ប្រមុខរាជរដ្ឋាភិបាលកម្ពុជា សម្តេចមហាបវរធិបតី ហ៊ុន ម៉ាណែត បានសម្រេចបញ្ឈប់រាល់គម្រោងរោងចក្រផលិតថាពលអគ្គិសនីដើរដោយថាមពលធ្យូងថ្មទាំងអស់ ដើម្បីចូលរួមលើកកម្ពស់បរិស្ថាន និងការប្រែប្រួលអាកាសធាតុ ដែលជាកង្វល់រួមរបស់ពិភពលោកទាំងមូល នេះជាការបញ្ជាក់នៅក្នុងពិធីបិទស្ទឹង និងបើកការដ្ឋានសាងសង់ទំនប់វារីអគ្គិសនី តាតៃលើ ដែលស្ថិតនៅក្នុងស្រុកថ្មបាំង ខេត្តកោះកុង នាព្រឹកថ្ងៃទី៣០ ខែវិច្ឆិកា នេះ។
សម្តេចធិបតី ហ៊ុន ម៉ាណែត បានបញ្ជាក់ថា ដើម្បីកសាងថាមពលស្អាត កម្ពុជាសម្រេចបញ្ឈប់រាល់គម្រោងស្នើសុំវិនិយោគលើការអភិវឌ្ឍរោងចក្រផលិតអគ្គិសនីផលិតដោយធ្យូងថ្ម និងពិនិត្យលទ្ធភាពដាក់ឱ្យរោងចក្រផលិតអគ្គិសនីផលិតដោយធ្យូងថ្ម ដែលមានស្រាប់ បញ្ឈប់ដំណើរការលើអាជីវកម្មមុនការកំណត់របស់ខ្លួន។ បន្ថែមពីលើនេះ សម្តេចបានឱ្យក្រសួងរ៉ែ និងថាមពល ពិភាក្សាជាមួយក្រុមហ៊ុនវិនិយោគ ពិនិត្យលទ្ធភាពប្តូរគម្រោងវិនិយោគផលិតអគ្គិសនីដុតធ្យូងថ្មនេះ ទៅជាគម្រោងផលិតអគ្គិសនីដុតឧស្ម័ន LNG ដែលបំភាយឧស្ម័នកាបូនតិចតួចវិញ។
បើតាមសម្តេចនាយករដ្ឋមន្ត្រី ការសម្រេចនេះស្របតាមការប្រកាស របស់រាជរដ្ឋាភិបាលកម្ពុជា តំណាងដោយក្រសួងបរិស្ថាន ដែលបានប្រកាសនៅក្នុងសន្និសីទ ស្តីពីការប្រែប្រួលអាកាសធាតុ របស់អង្គការសហប្រជាជាតិ COP 26 នៅទីក្រុង Glasgow ចក្រភពអង់គ្លេស កាលពីខែវិច្ឆិកា ឆ្នាំ២០២១ថា កម្ពុជានឹងបញ្ឈប់ធ្វើការអភិវឌ្ឍរោងចក្រផលិតអគ្គិសនីដុតធ្យូងថ្ម។
សម្តេចបានថ្លែងយ៉ាងដូច្នេះថា “បើសិនជានរណាចង់ធ្វើការវិនិយោគ ធ្វើរោងចក្រផលិតអគ្គិសនីដើរដោយធ្យូងថ្មនៅកម្ពុជា កុំមកនាំតែខាតលុយជិះយន្តហោះទេ។ យើងបានប្រកាសហើយ នៅក្នុងសន្និសីទរបស់អង្គការសហប្រជាជាតិ COP 26 នៅចក្រភពអង់គ្លេស កាលពីខែវិច្ឆិកា ឆ្នាំ២០២១ថា កម្ពុជាមិនអភិវឌ្ឍរោងចក្រផលិតអគ្គិសនីដុតធ្យូងថ្មទៀតនោះទេ ហើយនៅថ្ងៃទី០២ ខែវិច្ឆិកា ឆ្នាំ២០២៣នេះ ខ្ញុំបានសម្រេចបញ្ឈប់គម្រោងអភិវឌ្ឍរោងចក្រផលិតអគ្គិសនីដុតធ្យូងថ្ម អានុភាព៧០០ មេហ្កាវ៉ាត់ នៅស្រុកបុទុមសាគរ ខេត្តកោះកុងយើងនេះ ដែលមានការសិក្សាច្រើនហើយក្នុងការធ្វើ ប៉ុន្តែឥឡូវការប្តេជ្ញាចិត្តរបស់យើងអត់ចាំពេលណាទេ។ ខ្ញុំបានសម្រេចឱ្យបញ្ឈប់ ហើយបានឱ្យពិភាក្សាពិនិត្យប្តូរលទ្ធភាពគម្រោងនេះ ពីការផលិតអគ្គិសនីដោយធ្យូងថ្ម ទៅជាជាគម្រោងផលិតអគ្គិសនីដុតឧស្ម័ន LNG វិញ”។
បន្ថែមលើសពីនេះ សម្តេចធិបតី ហ៊ុន ម៉ាណែត ក៏បានអនុញ្ញាតឲ្យក្រសួងរ៉ែ និងថាមពល ពិនិត្យលទ្ធភាពអំពីការឈានមួយជំហានទៀត ឆ្ពោះទៅរកការសាកល្បងដាក់ឱ្យរោងចក្រផលិតអគ្គិសនីដុតធ្យូងថ្ម ដែលមានស្រាប់បញ្ឈប់ដំណើរការមុនកាលកំណត់ផងដែរ។
ទោះជាយ៉ាងណា សម្តេចធិបតី បានជំរុញការសាងសង់ស្ថានីយសាកអាគុយ សម្រាប់រថយន្តដើរដោយថាមពលអគ្គិសនីឱ្យបានច្រើនកន្លែងនៅទូទាំងប្រទេស ដើម្បីឈានទៅរកការគាំទ្រលើការប្រើប្រាស់ ឱ្យបានកាន់តែច្រើន សំដៅកាត់បន្ថយការបំពុលបរិស្ថាននៃឧស្ម័នកាបូនឌីអុកស៊ីត ដែលបញ្ចេញពីយានយន្តប្រើប្រាស់ប្រេងឥន្ធនៈផងដែរ៕