កំពង់ផែកូរ៉េខាងជើងដែលនៅស្ងៀមក្បែរព្រំដែនជាមួយរុស្ស៊ីបានចាប់ផ្តើមដំណើរការឡើងវិញហើយ ដែលបង្កអោយអ្នកជំនាញបានលើកឡើងថា នេះជាការរីកដុះដាលនៃពាណិជ្ជកម្មអាវុធ ឆ្ពោះទៅកាន់ទីតាំងជួរមុខនៅក្នុងប្រទេសអ៊ុយក្រែន ស្របពេលដែលក៏ជួយបង្កើនសេដ្ឋកិច្ចដែលជាប់គាំងគ្រប់គ្រងដោយលោក គីម ជុងអ៊ុនផងដែរ។
1. កប៉ាល់ខ្មោចនៅកំពង់ផែកូរ៉េខាងជើងដំណើរការឡើងវិញធ្វើអោយទីក្រុងគៀវបារម្ភ
យោងតាមសារព័ត៌មាន Bloomberg ចុះផ្សាយថ្ងៃទី២៧ ខែធ្នូបានអោយដឹងថា កំពង់ផែកូរ៉េខាងជើងដែលនៅស្ងៀមក្បែរព្រំដែនជាមួយរុស្ស៊ី បានចាប់ផ្តើមដំណើរការឡើងវិញហើយ ដែលបង្កអោយអ្នកជំនាញបានលើកឡើងថា នេះជាការរីកដុះដាលនៃពាណិជ្ជកម្មអាវុធ ឆ្ពោះទៅកាន់ទីតាំងជួរមុខនៅក្នុងប្រទេសអ៊ុយក្រែន ស្របពេលដែលក៏ជួយបង្កើនសេដ្ឋកិច្ចដែលជាប់គាំងគ្រប់គ្រងដោយលោក គីម ជុងអ៊ុនផងដែរ។
រូបភាពពីផ្កាយរណបនៃកំពង់ផែ Najin ដែលថតពីខែតុលាដល់ខែធ្នូ បង្ហាញពីលំហូរឥតឈប់ឈរនៃកប៉ាល់នៅឯកំពង់ផែនោះ ដោយឃើញកុងតឺន័រដឹកជញ្ជូនរាប់រយត្រូវបានដាក់ទំនិញ និងដកទំនិញ ហើយរថយន្តផ្លូវដែកត្រៀមនឹងដឹកជញ្ជូនទំនិញបន្ត។
សកម្មភាពនេះទំនងជាចាប់ផ្តើមចាប់តាំងពីដើមខែតុលាមក នៅពេលដែលសហរដ្ឋអាមេរិកបានចោទប្រកាន់កូរ៉េខាងជើងពីបទបញ្ជូនអាវុធដល់រុស្ស៊ី។ សេតវិមានបានផ្តល់រូបភាពបង្ហាញថាអាវុធដែលត្រូវបានដឹកជញ្ជូនរាប់ពាន់គីឡូម៉ែត្រពីឃ្លាំងមួយនៅក្នុងទីក្រុង Tikhoretsk របស់រុស្ស៊ី ត្រូវបានប្រើប្រាស់បន្តនៅក្នុងប្រទេសអ៊ុយក្រែន។
-
សំរេចបានការបញ្ជូនអាវុធនុយក្លេអ៊ែររបស់ពូទីនទៅកាន់បេឡារុស្ស
យោងតាមសារព័ត៌មាន Independent ចុះផ្សាយថ្ងៃទី២៧ ខែធ្នូបានអោយដឹងថា ប្រធានាធិបតីបេឡារុស្សលោក Alexander Lukashenko បានប្រកាសថា ការដឹកជញ្ជូនអាវុធនុយក្លេអ៊ែរយុទ្ធសាស្ត្រសម្រាប់ដាក់ពង្រាយនៅក្នុងប្រទេសរបស់លោកបានបញ្ចប់រួចរាល់ហើយ ដែលនេះជាការនាំចេញដំបូងរបស់រុស្ស៊ីនៅក្រៅព្រំដែនរបស់ខ្លួន។
នេះបានជំរុញឲ្យមានការព្រួយបារម្ភក្នុងប្រទេសប៉ូឡូញ និងប្រទេសផ្សេងទៀតក្នុងតំបន់។
ការដឹកជញ្ជូនអាវុធនុយក្លេអ៊ែរយុទ្ធសាស្រ្តត្រូវបានបញ្ចប់រួចរាល់កាលពីខែតុលា នេះបើតាមលោក Lukashenko បានបង្ហាញឡើងនៅក្នុងកិច្ចប្រជុំនៃប្លុកសេដ្ឋកិច្ចដែលដឹកនាំដោយទីក្រុងម៉ូស្គូនៅទីក្រុង St Petersburg។ ប៉ុន្តែលោកមិនបានចែករំលែកព័ត៌មានលម្អិតបន្ថែមទៀតទាក់ទងនឹងបរិមាណអាវុធដែលបានបញ្ជូន និងទីតាំងដាក់ពង្រាយជាក់លាក់របស់ពួកគេនោះទេ។
លោក Lukashenko បង្ហាញអំពីភាពត្រឹមត្រូវនៃការធ្វើជាម្ចាស់ផ្ទះអាវុធនុយក្លេអ៊ែររបស់រុស្ស៊ីលើទឹកដីបេឡារុស្ស ថានេះជាការដើម្បីរារាំងប្រឆាំងនឹងការឈ្លានពានរបស់ប៉ូឡូញដែលជាប្រទេសសមាជិកណាតូមួយផងដែរ។
-
អ៊ុយក្រែនស្វែងរកការបញ្ចប់កិច្ចព្រមព្រៀងពាណិជ្ជកម្មសេរីជាមួយបេឡារុស្ស
យោងតាមសារព័ត៌មាន RadioFreeEurope ចុះផ្សាយថ្ងៃទី២៥ ខែធ្នូបានអោយដឹងថា រដ្ឋមន្ដ្រីខុទ្ទកាល័យលោក Taras Melnychuk បាននិយាយកាលពីថ្ងៃទី25 ខែធ្នូថា រដ្ឋាភិបាលអ៊ុយក្រែនបានស្នើទៅសភាឱ្យបញ្ចប់កិច្ចព្រមព្រៀងពាណិជ្ជកម្មសេរីជាមួយប្រទេសបេឡារុស ដែលបានគាំទ្រដល់ការឈ្លានពានយ៉ាងពេញលេញរបស់រុស្ស៊ីមកលើអ៊ុយក្រែនដែលបានចាប់ផ្តើមនៅក្នុងខែកុម្ភៈ ឆ្នាំ 2022 ។
លោកបាននិយាយថា ជំហាននៃការលុបចោលកិច្ចព្រមព្រៀងនេះត្រូវបានធ្វើឡើងដោយសារទាក់ទងនឹងការផ្លាស់ប្តូរនៃស្ថានភាពជាមូលដ្ឋាន-នោះគឺជាការចូលរួមរបស់សាធារណរដ្ឋបេឡារុស្សដែលបានប្រើប្រាស់កម្លាំងខុសច្បាប់ប្រឆាំងនឹងអ៊ុយក្រែន" ។
រដ្ឋាភិបាលបានស្នើឱ្យបញ្ចប់កិច្ចព្រមព្រៀងពាណិជ្ជកម្មសេរីនៃខែធ្នូ ឆ្នាំ1992 និងពិធីសារចំនួនពីរដែលទាក់ទងនឹងសន្ធិសញ្ញានេះ។ បន្ទាប់ពីការលុកលុយរបស់រុស្ស៊ី អ៊ុយក្រែនបានផ្អាកទំនាក់ទំនងពាណិជ្ជកម្មជាមួយទីក្រុង Minsk ។
