បន្ទាប់ពីចរចាបើកទីផ្សារបានសម្រេច កាលពីខែសីហា ឆ្នាំ២០២៣ កន្លងមក អង្កររបស់កម្ពុជាបានដឹកទៅដល់កំពង់ផែឥណ្ឌូនេស៊ីហើយ ក្នុងនោះពិធីបើកកុងតឺន័របានរៀបចំធ្វើជាផ្លូវការ នៅព្រឹកថ្ងៃទី០២ ខែវិច្ឆិកា ឆ្នាំ២០២៣ នេះ។
ការប្រកាសឲ្យដឹងពីការទៅដល់ប្រទេសឥណ្ឌូនេស៊ី របស់អង្ករខ្មែរនេះ បានធ្វើឡើងនៅក្នុងបណ្តាញតេឡេក្រាមរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាកម្ពុជា។ ហើយតាមប្រភពនោះ នេះជាលទ្ធផលនៃកិច្ចខំប្រឹងប្រែងក្នុងការចរចាបើកទីផ្សារ និងជំរុញការនាំចេញរហូតបានសម្រេច តាមរយៈការដឹកនាំរបស់សម្ដេចធិបតី ហ៊ុន ម៉ាណែត និងការចូលរួមពីសំណាក់ក្រសួងស្ថាប័នពាក់ព័ន្ធទាំងអស់ រាប់ចាប់តាំងពីក្រសួងកសិកម្ម ក្រសួងពាណិជ្ជកម្ម អគ្គនាយកដ្ឋានគយ និងរដ្ឋាករកម្ពុជា ក៏ដូចជាវិស័យឯកជនជាដៃគូ គឺសហព័ន្ធស្រូវអង្ករកម្ពុជា។
កិច្ចខំប្រឹងប្រែងទាំងអស់នេះ ធ្វើឡើងស្របទៅតាមគោលនយោបាយបញ្ចកោណដំណាក់កាលទី១ ផ្ដោតលើការលើកស្ទួយកសិកម្ម និងការអភិវឌ្ឍជនបទ ដែលផ្ដោតលើការបន្តពង្រឹងតួនាទី និងការអភិវឌ្ឍវិស័យកសិកម្មឱ្យទំនើប សម្បូរបែប និងមានភាពធន់ ដែលគាំទ្រដល់ការអភិវឌ្ឍជនបទ សំដៅធានាសន្តិសុខ និងសុវត្ថិភាពស្បៀង, បង្កើនតម្លៃបន្ថែមខ្ពស់, ជំរុញភាពប្រកួតប្រជែង និងលើកកម្ពស់គុណភាពជីវភាពប្រជាជននៅទីជនបទ។
លោកឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជាបានប្រាប់អ្នកសារព័ត៌មានឲ្យដឹងដែរថា អង្ករកម្ពុជា ជើងទី១ បានទៅដល់ទឹកដីឥណ្ឌូនេស៊ី ចំនួន៣៥០០តោន និងបន្តរដឹកជញ្ជូនចំនួន២ជើងបន្ថែមទៀត សរុប១ម៉ឺនតោន។
នៅក្នុងជំនួបរវាងលោក ចូកូ វីដូដូ ប្រធានាធិបតីឥណ្ឌូនេស៊ី និងសម្តេចធិបតី ហ៊ុន ម៉ាណែត នៅទីក្រុងហ្សាកាតា កម្ពុជាបានយល់ព្រមផ្គត់ផ្គង់អង្ករប្រមាណ ២៥ម៉ឺនតោនក្នុងមួយឆ្នាំ ដល់ប្រទេសឥណ្ឌូនេស៊ី ដើម្បីរក្សាបាននូវសុវត្ថិភាពស្បៀង និងការប្រើប្រាស់ក្នុងប្រទេស។
គួររំលឹកថា នៅក្នុងរយៈពេល៨ ខែឆ្នាំ២០២៣ កម្ពុជាសម្រេចការនាំចេញអង្ករបានជាង៤០ ម៉ឺនតោន (៤០១ ៦៩៩) គិតជាទឹកប្រាក់២៧៨ លានដុល្លារ ស្មើនឹង៥៨ ភាគរយនៃផែនការ៧០ ម៉ឺនតោន។ ហើយបើតាមរបាយការណ៍របស់ក្រសួងកសិកម្មបានឲ្យដឹងថា មានក្រុមហ៊ុនចំនួន ៥៥ បាននាំចេញអង្ករចេញទៅ៥៦ គោលដៅ ដែលមានប្រទេសចិន អាហ្វ្រិក មជ្ឈឹមបូព៌ា ប្រទេសក្នុងទ្វីបអឺរ៉ុប និងសមាជិកអាស៊ាន។ ដោយឡែក ការនាំចេញស្រូវទៅកាន់ប្រទេសជិតខាងបានជិត៣ លានតោន (២ ៩២៩ ០៤៣) ដែលមានទឹកប្រាក់៨១៤ លានដុល្លារ ស្មើនឹង ៥៩ភាគរយ៕
