយដឹងថា សហរដ្ឋអាមេរិកបានឈានដល់កិច្ចព្រមព្រៀងយ៉ាងស្ងាត់ស្ងៀមលើការបន្តវត្តមានយោធារបស់ខ្លួននៅឯមូលដ្ឋានយោធាដ៏ធំមួយនៅឯប្រទេសកាតាសម្រាប់រយៈពេល 10 ឆ្នាំទៀត នេះបើតាមមន្រ្តីការពារជាតិមួយចំនួនបានប្រាប់សារព័ត៌មាន CNN។ 

កិច្ចព្រមព្រៀងនេះ ដែលមិនត្រូវបានប្រកាសឡើងជាសាធារណៈ បានបង្ហាញពីការពឹងផ្អែករបស់ទីក្រុងវ៉ាស៊ីនតោនមកលើប្រទេសឈូងសមុទ្រតូចមួយនេះ ដែលថ្មីៗនេះក៏បានដើរតួនាទីយ៉ាងសំខាន់ក្នុងការសម្រុះសម្រួលការដោះលែងជនជាតិអាមេរិកពីការជាប់ឃុំឃាំងនៅតំបន់ហ្គាហ្សា និងវេណេស៊ុយអេឡា។

មូលដ្ឋានទ័ពអាកាស Al Udeid ដែលមានទីតាំងនៅវាលខ្សាច់ភាគនិរតីនៃទីក្រុង Doha គឺជាកន្លែងដំឡើងយោធាដ៏ធំបំផុតរបស់សហរដ្ឋអាមេរិកនៅមជ្ឈិមបូព៌ា ហើយអាចផ្ទុកទាហានអាមេរិកជាង 10,000 នាក់បាន។

រដ្ឋមន្ត្រីក្រសួងការពារជាតិ លោក Lloyd Austin បានទៅទស្សនកិច្ចនៅមូលដ្ឋាន Al Udeid កាលពីខែមុន ហើយលោកក៏បានថ្លែងអំណរគុណដល់ប្រទេសកាតាសម្រាប់ការបង្កើនការចំណាយរបស់ពួកគេលើមូលដ្ឋានមួយនេះផងដែរ។