នៅក្នុងការផ្លាស់ប្តូរគោលនយោបាយដ៏សំខាន់មួយដែលបានប្រកាសនៅថ្ងៃទី 1 ខែមករា ឆ្នាំ2024 រដ្ឋាភិបាលប្រទេសន័រវែសបានអនុញ្ញាតឱ្យមានការលក់អាវុធ និងផលិតផលការពារជាតិដោយផ្ទាល់ពីក្រុមហ៊ុនផលិតនានារបស់ន័រវេសទៅកាន់រដ្ឋអំណាចការពារជាតិអ៊ុយក្រែន។ ប៉ូឡូញបានបញ្ជាប្រតិបត្តិការយន្តហោះចម្បាំងដើម្បីការពារដែនអាកាសរបស់ខ្លួនកាលពីថ្ងៃអង្គារដោយខណៈដែលរុស្ស៊ីបានបង្កើនការទម្លាក់គ្រាប់បែកលើអ៊ុយក្រែនដោយមីស៊ីល។ រុស្ស៊ីបាននិយាយកាលពីថ្ងៃអង្គារថាយន្តហោះចម្បាំងមួយគ្រឿងរបស់ខ្លួនបានទម្លាក់គ្រាប់បែកដោយចៃដន្យទៅលើភូមិមួយរបស់រុស្សីក្នុងអំឡុងពេលមានការវាយប្រហារដ៏ធំមកលើអ៊ុយក្រែន។
-
ន័រវេសផ្តល់សិទ្ធិលក់អាវុធដោយផ្ទាល់ទៅកាន់អ៊ុយក្រែន
យោងតាមសារព័ត៌មាន Airforce Technology ចុះផ្សាយថ្ងៃទី០២ ខែមករាបានអោយដឹងថា នៅក្នុងការផ្លាស់ប្តូរគោលនយោបាយដ៏សំខាន់មួយដែលបានប្រកាសនៅថ្ងៃទី 1 ខែមករា ឆ្នាំ2024 រដ្ឋាភិបាលប្រទេសន័រវែសបានអនុញ្ញាតឱ្យមានការលក់អាវុធ និងផលិតផលការពារជាតិដោយផ្ទាល់ពីក្រុមហ៊ុនផលិតនានារបស់ន័រវេសទៅកាន់រដ្ឋអំណាចការពារជាតិអ៊ុយក្រែន។
ប្រទេសន័រវេស ដែលជាផ្នែកមួយនៃសម្ព័ន្ធ F-16 ដែលជំរុញឱ្យមានការផ្ទេរយន្តហោះចម្បាំងទំនើបទៅកាន់អ៊ុយក្រែន-បានរួមចំណែកកាន់តែស៊ីជម្រៅនៅក្នុងវិស័យការពារជាតិរបស់អ៊ុយក្រែន ដើម្បីការពារអ៊ុយក្រែនប្រឆាំងនឹងការឈ្លានពានរបស់រុស្ស៊ីចាប់តាំងពីខែកុម្ភៈឆ្នាំ 2022មក។
រដ្ឋមន្ត្រីការបរទេសលោក Espen Eide បាននិយាយថា"យើងត្រូវតែរៀបចំផែនការដើម្បីទប់ទល់នឹងសង្រ្គាមឈ្លានពានខុសច្បាប់ដែលអាចនឹងអូសបន្លាយ"។ ការប្តេជ្ញាចិត្តរបស់ប្រទេសន័រវេសចំពោះការគាំទ្រផ្នែកយោធាសម្រាប់អ៊ុយក្រែនមានសរុបប្រមាណ1.21កោដិដុល្លា ក្នុងឆ្នាំ 2023 ហើយនឹងបន្តនៅក្រោមកម្មវិធីនេះ។
-
ប៉ូឡូញបញ្ជាយន្តហោះចម្បាំងដើម្បីការពារដែនអាកាស
យោងតាមសារព័ត៌មាន CNN ចុះផ្សាយថ្ងៃទី០២ ខែមករាបានអោយដឹងថា ប៉ូឡូញ បានបញ្ជាប្រតិបត្តិការយន្តហោះចម្បាំងដើម្បីការពារដែនអាកាសរបស់ខ្លួនកាលពីថ្ងៃអង្គារ ដោយខណៈដែលរុស្ស៊ីបានបង្កើនការទម្លាក់គ្រាប់បែកលើអ៊ុយក្រែនដោយមីស៊ីល។ យោងតាមយោធាប៉ូឡូញបានឲ្យដឹងថា កាលពីសប្តាហ៍មុន កាំជ្រួចមីស៊ីលរបស់រុស្ស៊ីមួយគ្រាប់ក៏បានឆ្លងកាត់ចូលទៅក្នុងទឹកដីប៉ូឡូញផងដែរ។
ប្រទេសប៉ូឡូញ ដែលជាសមាជិកណាតូដែលមានព្រំដែនជាប់នឹងអ៊ុយក្រែន បាននិយាយថា ខ្លួនបានដំណើរការយន្តហោះចម្បាំង F-16 ចំនួនពីរគូ និងយន្តហោះផ្ទុកធុងទឹករបស់ម្ព័ន្ធមិត្តកាលពីព្រឹកថ្ងៃអង្គារ បន្ទាប់ពីរុស្ស៊ីបានបើកការវាយប្រហារដោយមីស៊ីលចុងក្រោយបំផុតមកលើអ៊ុយក្រែន សំដៅលើរដ្ឋធានី Kyiv និងភាគខាងកើតតំបន់ Kharkiv។
បញ្ជាការប្រតិបត្តិការរបស់ប្រទេសប៉ូឡូញបានសរសេរនៅលើបណ្តាញសង្គម X ថា "យើងចង់ជូនដំណឹងថា សកម្មភាពអាកាសចរណ៍រយៈចម្ងាយឆ្ងាយរបស់សហព័ន្ធរុស្ស៊ីកំពុងត្រូវបានត្រួតពិនិត្យមើល ដែលមានទំនាក់ទំនងទៅនឹងការវាយប្រហារលើអធិបតេយ្យភាពរបស់អ៊ុយក្រែន"។ យន្តហោះចម្បាំងទាំងនេះកំពុងឈរជើងនៅមូលដ្ឋាន Łask និងនៅ Krzesiny ដើម្បីធានាសុវត្ថិភាពនៃដែនអាកាសប៉ូឡូញ"។
-
យន្តហោះចម្បាំងរុស្ស៊ីទម្លាក់គ្រាប់បែកដោយចៃដន្យលើភូមិរបស់ខ្លួន
យោងតាមសារព័ត៌មាន Business Insider ចុះផ្សាយថ្ងៃទី០២ ខែមករាបានអោយដឹងថា រុស្ស៊ីបាននិយាយកាលពីថ្ងៃអង្គារថា យន្តហោះចម្បាំងមួយគ្រឿងរបស់ខ្លួនបានទម្លាក់គ្រាប់បែកដោយចៃដន្យទៅលើភូមិមួយរបស់រុស្សីក្នុងអំឡុងពេលមានការវាយប្រហារដ៏ធំមកលើអ៊ុយក្រែន។
នៅក្នុងសេចក្តីថ្លែងការណ៍ដែលធ្វើឡើងដោយប្រព័ន្ធផ្សព្វផ្សាយរដ្ឋ ក្រសួងការពារជាតិរុស្ស៊ីបាននិយាយថា "ការទម្លាក់គ្រាប់បែកនៃយន្តហោះសង្គ្រោះបន្ទាន់"នេះ បានកើតឡើងនៅម៉ោងប្រហែល 9 ព្រឹកម៉ោងក្នុងស្រុក នៅពេលដែល"យន្តហោះនៃកងកម្លាំងអាកាសរុស្ស៊ីកំពុងធ្វើការហោះហើរលើទីតាំងលំនៅឋាន Petropavlovka ក្នុងតំបន់ Voronezh ដែលប្រមាណជាក្រោម 100 ម៉ាយពីភាគខាងកើតនៃព្រំដែនជាមួយអ៊ុយក្រែន។
សេចក្តីថ្លែងការណ៍បាននិយាយថា៖ «មិនមានអ្នករងរបួសនោះទេ» ដោយកត់សម្គាល់ថា អគារចំនួន ៦ បានរងការខូចខាត ហើយមានការស៊ើបអង្កេតលើឧបទ្ទវហេតុនេះកំពុងដំណើរការបន្ត។
