ទីបំផុតអ៊ីស្រាអែលគ្មានគម្រោងវាយលុកចូលតំបន់ហ្គាហ្សាទេ! នៅក្នុងខណៈពេលភាពភ័យរន្ធត់នៃផ្លូវរូងក្រោមដីរបស់ក្រុមហាម៉ាស ដែលត្រូវបានចាត់ទុកថាមានភាពគ្រោះថ្នាក់ខ្លាំងជាងផ្លូវរូងក្រោមដីរបស់វៀតណាមទៅទៀតនោះ ផែនការសង្គ្រាមរបស់អ៊ីស្រាអែលលើតំបន់ហ្គាហ្សាគឺអាស្រ័យលើការឡោមព័ទ្ធ និងជម្លៀសចេញ ហើយចុងក្រោយនឹងបំផ្លាញតំបន់ហ្គាហ្សាទាំងស្រុង! នេះគឺជាគោលដៅដែលមិនអាចទៅរួច ដែលត្រូវបានបំផ្លាញដោយការគំរាមកំហែងរបស់អេហ្ស៊ីប ហ្ស៊កដានី និងអារ៉ាប៊ីសាអូឌីត និងសម្ពាធយ៉ាងខ្លាំងសម្បើមពីមនុស្សជុំវិញពិភពលោក។ សម្ពាធដែលបានដាក់ជុំវិញអាចធ្វើអោយសហគមន៍អន្តរជាតិមិនគាំទ្រចំពោះផែនការរបស់អ៊ីស្រាអែលទាំងនេះ ហើយជាមួយនឹងផែនការបរាជ័យនៃការជម្លៀសប្រជាជនពីតំបន់ហ្កាហ្សាទៅស៊ីណៃ អ៊ីស្រាអែលលែងមានគម្រោងចូលតំបន់ហ្គាហ្សា ឬចេញពីតំបន់នេះទៀតហើយ! វាត្រូវបានប្រកាសឡើងថាជំនួយនឹងចូលតាមច្រក Rafah ហើយអេហ្ស៊ីបកំពុងតែដាក់សម្ពាធអោយដកចេញនូវការឡោមព័ទ្ធ និងដាក់ឡើងនូវបទឈប់បាញ់សម្រាប់ការនាំចូលជំនួយ។ តើអ៊ីស្រាអែលបានចុះចាញ់ហើយមែនដែរឬទេ?
-
យោធាអ៊ីស្រាអែលរៀបចំការវាយលុកចូលតំបន់ហ្គាហ្សា
យោងតាមសារព័ត៌មាន The Wall Street Journal ចុះផ្សាយថ្ងៃទី១៩ ខែតុលាបានអោយដឹងថា អ៊ីស្រាអែលកំពុងកំណត់គោលដៅលើមេដឹកនាំរបស់ក្រុមហាម៉ាស និងផ្លូវរូងក្រោមដីរបស់ពួកគេ ហើយបានឡោមព័ទ្ធតំបន់ហ្គាហ្សាភាគខាងជើងដោយព្យាយាមធ្វើឲ្យក្រុមហាម៉ាស់ចុះខ្សោយមុននឹងឈានដល់ការលុកលុយទន្ទ្រានទឹកដី។
អ៊ីស្រាអែលបានបន្តការវាយប្រហារតាមអាកាសរបស់ខ្លួនលើតំបន់ហ្គាហ្សានៅព្រឹកថ្ងៃព្រហស្បតិ៍ខណៈដែលខ្លួនបានរៀបចំកងទ័ពនិងរៀបចំមូលដ្ឋានគ្រឹះសម្រាប់ការឈ្លានពានដែលអាចកើតមានក្នុងតំបន់នោះ។
អស់រយៈពេលជិតពីរសប្តាហ៍មកនេះ អ៊ីស្រាអែលបានត្រៀមខ្លួនសម្រាប់ការលុកលុយដែលអាចកើតមានឡើងនៅក្នុងតំបន់ហ្គាហ្សា ដោយធ្វើការវាយប្រហារតាមអាកាសរាប់ពាន់លើកលើតំបន់នោះដោយផ្តោតគោលដៅសំខាន់លើមេដឹកនាំក្រុមហាម៉ាស កងកម្លាំងពិសេស និងទ្រព្យសម្បត្តិយុទ្ធសាស្ត្ររបស់ពួកគេ រួមមានដូចជាប៉ុស្តិ៍ស៊ើបការណ៍សម្ងាត់ និងបណ្តាញផ្លូវរូងក្រោមដី ខណៈដែលពួកគេកំពុងចង់តែធ្វើអោយក្រុមនេះចុះខ្សោយ មុនពេលបញ្ជូនទាហានអ៊ីស្រាអែលរាប់ពាន់នាក់ទៅប្រមូលផ្តុំនៅព្រំដែននេះ។
-
សម្ពាធកើនឡើងដើម្បីបើកច្រករបៀងជំនួយហ្គាហ្សា
យោងតាមសារព័ត៌មាន The New York Times ចុះផ្សាយថ្ងៃទី១៩ ខែតុលាបានអោយដឹងថា នៅមួយថ្ងៃបន្ទាប់ពីលោកប្រធានាធិបតី Joe Biden បាននិយាយថា អ៊ីស្រាអែលបានយល់ព្រមអនុញ្ញាតឱ្យផ្តល់ជំនួយមួយចំនួនដល់តំបន់ហ្គាហ្សាហើយ ការផ្តោតអារម្មណ៍សំរាប់ថ្ងៃព្រហស្បតិ៍គឺទៅលើបញ្ហាថាតើអាហារ និងថ្នាំពេទ្យអាចចូលកាន់ឆាប់ៗរឺទេស្របពេលដែលអ៊ីស្រាអែលកំពុងរៀបចំការឈ្លានពានមួយដែលនឹងអាចកើតមានឡើង។
ដើម្បីបន្ថែមសម្ពាធលើអ៊ីស្រាអែលអោយបន្ធូរបន្ថយវិបត្តិនៅតំបន់ហ្គាហ្សា នាយករដ្ឋមន្ត្រីអង់គ្លេសលោក Rishi Sunak នៃចក្រភពអង់គ្លេសបានធ្វើដំណើរទស្សនកិច្ចទៅកាន់ទីក្រុង Tel Aviv ប្រទេសអ៊ីស្រាអែល ហើយបាននិយាយឡើងបន្ទាប់ពីបានជួបជាមួយប្រធានាធិបតីលោក Isaac Herzog ថាពួកគេបានយល់ព្រមលើសារៈសំខាន់នៃការទទួលបានជំនួយមនុស្សធម៌ជាបន្ទាន់ដល់ប្រជាជនប៉ាឡេស្ទីននៅក្នុងតំបន់ហ្គាហ្សាដែលកំពុងស្ថិតនៅក្រោមភាពរងគ្រោះ»។
ទាក់ទងទៅនឹងរបាយការណ៍មុនរបស់អេហ្ស៊ីបលើកិច្ចព្រមព្រៀងជំនួយដល់តំបន់ហ្គាហ្សានេះគឺមកទល់ពេលនេះនៅមិនទាន់បានសម្រេចជោគជ័យនៅឡើយទេ។ យោងតាមលោក Biden អេហ្ស៊ីបបាននិយាយថា ខ្លួននឹងអនុញ្ញាតឱ្យរថយន្តដឹកជំនួយចំនួន 20 គ្រឿងចូលទៅក្នុងតំបន់នេះ ប៉ុន្តែពេលវេលាណាមួយគឺនៅមិនទាន់បញ្ជាក់បានច្បាស់នោះទេ។
-
តើអ្វីទៅជាចុងបញ្ចប់នៃតំបន់ហ្គាហ្សា?
យោងតាមសារព័ត៌មាន Reuters ចុះផ្សាយថ្ងៃទី១៩ ខែតុលាបានអោយដឹងថា យុទ្ធសាស្ត្រភ្លាមៗរបស់អ៊ីស្រាអែលដែលត្រូវបានលើកឡើងដោយមន្ត្រីក្នុងតំបន់បីនាក់ដែលដឹងពីកិច្ចពិភាក្សារវាងអាមេរិក និងមេដឹកនាំមជ្ឈិមបូព៌ា បានអោយដឹងថា ពួកគេមានគំរោងការណ៍នឹងបំផ្លាញហេដ្ឋារចនាសម្ព័ន្ធរបស់តំបន់ហ្កាហ្សានេះ មិនថាឡើយត្រូវដោះដូរនឹងការស្លាប់របស់ជនស៊ីវិលជាច្រើននាក់ក៏ដោយ ហើយបន្ទាប់មកពួកគេនឹងរុញច្រានប្រជាជននៃក្រុមនោះឆ្ពោះទៅកាន់ព្រំដែនអេហ្ស៊ីប និងក្រោយមកនឹងតាមកំចាត់ក្រុមហាម៉ាសតាមក្រោយដោយការបំផ្ទុះសំណង់ផ្លូវរូងក្រោមដីដែលក្រុមនេះបានសាងសង់ឡើងដើម្បីដំណើរការប្រតិបត្តិការរបស់ពួកគេ។
មន្ត្រីអ៊ីស្រាអែលបាននិយាយថា ពួកគេមិនមានគំនិតច្បាស់លាស់សម្រាប់ផែនការថ្ងៃអនាគតសំរាប់នៅពេលក្រោយសង្រ្គាមនោះទេថានឹងមានលក្ខណៈបែបណា។
ជំនួយការរបស់ប្រធានាធិបតីអាមេរិកលោក Joe Biden មួយចំនួនបានបង្ហាញការព្រួយបារម្ភឡើងថា ខណៈពេលដែលអ៊ីស្រាអែលអាចបង្កើតផែនការដ៏មានប្រសិទ្ធភាពមួយដើម្បីបង្កការខូចខាតជាយូរអង្វែងដល់ក្រុមហាម៉ាស ប៉ុន្តែពួកគេនៅទាន់បានបង្កើតយុទ្ធសាស្ត្រដើម្បីចាកចេញពីហ្គេមមួយនេះនៅឡើយទេ។
