នេះជាការបញ្ជាក់នៅក្នុងពិធីប្រកាសដាក់ឱ្យអនុវត្តជាផ្លូវការ “របបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត សម្រាប់បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស.” និង “កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ” ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅសណ្ឋាគារសុខាភ្នំពេញ កាលពីព្រឹកថ្ងៃទី១៤ ខែវិច្ឆិកា នេះ។
លោក ហេង សួរ រដ្ឋមន្រ្តីក្រសួងការងារបានឲ្យដឹងថា តាមរយៈកម្មវិធីនេះ បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស. រួមមាន ប្តីឬប្រពន្ធ និងកូនក្នុងបន្ទុក អាចទទួលបានរបបសន្តិសុខសង្គមផ្នែកថែទាំសុខភាព ដោយគ្រាន់តែបង់ភាគទានត្រឹមតែ១៥ ៦០០រៀល គឺបងប្អូនអាចទទួលបានសេវាព្យាបាល និងថែទាំវេជ្ជសាស្ត្រនៅគ្រប់ពេទ្យដែលជាដៃគូរបស់ ប.ស.ស. បន្ថែមពីលើមន្ទីរពេទ្យរដ្ឋ។ បុគ្គលស្វ័យនិយោជន៍ ជាស្ត្រីដែលបង់ភាគទានបាន៩ខែជាប់គ្នា នឹងទទួលបានប្រាក់បំណាច់លំហែមាតុភាពនៅពេលសម្រាលកូន និងវិភាជន៍ប្រាក់បូជាសព នៅពេលទទួលមរណភាព។ លោកបន្តថា ការពង្រីកវិសាលភាពរបបសន្តិសុខសង្គមផ្នែកថែទាំសុខភាព តាមរបបភាគទានដោយស្ម័គ្រចិត្តនេះ នឹងគ្របដណ្តប់ដល់បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស. ប្រមាណជាង៣លាននាក់បន្ថែម ដែលនឹងធ្វើឱ្យរបបសន្តិសុខសង្គមផ្នែកថែទាំសុខភាព នឹងគ្របដណ្តប់ប្រជាជនសរុបប្រមាណជាង ៥លាននាក់។
មានប្រសាសន៏ននៅក្នុងពិធីនោះ សម្តេចធិបតី ហ៊ុន ម៉ាណែត បានលើកឡើងថា រាជរដ្ឋាភិបាល បានខិតខំប្រឹងប្រែងយកចិត្តទុកដាក់ថែទាំសុខភាពរបស់កម្មករនិយោជិត ដោយមិនទុកនរណាម្នាក់ចោល ដោយមិនបានព្យាបាល ពេលមានជំងឺឡើយ។ សម្តេចធិបតីបន្តថា ប្រជាពលរដ្ឋត្រូវចំណាយជាមធ្យមក្នុងមួយខែចន្លោះពី១៥ដុល្លារ ទៅ២០ដុល្លារ ឬស្មើ ២៥០ដុល្លារក្នុងមួយឆ្នាំទៅលើបញ្ហាសុខភាព។
សម្តេចនាយករដ្ឋមន្ត្រី បានថ្លែងទៀតថា កន្លងមកតាមរយៈការខិតខំអនុវត្តដោយជោគជ័យនូវអនុសាសន៍ ទាំង១០ចំណុច របស់សម្តេចតេជោ ប្រាក់ឈ្នួលអប្បរមារបស់បងប្អូនកម្មករនិយោជិត បានកើនឡើងជាលំដាប់ ជាបន្តបន្ទាប់ រួមទាំងអត្ថប្រយោជន៍ផ្សេងៗបន្ថែមទៀត ការកាត់បន្ថយការចំណាយរបស់បងប្អូនកម្មករនិយោជិត ដោយបានបង្កើត និងពង្រីកវិសាលភាព បេឡាជាតិរបបសន្តិសុខសង្គម ជាបន្តបន្ទាប់ ដោយតម្រូវឲ្យនយោជកបង់ជំនួសកម្មករនិយោជិត១០០ភាគរយ នៅក្នុងការថែទាំងសុខភាព គ្រោះថ្នាក់ការងារជួយបង់៥០ភាគរយ ក្នុងប្រាក់សោធន ដែលជាហេតុធ្វើឲ្យបងប្អូនកម្មករនិយោជិត អាចរក្សាបាននូវសន្តិសុខចំណូល និងកាត់បន្ថយហានិភ័យទាំងឡាយ នៅក្នុងអំឡុងពេលមានការងាររហូតដល់ពេលចូលនិវត្តន៍។ ដោយឡែក កម្មករនិយោជិតជាស្ត្រី ទទួលបានការយកចិត្តទុកដាក់ និងគាំពារទាំងមុនពេលសម្រាល ពេលសម្រាល និងក្រោយពេលសម្រាលកូន។
សម្តេចធិបតី បានបន្តថា រាជរដ្ឋាភិបាល បានដាក់ឲ្យអនុវត្តជាបន្តបន្ទាប់ នូវរបបសន្តិសុខសង្គម ក្នុងនោះផ្នែកហានិភ័យការងារ នៅឆ្នាំ២០០៨ ទីពីរផ្នែកថែទាំងសុខភាព នៅឆ្នាំ២០០៦ និងទីបី ប្រាក់សោធន នៅឆ្នាំ២០២២។ ទាំងនេះ សុទ្ធតែបានបង្ហាញថា ការអនុវត្តរបបសន្តិសុខសង្គម គឺជាការយកចិត្តទុកដាក់ដ៏ចម្បង របស់រាជរដ្ឋាភិបាល ក្នុងការជួយប្រជាពលរដ្ឋ ឲ្យទទួលបានអត្ថប្រយោជន៍ នៅក្នុងការគាំពារគ្រោះថ្នាក់ការងារ ការថែរក្សាសុខភាព ការទទួលបានប្រាក់សោធន ដូចមន្ត្រីរាជការសាធារណៈដែរ ដែលពីមុនមកមិនមានអនុវត្តនោះទេ នៅក្នុងប្រវត្តិសាស្ត្រកម្ពុជា៕
