ប្រទេស Greenland គឺជាកោះមួយដែលធំជាងគេបង្អស់នៅលើពិភពលោក។ ប្រមាណជា៨០%នៃផ្ទៃក្រឡាសរុបរបស់វាត្រូវបានគ្រប់ដណ្តប់ដោយផ្ទាំងទឹកកកទាំងស្រុង ដែលមានប្រមាណជា 1,752,390គីឡូម៉ែត្រការ៉េ ធំជាងគេបំផុតនៅលើពិភពលោក។ 

ចំណែកផ្ទៃក្រឡាដែលគ្មានផ្ទាំងទឹកកកគឺមានទំហំធំប្រហែលនឹងប្រទេសស៊ុយអែតដែរ ប៉ុន្តែមានត្រឹមតែផ្ទៃក្រឡាតូចប៉ុណ្ណោះដែលអាចដាំដុះដំណាំបាន។ Greenland មានទីតាំងស្ថិតនៅក្នុងចក្រភពដាណឺម៉ាកនៃទ្វីបអាមេរិកខាងជើង ប៉ុន្តែបើតាមទីតាំងភូមិសាស្រ្តប្រទេសនេះគឺជាផ្នែកនៃទ្វីបអឺរ៉ុបនោះទេ។ ប្រទេស Greenland មានប្រជាជនរស់នៅចាប់តាំងពី5000ឆ្នាំមុនមកម្ល៉េះ និងមកទល់ពេលនេះបានស្វ័យគ្រប់គ្រងដោយខ្លួនឯងថ្វីត្បិតតែជាផ្នែកមួយរបស់ចក្រភពដាណឺម៉ាកក៏ពិតមែន។

កាលពីប្រមាណជា2.5លានឆ្នាំមុន ប្រទេស Greenland ពិតជាគ្របដណ្តប់ដោយវាលពណ៌បៃតងពិតដូចជាឈ្មោះរបស់វាយ៉ាងដូច្នោះឯង ប៉ុន្តែដោយសារតែការថយចុះនៃកំរិតឧស្ម័នកាបូនិចនៅក្នុងស្រទាប់បរិយាកាស ទើបធ្វើអោយប្រទេសមានអាកាសធាតុចុះត្រជាក់មកទល់ពេលនេះ និងបង្កើ់តបានជាផ្ទាំងទឹកកកក្រាស់ៗដែលមានកំរាសប្រហែលជា២ម៉ាយ។

ម្យ៉ាងទៀតប្រទេស Greenland មានទីតាំងស្ថិតនៅក្នុងតំបន់ប៉ូលខាងជើង ដែលមានសីតុណ្ហភាពទាបទើបធ្វើអោយនៅរដូវរងារធ្លាក់ចុះនៅប្រមាណជា -50 អង្សា និងសីតុណ្ហភាពនៅរដូវក្តៅគឺប្រមាណជា 10 ទៅ 15 អង្សា។ ប៉ុន្តែដោយសារតែទំហំធំរបស់វា ម្ល៉ោះហើយស៊ីណ្ហភាពអាចមានកំរិតខុសៗគ្នាទៅតាមទីកន្លែងនីមួយៗនៅក្នុងប្រទេស។

ប្រទេស Greenland មានប្រជាជនប្រមាណជា 56,600 នាក់ដែលក្នុងនោះមានប្រជាជនប្រមាណជា 19,600 នាក់រស់នៅក្នុងរដ្ឋធានី Nuuk នៃប្រទេសនេះ។ សេដ្ឋកិច្ចនៃប្រទេសនេះគឺពឹងផ្អែកមួយផ្នែកធំលើការប្រមាញ់ និងនេសាទ ខណៈដែលប្រភពចំណូលមួយផ្នែកទៀតគឺបានមកពីវិស័យទេសចរណ៍។