នៅព្រឹកថ្ងៃអង្គារ ទី២៤ ខែតុលា ឆ្នាំ២០២៣ នេះ “មន្ទីរពេទ្យជាតិ តេជោសន្តិភាព” ត្រូវបានសម្ពោធដាក់ឱ្យប្រើប្រាស់ជាផ្លូវការហើយ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មន្ទីរពេទ្យនេះ ស្ថិតនៅជាប់វិថីឈ្នះឈ្នះ ស្ថិតក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ។
មានប្រសាសន៏នៅក្នុងពិធីនោះ សម្តេចមហាបវរធិបតី ហ៊ុន ម៉ាណែត បានលើកឡើងថា ការរៀបចំមន្ទីរពេទ្យជាតិធំនេះ ជាការគិតគូរយូរអង្វែង ហើយដើម្បីសម្រាលបន្ទុកមន្ទីរពេទ្យផ្សេងៗទៀត។ ហើយមន្ទីរពេទ្យជាតិតេជោសន្តិភាព ក៏ជាការត្រៀមបម្រុង ដើម្បីដោះស្រាយបញ្ហាដែលអាចកើតមានឡើងដោយចៃដន្យ ដូចការរាតត្បាតកូវីដ១៩កន្លងមកជាដើម។ ជាមួយគ្នានោះ ប្រមុខរាជរដ្ឋាភិបាល បានណែនាំដល់ក្រសួងសុខាភិបាល ត្រូវយកចិត្តទុកដាក់លើកកម្ពស់គុណភាព សេវាសុខាភិបាល នៅថ្នាក់ក្រោមជាតិ ជាពិសេសត្រូវពង្រឹងមណ្ឌលសុខភាព និងមន្ទីរពេទ្យបង្អែក ដើម្បីផ្ដល់សេវាមូលដ្ឋានដល់ប្រជាពលរដ្ឋឲ្យបានល្អ។ ក្នុងនោះ ត្រូវពង្រឹងមន្ទីរពេទ្យខេត្ត ឲ្យក្លាយជាមន្ទីរពេទ្យឈានមុខ ដែលមានសមត្ថភាពខ្ពស់សមមូលនឹងមន្ទីរពេទ្យ នៅរាជធានីភ្នំពេញ ក្នុងការពិនិត្យ និងព្យាបាលជំងឺ និងផ្ដល់សេវាសុខាភិបាលនានា សំដៅបង្កើនប្រសិទ្ធភាព នៃការផ្ដល់សេវាសុខាភិបាលផង និងកាត់បន្ថយក្នុងការធ្វើដំណើរ របស់ប្រជាពលរដ្ឋ។
ទាក់ទងបញ្ហាសុខាភិបាលនេះដែរ សម្តេចមហាបវរធិបតី ហ៊ុន ម៉ាណែត បានអំពាវនាវដល់វិស័យឯកជនក្នុងវិស័យសុខាភិបាល អាជីវករលក់ឱសថ ផលិតផលបំប៉នសុខភាព ចំណីអាហារជាដើម ត្រូវចូលរួមជាមួយរាជរដ្ឋាភិបាល ក្នុងការលើកកម្ពស់គុណភាពផលិតផលរបស់ខ្លួន សំដៅលើកកម្ពស់សុខុមាលភាពសាធារណៈទាំងអស់គ្នា។ សម្ដេចធិបតីបានបញ្ជាក់ថា សុវត្ថិភាពថ្នាំសង្កូវ ចំណីអាហារ គឺជារឿងសំខាន់ ព្រោះគ្រប់គ្នាសុទ្ធតែប្រើប្រាស់ផលិតផល អាហារ ក៏ដូចជាថ្នាំសង្កូវ ដូច្នេះប្រាកដជាគិតថា អ្វីដែលទិញពីផ្សារ រួមទាំងឳសថ ដែលទិញពីគ្រូពេទ្យអាចទទួលទានបាន។
ជាមួយគ្នានោះ សម្ដេចធិបតីបានលើកទឹកចិត្តឱ្យក្រសួងសុខាភិបាល បង្កើតភាពប្រទាក់ក្រឡាគ្នាជាមួយវិស័យឯកជន មិនថាបុគ្គលស្វ័យនិយោជន៍ មន្ទីរពេទ្យឯកជន គណៈគ្រូពេទ្យ គណៈឱសថ និងគណៈក្រុមផ្សេងៗ ដើម្បីឱ្យពួកគេចូលរួមលើកកម្ពស់គុណភាពផលិតផល និងចំណីអាហារ សំដៅបង្កើនប្រសិទ្ធភាពគាំពារសុខុមាលភាពសាធារណៈ។ សម្ដេចបញ្ជាក់ថា រាជរដ្ឋាភិបាល ក្រសួងពាក់ព័ន្ធត្រូវធ្វើយ៉ាងណា ដើម្បីឈានទៅរកភាពជាដៃគូ និងបង្កើនការទទួលខុសត្រូវរបស់វិស័យឯកជន សមាគម គណៈ ឬបុគ្គលស្វ័យនិយោជន៍ ចូលរួមលើកកម្ពស់សុខុមាលភាពរបស់អ្នកប្រើប្រាស់ ហើយម្ចាស់អាជីវកម្មក៏អាចបន្តការលក់ដូរប្រកបដោយភាពស្របច្បាប់ផងដែរ។
គួររំលឹកថា មន្ទីរពេទ្យ “តេជោសន្តិភាព” គឺជាមន្ទីពេទ្យដ៏ធំជាងគេបំផុតនៅក្នុងប្រទេសកម្ពុជា ដែលបានចាប់ផ្តើមសាងសង់កាលពីថ្ងៃទី២៨ ខែមីនា ឆ្នាំ២០២២ ដោយក្រុមហ៊ុន ស៊ីជេអ៊ីស៊ី (CJEC co,Ltd) សហការជាមួយសាលារាជធានីភ្នំពេញ នៅលើផ្ទៃដីប្រមាណ៧.៥៨ហិកតាមានគ្រែសរុប៩,៤៩៦គ្រែ។ ក្នុងនោះគ្រែសម្រាកព្យាបាលសម្រាប់អ្នកជំងឺមានចំនួន ៩,២៤៤គ្រែ គ្រែសម្រាប់គ្រូពេទ្យប្រចាំការចំនួន៤៦គ្រែ និងគ្រែសម្រាប់បុគ្គលិកស្នាក់នៅចំនួន២០៦គ្រែ។
មន្ទីរពេទ្យជាតិនេះ មានចំនួន១១អគារ ដែលមានអគារព្យាបាល និងសង្គ្រោះបន្ទាន់ (E) មានទំហំ៧,៤៨០ ម៉ែត្រការ៉េ, អគារព្យាបាលកម្រិតធ្ងន់ (H1 និង H2) មានគ្រែសរុបចំនួន៥២៧គ្រែ, អគារព្យាបាលកម្រិតស្រាល (H3,H4,H5, H6 និង H7), អគារបច្ចេកទេស (T1), អគារបច្ចេកទេស (T2), អគារផ្គត់ផ្គង់ និងព័ត៌មាន (A) មានទំហំ២,៨៣៥ ម៉ែត្រការ៉េ, អគារស្នាក់នៅសម្រាប់បុគ្គលិក (S) មានគ្រែសរុបចំនួន ២៣៤ គ្រែ។ ចំណតរថយន្តមានផ្ទៃក្រឡា ៧,០២៦ ម៉ែត្រការ៉េ ដែលអាចចត រថយន្តបានចំនួន ២១០ គ្រឿង មានសួនច្បារព័ណ៌បៃតងទំហំ៤,៤៩០ ម៉ែត្រការ៉េផងដែរ។
សូមបញ្ជាក់ថា មន្ទីរពេទ្យនេះ មានអគារសម្រាកព្យាបាល និងសង្គ្រោះបន្ទាន់ វះកាត់ អគារសម្រាកព្យាបាលកម្រិតធ្ងន់ អគារសម្រាកព្យាបាលកម្រិតស្រាល អគាររដ្ឋបាល អគារបច្ចេកទេស អគារផ្គត់ផ្គង់ជាដើម។ លើផ្នែករូបភាពវេជ្ជសាស្ត្រ ត្រូវបានបំពាក់ដោយបរិក្ខារវេជ្ជសាស្ត្រទំនើបចុងក្រោយ សម្រាប់ការធ្វើរោគវិនិច្ឆ័យចំនួន១២ផ្នែក ប្រកបដោយសុក្រិតភាព និងទំនុកចិត្ត៕