គម្រោងជំនួយថ្មីមួយ ដែលមានទឹកប្រាក់ប្រមាណ៣សែនដុល្លារអាមេរិក ត្រូវបានរាជរដ្ឋាភិបាលជប៉ុន បានផ្តល់ជូនកម្ពុជា សម្រាប់ការងារជួសជុលឡើងវិញ ក៏ដូចជាការអភិវឌ្ឍធនធានមនុស្ស លើតំបន់រមណីយដ្ឋានសំបូរព្រៃគុក ដែលមានឈ្មោះថា “គម្រោងអភិវឌ្ឍន៍ធនធានមនុស្សក្នុងការថែរក្សា និងជួសជុលតំបន់រមណីយដ្ឋានសំបូរព្រៃគុក”។ នេះបើតាមសេចក្តីប្រកាសព័ត៌មានរួមពីស្ថានទូតជប៉ុនប្រចាំកម្ពុជា និងក្រសួងវប្បធម៌ នៅថ្ងៃទី១២ ខែធ្នូ ឆ្នាំ២០២៣នេះ។
ស្ថាប័នទាំងពីនេះ បានបញ្ជាក់យ៉ាងនេះថា រដ្ឋាភិបាលជប៉ុន បានសម្រេចផ្ដល់គម្រោងជំនួយថ្មី ដែលមានទឹកប្រាក់ស្មើនឹង៣០ម៉ឺនដុល្លាសហរដ្ឋអាមេរិក សម្រាប់ការងារជួសជុលឡើងវិញ ក៏ដូចជាការអភិវឌ្ឍធនធានមនុស្ស លើតំបន់រមណីយដ្ឋានសំបូរព្រៃគុក ដែលមានឈ្មោះថា “គម្រោងអភិវឌ្ឍន៍ធនធានមនុស្សក្នុងការថែរក្សា និងជួសជុលតំបន់រមណីយដ្ឋានសំបូរព្រៃគុក”។
គួរបញ្ជាក់ថា រដ្ឋាភិបាលជប៉ុន បានផ្តល់ជំនួយលើសកម្មភាពនានាក្នុងការថែរក្សា និងជួសជុលតំបន់ រមណីយដ្ឋានសំបូរព្រៃគុក ក្នុងរូបភាពចម្បងតាមរយៈគម្រោងមូលនិធិដៃគូ ដោយមានទឹកប្រាក់សរុបចំនួន៦៣៨ ៩៦៧ដុល្លាសហរដ្ឋអាមេរិក។ បើនិយាយឱ្យលម្អិត រដ្ឋាភិបាលជប៉ុនបានជួយលើសម្ភារៈ និងឧបករណ៍ ដេញថ្លៃនានា សម្រាប់ប្រើប្រាស់លើការងារជួសជុលឡើងវិញ ដែលមានរយៈពេល៤ឆ្នាំ ចាប់ពីឆ្នាំ២០០៩ ដល់ ឆ្នាំ២០១២។
ចាប់ពីឆ្នាំ២០២០ ដល់ឆ្នាំ២០២៤ រដ្ឋាភិបាលជប៉ុន បាននិងកំពុងសាងសង់អគារបណ្តុះបណ្តាល និងផ្តល់សម្ភារៈ និងឧបករណ៍មួយចំនួនសម្រាប់ការងារជួសជុលអភិរក្សនៅរមណីយដ្ឋានសំបូរព្រៃគុក។ ហើយជឿជាក់ថា តាមរយៈគម្រោងដែលបានរៀបរាប់ទាំងនេះ ព្រមទាំងគម្រោងជំនួយថ្មី នឹងជួយផ្តល់សមត្ថភាពដល់សិស្ស និងអ្នកជំនាញវ័យក្មេងកម្ពុជា បានរៀនជំនាញវិជ្ជាជីវៈ កម្រិតខ្ពស់ ព្រមទាំងទទួលបានចំណេះដឹងតាមរយៈកម្មវិធីកសាងសមត្ថភាព និងការបណ្តុះបណ្តាលការងារដោយការអនុវត្តជាក់ស្តែង។
ស្ថានទូជប៉ុនសង្ឃឹមថា គម្រោងជំនួយថ្មីនេះ នឹងរួមចំណែកដល់ការអនុវត្តប្រកបដោយប្រសិទ្ធិភាព និងរលូន ក្នុងការងារថែរក្សា និងជួសជុលតំបន់រមណីយដ្ឋានសំបូរព្រៃគុក។
គួររំលឹកថា ប្រាសាទសំបូរព្រៃគុក ត្រូវបានដាក់បញ្ចូលជាសម្បត្តិបេតិកភណ្ឌពិភពលោក នៅថ្ងៃទី០៨ ខែកក្តដា ឆ្នាំ២០១៧ នៅទីក្រុងក្រាស្កូវ ប្រទេសប៉ូឡូញ។
ប្រាសាទសំបូរព្រៃគុក គឺជាអតីតរាជធានីខ្មែរ ឥសានបុរៈ ដ៏ល្បីរន្ទឺនាសតវត្សទី៧ យកតាមព្រះនាម ព្រះបាទឥសានវរ្ម័នទី១ ជារាជធានីនៃអាណាចក្រចេនឡា ដែលមានលក្ខណៈពិសេសជាច្រើន ខុសប្លែកពីប្រាសាទនានា។ បើមើលលើតួប្រាសាទ ភាគច្រើនកសាងអំពីឥដ្ឋ និងមានតួរហូតទៅដល់៨ជ្រុង ឯគំរូស្ថាបត្យកម្ម ចម្លាក់តុបតែងលម្អលើជញ្ជាំង និងផ្តែរទ្វារ ជាប្រភពព័ត៌មានដ៏សំបូរបែបពីគំនិត និងជំនឿនៃការប្រណិប័តន៍សាសនានាសម័យចេនឡា។
ក្រុមប្រាសាទសំបូរព្រៃគុក បានក្លាយទៅជាស្ថានីយបុរាណសម័យចេនឡាដ៏សំខាន់ ដែលបន្សល់ទុកមកទល់នឹងសព្វថ្ងៃ បង្ហាញអំពីអរិយធម៌នៃអាណាចក្រមួយនេះ៕