មេបញ្ជាការជាន់ខ្ពស់អ៊ីរ៉ង់ម្នាក់ត្រូវបានសម្លាប់ក្នុងការវាយប្រហាររបស់អ៊ីស្រាអែលនៅប្រទេសស៊ីរី នេះបើតាមប្រព័ន្ធផ្សព្វផ្សាយអ៊ីរ៉ង់បានរាយការណ៍ឡើង។ លោក Seyyed Razi Mousavi គឺជា"ទីប្រឹក្សាយោធាដែលមានបទពិសោធន៍ខ្ពស់" ម្នាក់ របស់កងឆ្មាំបដិវត្តន៍អ៊ីស្លាម។
-
អ៊ីស្រាអែលសម្លាប់មេបញ្ជាករអ៊ីរ៉ង់នៅស៊ីរី
យោងតាមសារព័ត៌មាន BBC ចុះផ្សាយថ្ងៃទី២៥ ខែធ្នូបានអោយដឹងថា មេបញ្ជាការជាន់ខ្ពស់អ៊ីរ៉ង់ម្នាក់ត្រូវបានសម្លាប់ក្នុងការវាយប្រហាររបស់អ៊ីស្រាអែលនៅប្រទេសស៊ីរី នេះបើតាមប្រព័ន្ធផ្សព្វផ្សាយអ៊ីរ៉ង់បានរាយការណ៍ឡើង។ លោក Seyyed Razi Mousavi គឺជា"ទីប្រឹក្សាយោធាដែលមានបទពិសោធន៍ខ្ពស់" ម្នាក់ របស់កងឆ្មាំបដិវត្តន៍អ៊ីស្លាម។
លោកត្រូវបានរាយការណ៍ឡើងថាត្រូវបានសម្លាប់នៅក្នុងការវាយប្រហារតាមអាកាសមួយមកលើតំបន់ Sayyida Zeinab ភាគអាគ្នេយ៍នៃទីក្រុង Damascus ។
អ៊ីស្រាអែលបានធ្វើការប្រតិបត្តិការយោធាវាយប្រហារក្នុងប្រទេសស៊ីរីជាច្រើនឆ្នាំមកហើយប្រឆាំងនឹងគោលដៅដែលពួកគេយល់ឃើញថាមានទំនាក់ទំនងជាមួយនឹងប្រទេសអ៊ីរ៉ង់។
ខណៈដែលកងកម្លាំងអ៊ីរ៉ង់មានវត្តមាននៅក្នុងប្រទេសស៊ីរីជាយូរមកហើយ ចាប់តាំងពីដំណាក់កាលដំបូងនៃសង្គ្រាមស៊ីវិលរបស់ស៊ីរីម្ល៉េះ ដែលពួកគេបានជួយគាំទ្ររបបរបស់លោកប្រធានាធិបតី Bashar al-Assad ប្រឆាំងនឹងការបះបោរលើការគ្រប់គ្រងរបស់លោក។
-
អ៊ីស្រាអែលវាយប្រហារវិហារសាសនានៅភាគខាងត្បូងលីបង់
យោងតាមសារព័ត៌មាន Doha News ចុះផ្សាយថ្ងៃទី២៤ ខែធ្នូបានអោយដឹងថា កងកម្លាំងអ៊ីស្រាអែលបានកំណត់គោលដៅវាយប្រហារលើវិហារ Deir Mimas ដែលជាទីកន្លែងប្រវត្តិសាស្ត្រនិងគោរពបូជាក្នុងប្រទេសលីបង់មានអាយុកាលជាង៦០០ឆ្នាំមកហើយកាលពីនៅមួយថ្ងៃមុនថ្ងៃបុណ្យណូអែលកន្លងទៅនេះ ដែលនេះជាសញ្ញាថ្មីមួយបង្ហាញពីការឈ្លានពានរបស់អ៊ីស្រាអែលប្រឆាំងនឹងទីតាំងសាសនា និងជម្រកជនស៊ីវិល។
ទីតាំងប្រវត្តិសាស្ត្រនេះបានទទួលការស្តារឡើងវិញជាច្រើនលើក ជាមួយនឹងការស្តារឡើងវិញចុងក្រោយបំផុតគឺចាប់ផ្តើមនៅឆ្នាំ 2008 ដែលផ្តល់មូលនិធិឡើងដោយប្រទេសកាតា បន្ទាប់ពីការកម្ទេចចោលទាំងស្រុងក្នុងអំឡុងសង្គ្រាមអ៊ីស្រាអែលឆ្នាំ 2006 នៅក្នុងប្រទេសលីបង់។
កាលពីថ្ងៃព្រហស្បតិ៍ក្រុមហេសបូឡាហ៍បានបើកការវាយប្រហារលើទីតាំងទ័ពអ៊ីស្រាអែលជាច្រើនកន្លែង និងការតាំងទីលំនៅនៅភាគខាងជើងអ៊ីស្រាអែល។ នេះជាការសងសឹកចំពោះការវាយប្រហារមុនរបស់អ៊ីស្រាអែលលើតំបន់លំនៅឋាននៅភាគខាងត្បូងប្រទេសលីបង់។
-
អាមេរិកវាយប្រហារលើទីតាំងកងពលតូចហេសបូឡានៅអ៊ីរ៉ាក់
យោងតាមសារព័ត៌មាន CNN ចុះផ្សាយថ្ងៃទី២៦ ខែធ្នូបានអោយដឹងថា សេតវិមានបាននិយាយថា យោធាអាមេរិកបានធ្វើការវាយប្រហារតាមអាកាសមកលើទីតាំងចំនួនបី ដែលប្រើប្រាស់ដោយកងពលតូច Kataib Hezbollah មានមូលដ្ឋាននៅប្រទេសអ៊ីរ៉ាក់ និង"ក្រុមពាក់ព័ន្ធ"របស់ពួកគេកាលពីយប់ថ្ងៃច័ន្ទ បន្ទាប់ពីការវាយប្រហារមួយបានធ្វើឱ្យទាហានអាមេរិកបីនាក់រងរបួស ហើយបន្សល់ទុកម្នាក់ស្ថិតក្នុងស្ថានភាពធ្ងន់ធ្ងរនៅឯមូលដ្ឋានទ័ពអាកាស Erbil។
សេចក្តីថ្លែងការណ៍របស់ទីបញ្ជាការកណ្តាលរបស់សហរដ្ឋអាមេរិកបាននិយាយថា ការវាយតម្លៃដំបូងបង្ហាញថា ការវាយប្រហារតាមអាកាសរបស់សហរដ្ឋអាមេរិកដែលបញ្ជាដោយប្រធានាធិបតីលោក Joe Biden "ទំនងជាបានសម្លាប់ពួកសកម្មប្រយុទ្ធកងពលតូច Kataib Hezbollah មួយចំនួន" ។
