នេះជាការលើកឡើងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅក្នុងពិធីអបអរសាទរខួបអនុស្សាវរីយ៍លើកទី២៨ ថ្ងៃបង្កើតបញ្ជាការដ្ឋានទ័ពពិសេស (៩ វិច្ឆិកា ១៩៩៥-៩ វិច្ឆិកា ២០២៣) នៅបញ្ជាការដ្ឋានទ័ពពិសេស កាលពីព្រឹកថ្ងៃសុក្រ ទី១០ ខែវិច្ឆិកា ឆ្នាំ២០២៣។
សម្តេចធិបតី ហ៊ុន ម៉ាណែត លើកឡើងថា យើងនឹងពង្រឹងការអភិវឌ្ឍនៅតាមខ្សែបន្ទាត់ព្រំដែន ដោយប្រើប្រាស់ការអភិវឌ្ឍជាឧបករណ៍មួយនៃការការពារជាតិ ហើយនេះគឺជាគោលនយោបាយការពារជាតិរបស់រាជរដ្ឋាភិបាល នីតិកាលទី៧ នៃរដ្ឋសភា ក៏ដូចជាអាណត្តិមុនៗផងដែរ។ ទាក់ទងការការពារជាតិនេះដែរ សម្ដេចធិបតីអះអាងថា រាជរដ្ឋាភិបាលកម្ពុជា នឹងធ្វើទំនើបកម្មលើវិស័យការពារជាតិនេះផងដែរ ដោយផ្តោតលើ៣ចំណុចរួមមាន៖ ទំនើបកម្មហេដ្ឋារចនាសម្ព័ន្ធ, ទំនើបកម្មក្នុងការហ្វឹកហ្វឺន និងទំនើបកម្មគ្រឿងបំពាក់។
សម្ដេចធិបតីពន្យល់ថា ការទំនើបកម្មរចនាសម្ព័ន្ធ គឺត្រូវពិនិត្យវាយតម្លៃជាប់ជាប្រចាំ ទៅលើការកែសម្រួល ឬពង្រឹងរចនាសម្ព័ន្ធ ដើម្បីឲ្យឆ្លើយតបទៅនឹងសំណូមពរភារកិច្ច នៅពេលបច្ចុប្បន្ន និងទៅអនាគត ព្រោះគ្រប់សម័យកាលហានិភ័យ និងការប្រឈមមានស្ថានភាពខុសៗគ្នា។ កិច្ចការទាំងអស់នេះទាមទារឲ្យគ្រប់ស្ថាប័នជាតិ ពិសេសកម្លាំងសន្ដិសុខ បន្ដយកចិត្តទុកដាក់ក្នុងការវាយតម្លៃ និងកែសម្រួលរចនាសម្ព័ន្ធដើម្បីឲ្យឆ្លើយតប។
ចំពោះទំនើបកម្មហ្វឹកហ្វឺន ត្រូវផ្ដោតទៅលើការពង្រឹង និងទំនើបកម្មសាលា, ពង្រឹងកម្មវិធីហ្វឹកហ្វឺន និងមេរៀន និងពង្រឹងទំនើបកម្មសម្ភារៈមធ្យោបាយ រួមទាំងទីលានហ្វឹកហ្វឺន។ ធនធានមនុស្សបើគ្មានជំនាញពិតប្រាកដ មិនធានានូវប្រសិទ្ធភាពប្រតិបត្តិការ និងឆ្លើយតបនោះទេ ដូច្នេះការហ្វឹកហ្វឺន គឺជាគោលសំខាន់ដែលត្រូវបង្កើនការយកចិត្តទុកដាក់បន្ថែមទៀត ហើយបើនិយាយអំពីការហ្វឹកហ្វឺន គឺផ្ដោតទៅលើការពង្រឹងសាលា។
ដោយឡែកការធ្វើទំនើបកម្មគ្រឿងបំពាក់ គឺត្រូវបំពាក់បន្ថែមនូវសម្ភារៈដែលបម្រើឲ្យកិច្ចប្រតិបត្តិការ និងសង្គ្រោះនៅពេលមានគ្រោះមហន្ដរាយកើតឡើង។
ពាក់ព័ន្ធការធ្វើទំនើបកម្មក្នុងវិស័យការពារជាតិនេះ សម្ដេចធិបតី ហ៊ុន ម៉ាណែត ធ្លាប់បានដាក់ចេញ និងអនុវត្តជាបណ្ដើរៗកន្លងរួចមកហើយ តាំងពីសម្ដេចនៅជាមេបញ្ជាការកងទ័ពជើងគោកមកម្ល៉េះ ក្នុងនោះមានទាំងពង្រឹងលើការហ្វឹកហ្វឺនជំនាញ និងបំពាក់នូវសម្ភារៈដែលបម្រើឲ្យកិច្ចប្រតិបត្តិការផងដែរ។ សម្ដេចធិបតី ហ៊ុន ម៉ាណែត បានអះអាងថា រាជរដ្ឋាភិបាលនីតិកាលទី៧ នៃរដ្ឋសភា ក៏មិនខុសពីអាណត្តិមុនៗនោះដែរ ដោយផ្ដោតសំខាន់លើការបន្ដការការពារឯករាជ្យ អធិបតេយ្យជាតិ និងបូរណភាពទឹកដី ជាពិសេសត្រូវការពារសន្ដិភាព ដែលរកបានដោយលំបាក ហើយនឹងប្រើប្រាស់នូវយុទ្ធសាស្ដ្រ “ការពារដើម្បីអភិវឌ្ឍន៍ អភិវឌ្ឍន៍ដើម្បីការពារ”។
ស្របតាមបេសកកម្មការពារជាតិ ដែលកំណត់ដោយរាជរដ្ឋាភិបាល នីតិកាលទី៧ សម្តេចធិបតី ហ៊ុន ម៉ាណែត បានដាក់ចេញនូវអនុសាសន៍៥ចំណុច ដើម្បីអង្គភាពនៃកងយោធពលខេមរភូមិន្ទទាំងអស់អនុវត្ត៖
ទី១- កងទ័ពត្រូវតែជាកងទ័ពមានវិជ្ជាជីវៈខ្ពស់ (Professional Military) ស្មោះត្រង់ដាច់ខាតចំពោះជាតិ មាតុភូមិ និងប្រជាជន និងយកអស់ស្មារតី គោរព និងអនុវត្តឱ្យបានម៉ឺងម៉ាត់ នូវរាល់បទប្បញ្ញត្តិ, សារាចរណែនាំ, លក្ខន្តិកៈកងយោធពលខេមរភូមិន្ទ ដើម្បីការពារជាតិមាតុភូមិ និងប្រជាជន។
ទី២- គ្រប់អង្គភាពទាំងអស់ត្រូវយកចិត្តទុកដាក់បំផុត ទៅលើការប្រើប្រាស់កងកម្លាំង, ធនធាន និងទ្រព្យសម្បត្តិរដ្ឋ ដែលបានប្រគល់ជូន។
ទី៣- គ្រប់អង្គភាពទាំងអស់ត្រូវពង្រឹងការងារហ្វឹកហ្វឺនរៀនសូត្រ និងការកសាងប្រភពធនធានមនុស្ស ទាំងបរិមាណ និងគុណភាព ដើម្បីបម្រើការពារជាតិ ឱ្យមានប្រសិទ្ធភាព។
ទី៤- អង្គភាពទាំងអស់ត្រូវយកចិត្តទុកដាក់ត្រៀមកម្លាំង មធ្យោបាយ និងសម្ភារគ្រប់បែបយ៉ាង ដើម្បីជួយសង្គ្រោះប្រជាពលរដ្ឋ នៅពេលមានគ្រោះភ័យជាយថាហេតុ។
ទី៥- អង្គភាពទាំងអស់ត្រូវជំរុញការកសាងសេដ្ឋកិច្ចនៅនឹងកន្លែង ដូចជា ការបង្កបង្កើនផល និងការចិញ្ចឹមសត្វជាដើម ដើម្បីកែប្រែជីវភាពរស់នៅរបស់កងទ័ព៕