អ៊ីស្រាអែលចាប់ផ្តើមធ្វើអោយជន់លិចផ្លូវរូងក្រោមដីរបស់ក្រុមហាម៉ាសនៅភាគខាងជើងហ្គាហ្សាជាមួយនឹងទឹកសមុទ្រមេឌីទែរ៉ាណេដែលធ្វើអោយអាមេរិកមានការសង្ស័យឡើងពីលទ្ធភាពអាចបង្កគ្រោះមហន្តរាយដល់បរិស្ថានធ្ងន់ធ្ងរ។ ជាមួយនឹងក្រុមហាម៉ាសបានប្រកាសឡើងពីការបង្កើត"ក្រុមសកម្មជន Al-Aqsa Flood" នៅក្នុងប្រទេសលីបង់ ទីតាំងជួរមុខភាគខាងជើងអាចនឹងត្រូវបើកចំហសម្រាប់អ៊ីស្រាអែលនៅក្នុងខណៈការរំខានពីលីបង់យ៉ាងធ្ងន់ធ្ងរ ស្របពេលជាមួយនឹងបញ្ហាខ្លះៗរបស់មន្ទីរបញ្ចកោណបរាជ័យក្នុងការឆ្លើយតបទៅនឹងប្រទេសយេម៉ែន និងការវាយប្រហារកាន់តែខ្លាំងឡើងលើតំបន់ Khan Yunis ជាមួយនឹងការលុកលុយរបស់អ៊ីស្រាអែលទៅលើតំបន់ហ្គាហ្សាភាគខាងត្បូង ហើយលោកពូទីនគ្រោងនឹងធ្វើដំណើរទស្សនកិច្ចនៅកាន់អារ៉ាប៊ីសាអូឌីត និងអារ៉ាប់រួមសម្រាប់ការសម្របសម្រួល បន្ទាប់ពីដំណើរទស្សនកិច្ចរបស់ប្រធានាធិបតីអ៊ីរ៉ង់ទៅកាន់ទីក្រុងមូស្គូ! តើ​សង្គ្រាម​ក្នុង​តំបន់​នឹងអាច​ផ្ទុះ​ឡើង​ដោយ​សារ​តែ​សង្រ្គាម​នៅ​ហ្គាហ្សា​ដែររឺទេ?

1. អ៊ីស្រាអែលបង្ក​ជន់លិច​ផ្លូវរូងក្រោមដី​​ក្រុម​ហាម៉ាស​ដោយទឹកសមុទ្រ

យោងតាមសារព័ត៌មាន The Wall Street Journal ចុះផ្សាយថ្ងៃទី០៤ ខែធ្នូបានអោយដឹងថា អ៊ីស្រាអែលបានប្រមូលផ្តុំប្រព័ន្ធបូមដ៏ធំដែលអាចប្រើប្រាស់ដើម្បីបង្កជន់លិចក្នុងបណ្តាញផ្លូវរូងក្រោមដីដ៏ធំរបស់ក្រុមសកម្មប្រយុទ្ធហាម៉ាសបាននៅពីក្រោមតំបន់ហ្គាហ្សាស្ទ្រីបនោះជាមួយនឹងទឹកសមុទ្រ ដែលជាយុទ្ធសាស្ត្រអាចបំផ្លាញផ្លូវរូងក្រោមដី និងបង្ខំយុទ្ធជនដែលលាក់ខ្លួននៅទីនោះអោយចេញមកបាន ប៉ុន្តែវានឹងបង្កហនិភ័យដល់ការផ្គត់ផ្គង់ទឹកប្រើប្រាស់ជារួមនៅក្នុងតំបន់ហ្គាហ្សា នេះបើតាមមន្រ្តីអាមេរិកលើកឡើង។

កងកម្លាំងការពារអ៊ីស្រាអែលបានបញ្ចប់ការប្រមូលផ្តុំម៉ាស៊ីនបូមទឹកសមុទ្រដ៏ធំដែលមានចម្ងាយប្រហែលជាមួយម៉ាយពីភាគខាងជើងនៃជំរុំជនភៀសខ្លួន Al-Shati នៅពាក់កណ្តាលខែមុននេះ។ យ៉ាងហោចណាស់រៀងរាល់ម៉ាស៊ីនបួមទឹកទាំង៥គ្រឿង មានម៉ាស៊ីនបូមទឹកមួយដែលអាចនាំយកទឹកពីសមុទ្រមេឌីទែរ៉ាណេ និងបញ្ជូនទឹករាប់ពាន់ម៉ែត្រគូបក្នុងមួយម៉ោងចូលទៅក្នុងផ្លូវរូងក្រោមដីបាន ដែលអាចនឹងបង្កជន់លិចខាងក្នុងនោះត្រឹមរយៈពេលប៉ុន្មានសប្តាហ៍។

2. អាមេរិក​បដិសេធ​មិន​ឆ្លើយតប​នឹង​ក្រុម​ទាហាន​យេម៉ែន និង​​ហាម៉ាស​នៅ​លីបង់

យោងតាមសារព័ត៌មាន Politico ​​​ចុះផ្សាយថ្ងៃទី០៤ ខែធ្នូបានអោយដឹងថា ការប្រយុទ្ធគ្នារយៈពេលជាច្រើនម៉ោងដែលពាក់ព័ន្ធនឹងនាវាពាណិជ្ជកម្មអាមេរិកនៅសមុទ្រក្រហមកាលពីចុងសប្តាហ៍នេះ បានធ្វើឱ្យមន្ត្រីអាមេរិកមួយចំនួនមានការព្រួយបារម្ភថារដ្ឋបាលលោក Biden កំពុងតែមើលស្រាលចំពោះការគំរាមកំហែងដ៏ធំមកលើកងកម្លាំងអាមេរិកនេះ។

កាលពីសប្តាហ៍មុន នាវាចម្បាំងរបស់កងទ័ពជើងទឹកអាមេរិកមួយគ្រឿងបានព្យាយាមឆ្លើយតបចូលទៅជួយសង្គ្រោះនាវាពាណិជ្ជកម្មចំនួនបីគ្រឿងនៅដាច់ដោយឡែកពីគ្នាកាលពីថ្ងៃអាទិត្យមុន ខណៈដែលក្រុមឧទ្ទាម Houthi នៃប្រទេសយេម៉ែនបានធ្វើការបាញ់មីស៊ីល និងដ្រូនមកលើពួក​​​វាទាំងនោះ។ នាវា USS Carney របស់អាមេរិកបានបាញ់ទម្លាក់ដ្រូនអស់ចំនួនបីគ្រឿងនៅខណៈនោះ។

អ្នកនាំពាក្យក្រសួងការពារជាតិ និងមន្ត្រីរដ្ឋបាលកំពូល រួមទាំងទីប្រឹក្សាសន្តិសុខជាតិ លោក Jake Sullivan បាននិយាយថា សហរដ្ឋអាមេរិក "មិនអាចវាយតម្លៃ" បានទេថា នាវា Carney ពិតជាគោលដៅនៃការវាយប្រហារនោះ។ ខណៈមន្ត្រីបួននាក់ផ្សេងទៀតបានលើកឡើងថាកងកម្លាំងជើងទឹករបស់សហរដ្ឋអាមេរិកពិតជាកំពុងស្ថិតនៅក្រោមការគំរាមកំហែងយ៉ាងច្បាស់នៅសមុទ្រក្រហម និងឈូងសមុទ្រពែក្ស។

3. ពូទីនធ្វើដំណើរទៅកាន់អារ៉ាប៊ីសាអូឌីត និងអារ៉ាប់រួមនៅថ្ងៃពុធ

យោងតាមសារព័ត៌មាន The New York Times ចុះផ្សាយថ្ងៃទី០៥ ខែធ្នូបានអោយដឹងដឹងថា វិមានក្រឹមឡាំងបានប្រកាសថា លោកប្រធានាធិបតីវ្ល៉ាឌីមៀ ពូទីន នឹងធ្វើដំណើរទស្សនកិច្ចដ៏កម្រមួយទៅកាន់មជ្ឈិមបូព៌ានៅថ្ងៃពុធ ដោយនិយាយថា លោកនឹងពិភាក្សាអំពីទំនាក់ទំនងទ្វេភាគី បញ្ហាប្រេង និងកិច្ចការអន្តរជាតិនៅក្នុងប្រទេសអារ៉ាប៊ីសាអូឌីត និងអារ៉ាប់រួម។

ដំណើរ​ទស្សនកិច្ច​នេះ​គឺ​ជា​ផ្នែក​មួយ​នៃស៊េរី​កិច្ច​ប្រជុំ​ការទូត​​ដែល​មេដឹកនាំ​រុស្ស៊ី​នឹង​ធ្វើ​ឡើងនៅក្នុង​សប្តាហ៍​នេះ។ ដោយនៅថ្ងៃព្រហស្បតិ៍លោកពូទីននឹងធ្វើជាម្ចាស់ផ្ទះទទួលប្រធានាធិបតីលោក Ebrahim Raisi នៃប្រទេសអ៊ីរ៉ង់នៅទីក្រុងម៉ូស្កូផងដែរ ដែលលោកជាតួអង្គមេដឹកនាំសំខាន់មួយទៀតនៅក្នុងតំបន់។

លោក ពូទីន ដែលមិនបានធ្វើដំណើរចេញឆ្ងាយក្រៅពីប្រទេសចិន អ៊ីរ៉ង់ និងអតីតរដ្ឋសហភាពសូវៀត ចាប់តាំងពីដំណើរការលុកលុយលើប្រទេសអ៊ុយក្រែនកាលពីខែកុម្ភៈ ឆ្នាំ 2022 កន្លងទៅនេះ បានធ្វើទស្សនកិច្ចនៅអារ៉ាប់រួម និងអារ៉ាប៊ីសាអូឌីតនៅថ្ងៃពុធនេះ។