លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) នាព្រឹកថ្ងៃទី២ ខែមករា ឆ្នាំ២០២៤នេះ បានអញ្ជើញជាអធិបតីក្នុងពិធីបញ្ចុះបឋមសិលាបើកការដ្ឋានសាងសង់អគារទីស្តីការគណៈកម្មាធិការជាតិរៀបចំការបោះឆ្នោតថ្មី ដែលមានទីតាំងនៅដីឡូតិ៍លេខ ៧១ វិថីសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
គម្រោងអគារទីស្តីការថ្មីរបស់ គ.ជ.ប នេះ មានកម្ពស់៩ជាន់ ត្រូវបានបុកគ្រឹះសាងសង់នៅលើដីលំនៅដ្ឋានទំហំជាង៥ពាន់ម៉ែត្រការ៉េ ដែលត្រូវបានរាជរដ្ឋាភិបាល ដកហូតពីលោក គង់ គាំ អតីតមន្រ្តីជាន់ខ្ពស់គណបក្សភ្លើងទៀន ប្រគល់ជាកម្មសិទ្ធិឱ្យ គ.ជ.ប។
លោក ហង្ស ពុទ្ធា សមាជិក គ.ជ.ប និងជាអ្នកនាំពាក្យបានឱ្យដឹងថា គម្រោងសាងសង់អគារនេះ មានតម្លៃប្រមាណ២១លានដុល្លារអារិក ដែលថវិកានេះ បានមកពីការជួលអគារទីស្តីការ គ.ជ.ប បច្ចុប្បន្នឱ្យទៅក្រុមហ៊ុនណាហ្កាវើល ហើយតាមកិច្ចសន្យា ការសាងសង់ នឹងត្រូវរួចរាល់នៅក្នុងខែតុលា ឆ្នាំ២០២៥។
បើតាមលោក ហង្ស ពុទ្ធា អគារដែលកំពុងសាងសង់នេះ មានទំហំជាង៣ម៉ឺន២ពាន់ម៉ែត្រការ៉េ ដោយក្នុងអគារនេះ មានសាលប្រជុំមួយដែលផ្ទុកមនុស្សបាន៤៥០នាក់។ អគារថ្មីនេះ នឹងផ្តល់បរិយាកាសកាន់តែល្អប្រសើរសម្រាប់ថ្នាក់ដឹកនាំ គ.ជ.ប និងមន្ត្រី គ.ជ.ប បំពេញការងាររៀបចំការបោះឆ្នោត៕
