ដោយចាប់ផ្តើមពីប្រធានាធិបតីអាមេរិកលោក Joe Biden ដែលកំពុងប្រឈមមុខនឹងសម្ពាធផ្ទៃក្នុងកាន់តែខ្លាំងឡើងអោយវាយប្រហារលើក្រុមប្រូកស៊ីអ៊ីរ៉ង់ ដែលបានវាយប្រហារជាញឹកញាប់និងបង្ករបួសមកលើកងកម្លាំងអាមេរិកនៅក្នុងប្រទេសអ៊ីរ៉ាក់ និងស៊ីរីនៅអំឡុងពេលខែតុលានេះ នេះបើយោងតាមការចុះផ្សាយរបស់កាសែតអាមេរិក The Washington Post។ ប៉ុន្តែបើតាមប្រភពដដែលនេះបានអោយដឹងថា លោក Biden កំពុងពិចារណាលើការសម្រេចចិត្តណាមួយដើម្បីសងសឹកសម្ព័ន្ធមិត្តអ៊ីរ៉ង់ ដោយបារម្ភថាសង្រ្គាមនៅតំបន់ហ្គាហ្សាអាចនឹងឈានទៅដល់ការផ្ទុះឡើង និងរីករាលដាលពេញតំបន់នេះបើយោងតាមមន្ត្រីអាមេរិកដែលបានផ្តល់ដំណឹង។ កាល​ពី​ថ្ងៃ​ពុធ លោក Biden បាន​ព្រមាន​មេដឹកនាំ​អ៊ីរ៉ង់លោក Ali Khamenei ថា«ប្រសិនបើ​ទីក្រុង​តេអេរ៉ង់​បន្ត​ធ្វើ​ចលនា​ប្រឆាំង​នឹង​កម្លាំង​អាមេរិក​នៅ​មជ្ឈិមបូព៌ា នោះពួក​យើង​នឹង​ឆ្លើយតប»។ ការព្រមាននេះបានធ្វើឡើងបន្ទាប់ពីមានរបាយការណ៍ថាទាហានអាមេរិកជាង 20 នាក់បានរងរបួសក្នុងរយៈពេលប្រាំបីថ្ងៃចុងក្រោយនេះ បន្ទាប់ពីមានការវាយប្រហារតាមអាកាសចំនួន14លើកឬច្រើនជាងនេះទៅលើមូលដ្ឋានរបស់ពួកគេនៅក្នុងប្រទេសអ៊ីរ៉ាក់ និងស៊ីរី។ 

1. ​អាមេរិក​ពិចារណាវាយប្រហារក្រុមប្រូស៊ីអ៊ីរ៉ង់ក្រោយការវាយប្រហារលើកងទ័ពខ្លួន

យោងតាមសារព័ត៌មាន The Washington Post ចុះផ្សាយថ្ងៃទី២៦ ខែតុលាបានអោយដឹងថា លោកប្រធានាធិបតី Biden ប្រឈមមុខនឹងសម្ពាធកាន់តែខ្លាំងក្នុងការវាយប្រហារលើក្រុមប្រូកស៊ីអ៊ីរ៉ង់ដែលបានវាយប្រហារម្តងហើយម្តងទៀត និងបង្ករបួសមកលើទាហានអាមេរិកនៅអ៊ីរ៉ាក់ និងស៊ីរីក្នុងខែនេះ ប៉ុន្តែលោកកំពុងថ្លឹងថ្លែងលើការសម្រេចចិត្តណាមួយដើម្បីសងសឹកដោយបារម្ភថាសង្រ្គាមនៅតំបន់ហ្គាហ្សានេះនឹងអាចឈានដល់កម្រិតនៃការផ្ទុះឡើងពាសពេញតំបន់នេះបើយោងតាមមន្ត្រីសហរដ្ឋអាមេរិក និងអ្នកផ្សេងទៀតដែលដឹងពីការពិភាក្សារបស់រដ្ឋបាល។

លោក Biden បាននិយាយកាលពីថ្ងៃពុធថា លោកបានព្រមានលោក Ayatollah Ali Khamenei មេដឹកនាំកំពូលរបស់អ៊ីរ៉ង់ថា ប្រសិនបើទីក្រុង Tehran បន្តធ្វើចលនាប្រឆាំងនឹងកងកម្លាំងសហរដ្ឋអាមេរិកនៅមជ្ឈិមបូព៌ាទៀត នោះពួកគេនឹងធ្វើការឆ្លើយតបហើយ ។

ការប្រកាសរបស់លោក Biden បានកើតឡើងបន្ទាប់ពីមានរបាយការណ៍ថាទាហានអាមេរិកជាង 20 នាក់បានរងរបួសនៅក្នុងការវាយប្រហារដោយដ្រូន និងរ៉ុក្កែតយ៉ាងហោចណាស់ចំនួន១២លើកផ្សេងៗគ្នានៅក្នុងប្រទេសអ៊ីរ៉ាក់ និងស៊ីរីកាលពីថ្ងៃទី១៨ ខែតុលានេះ។ 

2. ស្ថានទូត​អាមេរិក​ប្រចាំ​​គុយវ៉ែតព្រមាន​​ខណៈមានការ​គំរាម​កំហែង​របស់ក្រុម​សកម្មប្រយុទ្ធ​គាំទ្រ​អ៊ីរ៉ង់

យោងតាមសារព័ត៌មាន Atlas News ចុះផ្សាយថ្ងៃទី២៥ ខែតុលាបានអោយដឹងថា ស្ថានទូតសហរដ្ឋអាមេរិកប្រចាំប្រទេសគុយវ៉ែតបានចេញសេចក្តីប្រកាសអាសន្នផ្នែកសន្តិសុខដោយសារតែការគំរាមកំហែងធ្វើឡើងដោយក្រុមសកម្មប្រយុទ្ធគាំទ្រអ៊ីរ៉ង់ Alwiyat al-Waad al-Haq (AWH) ដែលលើកឡើងថាមូលដ្ឋានទ័ពអាមេរិកនៅក្នុងប្រទេសនេះគឺជា "គោលដៅវាយប្រហារស្របច្បាប់របស់ពួកគេ" ។

ក្រុមសកម្មប្រយុទ្ធគាំទ្រអ៊ីរ៉ង់ AWH បានចេញសេចក្តីថ្លែងការណ៍មួយកាលពីថ្ងៃទី២៤ ខែតុលាថា"យើងចាត់ទុកមូលដ្ឋានទ័ពអាមេរិកក្នុងប្រទេសគុយវ៉ែត និង Emirates ជាគោលដៅស្របច្បាប់សម្រាប់ពួកយើងដើម្បីឆ្លើយតបទៅនឹងឧក្រិដ្ឋកម្មរបស់អង្គភាពគាំទ្រប្រជាជនជ្វីហ្វ និងប្រទេសអាមេរិកផងដែរ។ ហើយ​ជា​ការ​សងសឹក​ចំពោះ​ប្រជាជន​ប៉ាឡេស្ទីន​ជា​ទី​ស្រឡាញ់ដែលត្រូវបានសម្លាប់ដោយក្រុមជ្រុលនិយមសាសនាទាំងនេះ»។

ស្ថានទូតបានឆ្លើយតបដោយនិយាយថា ពួកគេបានដឹងពីការគម្រាមកំហែងនេះហើយ និងកំពុងរឹតត្បិតសកម្មភាពរបស់ខ្លួនពាក់ព័ន្ធជាមួយមូលដ្ឋានយោធាអាមេរិកមកត្រឹមតែព្រឹត្តិការណ៍សំខាន់ៗតែប៉ុណ្ណោះ។ ខណៈពលរដ្ឋ​អាមេរិក​ក៏ត្រូវ​បាន​ណែនាំ​ឲ្យ​រក្សា​ការ​ប្រុង​ប្រយ័ត្ន»។

3. មន្ទីរបញ្ចកោណថាទាហានអាមេរិក៩០០នាក់បានដាក់ពង្រាយនៅមជ្ឈិមបូព៌ា

យោងតាមសារព័ត៌មាន CNN ចុះផ្សាយថ្ងៃទី២៧ ខែតុលាបានអោយដឹងថា ទាហានអាមេរិកប្រហែល 900 នាក់ត្រូវបានដាក់ពង្រាយ និងកំពុងដាក់ពង្រាយនៅមជ្ឈិមបូព៌ា ខណៈមានភាពតានតឹងកាន់តែកើនឡើងខ្លាំងនៅក្នុងតំបន់ បន្ទាប់ពីមានការវាយប្រហារជាបន្តបន្ទាប់មកលើមូលដ្ឋានចម្រុះដែលបណ្តាលឱ្យមានរបួសតិចតួចសម្រាប់ទាហានជិត២០នាក់។

អ្នកនាំពាក្យមន្ទីរបញ្ចកោណលោកឧត្តមសេនីយ៍ទោ Pat Ryder បានប្រាប់អ្នកយកព័ត៌មានកាលពីថ្ងៃព្រហស្បតិ៍ថា អង្គភាពដែលដាក់ពង្រាយនេះនឹងមិនធ្វើដំណើរទៅកាន់ប្រទេសអ៊ីស្រាអែលទេ ហើយពួកគេត្រូវបានប្រើប្រាស់ក្នុងគោលបំណងគាំទ្រដល់កិច្ចប្រឹងប្រែងទប់ស្កាត់ក្នុងតំបន់ និងពង្រឹងសមត្ថភាពការពារកម្លាំងរបស់សហរដ្ឋអាមេរិកតែប៉ុណ្ណោះ" ។