ក្រសួងពាណិជ្ជកម្មកម្ពុជា បានរកឃើញ មានការប្រើប្រាស់ស្លាកសញ្ញាពាណិជ្ជកម្ម លើ សំបកវេចខ្ចប់ផលិតផល ជារូបភាពប្រាសាទបាយ័ន និងប្រាសាទអង្គរវត្ត នៅលើសំបកវេចខ្ចប់ផលិតផល សរសៃគុយទាវបាញ់ កាញ់ក្រៀម និងមុខទំនិញមួយចំនួនទៀត ដែលត្រូវបានដាក់លក់លើទីផ្សារនានា តាមហាងលក់ទំនិញ និងតាមទីផ្សារអនឡាញ នៅរដ្ឋកាលីហ្វ័រញ៉ា និងនៅរដ្ឋដទៃទៀត ក្នុងសហរដ្ឋអាមេរិក ដោយពុំមានការអនុញ្ញាតពីអាជ្ញាធរមានសមត្ថកិច្ចរបស់កម្ពុជា។
តាមសេចក្តីប្រកាសរបស់ក្រសួងពាណិជ្ជកម្មកម្ពុជា ដែលទើបផ្សព្វផ្សាយដល់អ្នកសារព័ត៌មាននៅថ្ងៃទី២១ ខែធ្នូ នេះ បានឲ្យដឹងថា រយៈពេលកន្លងមក (ឆ្នាំ២០២០ និង២០២១) ក្រសួងពាណិជ្ជកម្ម បានសហការជាមួយស្ថានទូតកម្ពុជា បានទប់ស្កាត់ និងដោះស្រាយដោយជោគជ័យនូវករណ៏បន្លំប្រើប្រាស់សញ្ញាជាតិ រូបទង់ជាតិ និងនិមិត្តរូបជាតិនានា ដាក់នៅលើផលិតផល ដែលតាំងលក់នៅលើទីផ្សារអន្តរជាតិ ដោយក្រុមហ៊ុន និងបុគ្គលមួយចំនួន ដោយខុសច្បាប់ជាតិ និងសន្ធិសញ្ញាអន្តរជាតិ។ តាមរយៈវិធានការនេះ គឺក្រសួងពាណិជ្ជកម្ម, ក្រសួងការបរទេស និងស្ថានឯកអគ្គរាជទូតកម្ពុជា បានស្នើសុំការផ្តល់កិច្ចសហការ និងធ្វើអន្តរាគមន៍ហាមឃាត់នូវការដាក់ស្លាកសញ្ញា និងការធ្វើចរាចរទំនិញខុសច្បាប់ទាំងនោះផងដែរ។
ដោយឡែក នៅពេលថ្មីៗនេះ ក្រសួងបានសង្កេតឃើញថា នៅមានការប្រើប្រាស់ស្លាកសញ្ញាពាណិជ្ជកម្ម លើសំបកវេចខ្ចប់ផលិតផល ជារូបភាព ប្រាសាទបាយ័ន និងប្រាសាទអង្គរវត្ត នៅលើសំបកវេចខ្ចប់ផលិតផល សរសៃគុយទាវបាញ់កាញ់ក្រៀម និងមុខទំនិញខ្លះទៀត ដែលបានដាក់លក់លើទីផ្សារនានា តាមហាងលក់ ទំនិញ និងតាមទីផ្សារអនឡាញ នៅរដ្ឋកាលីហ្វ័រញ៉ា និងនៅរដ្ឋដទៃទៀត ក្នុងសហរដ្ឋអាម៉េរិក ប្រព្រឹត្តិដោយក្រុមហ៊ុន SENG CHEANG MONG FOOD CORP ដោយពុំមានការអនុញ្ញាតពីអាជ្ញាធរមានសមត្ថកិច្ចរបស់កម្ពុជា។ ហើយចំពោះបញ្ហានេះ ក្រសួងពាណិជ្ជកម្ម បាននិងកំពុងសហការជាមួយក្រសួង និងស្ថាប័នមានសមត្ថកិច្ច ដើម្បីមានវិធានការផ្លូវច្បាប់ លើការប្រព្រឹត្តល្មើសរបស់ក្រុមហ៊ុននេះ ដែលមានទីតាំងនៅរដ្ឋកាលីហ្វ័រញ៉ា សហរដ្ឋអាម៉េរិក ។
ជាមួយគ្នានោះ ក្រសួងពាណិជ្ជកម្មបានអរគុណដល់សាធារណជនទាំងអស់ ចំពោះការផ្តល់ព័ត៌មាននានា ទាក់ទងនឹងអំពើល្មើសខាងលើ ក៏ដូចជាបទល្មើសដទៃទៀត។ ហើយក្រសួង ក៏បាននិងកំពុងណែនាំដល់អនុព័ន្ធពាណិជ្ជកម្ម និងតំណាងសភាពាណិជ្ជកម្មនៅក្រៅប្រទេស បន្តការស្រាវជ្រាវ ដើម្បីចាត់វិធានការតាមនីតិវិធីច្បាប់៕
