មូលហេតុដែលអ៊ីស្រាអែល និងអ៊ីរ៉ង់មានទំនាស់នឹងគ្នាគឺបានចាប់ផ្តើមឡើងតាំងពីឆ្នាំ1947 មកម្ល៉េះ ដោយនៅពេលនោះអង្គការសហប្រជាជាតិបានធ្វើការបោះឆ្នោតដើម្បីបំបែកតំបន់ប៉ាឡេស្ទីនទៅជាប្រទេសអ៊ីស្រាអែល និងប្រទេសប៉ាឡេស្ទីន។ នៅពេលនោះ អ៊ីរ៉ង់គឺជាប្រទេសមួយក្នុងចំណោមប្រទេសទាំង13 ដែលបានធ្វើការបដិសេធសំណើនោះ។ នៅពេលដែលរដ្ឋអ៊ីស្រាអែលត្រូវបានបង្កើតឡើង អ៊ីរ៉ង់ក៏បានធ្វើការបោះឆ្នោតប្រឆាំងនឹងការចូលរបស់ប្រទេសនេះចូលទៅក្នុងអង្គការសហប្រជាជាតិថែមទៀត។ ទោះបីជាយ៉ាងនេះក្តី មិនយូរប៉ុន្មាន អ៊ីរ៉ង់ក៏បានក្លាយជារដ្ឋដំបូងមួយក្នុងចំណោមរដ្ឋដែលកាន់សាសនាអ៊ីស្លាមភាគច្រើនបានទទួលស្គាល់អធិបតេយ្យភាពរបស់អ៊ីស្រាអែលទាំងមិនទាន់ជាផ្លូវការនៅក្នុងឆ្នាំ1950។ ជាការពិតទៅ ប្រទេសទាំងពីរបានចែករំលែកទំនាក់ទំនងយ៉ាងជិតស្និទ្ធនឹងគ្នាដោយសារតែស្ថិតនៅក្រោមដឹកនាំរបស់មេដឹកនាំអ៊ីរ៉ង់ដែលមិនជ្រុលនិយមសាសនានៅក្នុងអំឡុងពីឆ្នាំ1925 ដល់ឆ្នាំ1979។ ប្រទេសទាំងពីរមានការរីកចំរើនខាងពាណិជ្ជកម្ម ហើយថែមទាំងអាចរួមបញ្ចូលកម្លាំងយោធា ដើម្បីបង្កើតបច្ចេកវិទ្យាថ្មីៗផងដែរ។
ប៉ុន្តែអ្វីគ្រប់យ៉ាងបានផ្លាស់ប្តូរនៅឆ្នាំ 1979 នៅពេលដែលមេដឹកនាំនៃប្រទេសអ៊ីរ៉ង់ត្រូវបានផ្ដួលរំលំដោយមេដឹកនាំសាសនាគឺលោក Ayatollah Khomeini។ អ៊ីរ៉ង់បានក្លាយជាសាធារណរដ្ឋអ៊ីស្លាម ដែលគ្រប់គ្រងដោយច្បាប់អ៊ីស្លាម។ លោក Khomeini បានយ៉ាងឆាប់រហ័សផ្តាច់ទំនាក់ទំនងជាមួយអ៊ីស្រាអែល ក៏ដូចជាសហរដ្ឋអាមេរិក ដោយហៅពួកគេថាជាសាតាំង"តូច" និងសាតាំង"ធំ"។ ទោះបីជាយ៉ាងនេះក៏ដោយ ក្នុងអំឡុងពេលសង្រ្គាមអ៊ីរ៉ង់-អ៊ីរ៉ាក់ អ៊ីស្រាអែលក៏បានជួយផ្គត់ផ្គង់ដល់អ៊ីរ៉ង់នូវឧបករណ៍យោធាផងដែរ ដែលបានរួមចំណែកដ៏សំខាន់ក្នុងការទទួលជ័យជម្នះរបស់អ៊ីរ៉ង់។ ប៉ុន្តែការឃោសនាប្រឆាំងនឹងអ៊ីស្រាអែលបានបន្តនិងកើនឡើងនៅក្នុងប្រទេសអ៊ីរ៉ង់។ គួរកត់សម្គាល់ថានៅឆ្នាំ 1985 បុរសជនជាតិអេហ្ស៊ីបម្នាក់បានសម្លាប់ជនជាតិអ៊ីស្រាអែល 7 នាក់នៅក្នុងវិស្សមកាលសំរាកមួយនៅក្នុងប្រទេសអេហ្ស៊ីប។ ជាការឆ្លើយតប អ៊ីរ៉ង់បានចេញតែមមួយដែលប្រើរូបភាពឃាតករអ្នកសម្លាប់នោះ ហើយក៏ដាក់ឈ្មោះផ្លូវនៅក្នុងរាជធានីរបស់ពួកគេជាឈ្មោះរបស់លោកដែរ ដោយលើកតម្កើងលោកជាវីរបុរសមួយរូប។ ទំនាក់ទំនងរបស់ពួកគេបានបន្តកាន់តែយ៉ាប់យ៉ឺនដោយមេដឹកនាំអ៊ីរ៉ង់បានហៅអ៊ីស្រាអែលថាជាប្រទេសប្រាកដខ្លួនខុសច្បាប់ និងដូចប៉ារ៉ាស៊ីត ហើយត្រូវតែកំចាត់ចោល។
ការបាក់បែកគ្នាដ៏សំខាន់បំផុតគឺមកដល់ពេលដែលប្រធានាធិបតីលោក Ahmadinejad ត្រូវបានជាប់ឆ្នោតក្នុងឆ្នាំ2005។ លោកបានអំពាវនាវឱ្យបញ្ចប់រដ្ឋអ៊ីស្រាអែល និងបានគាំទ្រអង្គការភេរវជនប្រឆាំងអ៊ីស្រាអែលគឺក្រុមសកម្មប្រយុទ្ធហេសបូឡា។ ក្នុងប៉ុន្មានឆ្នាំចុងក្រោយនេះ អ្នកវិទ្យាសាស្ត្រនុយក្លេអ៊ែរអ៊ីរ៉ង់មួយចំនួនត្រូវបានភ្នាក់ងារសំងាត់អ៊ីស្រាអែលធ្វើឃាត ដើម្បីបញ្ឈប់ការអភិវឌ្ឍន៍នុយក្លេអ៊ែរ។