សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា តាមរយៈសារជាសំឡេង នារសៀលថ្ងៃទី១១ ខែតុលា ឆ្នាំ២០២៣នេះ បានបង្ហាញពីចេតនាក្នុងការការចងសម្ព័ន្ធភាពជាមួយគណបក្សនយោបាយដទៃទៀត ទោះបីជាមានអាសនៈនៅក្នុងសភា ឬមិនមានអាសនៈនៅក្នុងសភា។
ការបង្ហាញពីចេតនាក្នុងការការចងសម្ព័ន្ធភាពនេះ បានធ្វើឡើងបន្ទាប់ពីគណបក្សនយោបាយចំនួន១៣ នៅកម្ពុជាបានធ្វើលិខិតផ្លូវការកាលពីថ្ងៃទី១០ ខែតុលា ស្នើសុំចងសម្ព័ន្ធភាព ជាមួយគណបក្សប្រជាជនកម្ពុជា។ គណបក្សនយោបាយទាំង១៣នោះ រួមមាន៖ គណបក្ស កម្លាំងប្រជាធិបតេយ្យ, គណបក្សរស្មីខេមរា, គណបក្សធម្មាធិបតេយ្យ, គណបក្សនគរប្រជាធិបតេយ្យ, គណបក្សមហាសាមគ្គីជាតិខ្មែរ, គណបក្សអំណាចប្រជាពលរដ្ឋ, គណបក្សកម្ពុជាសេរីឯករាជ្យប្រជាធិបតេយ្យ, គណបក្សចលនាប្រជាធិបតេយ្យ, គណបក្សឯកភាពជាតិខ្មែរ, គណបក្សខ្មែរក្រោក, គណបក្សអភិវឌ្ឍន៍សេដ្ឋកិច្ច, គណបក្សខ្មែរអង្គរ និងគណបក្សសាធារណរដ្ឋ។
តាមរយៈសារជាសំឡេងនោះ សម្ដេចតេជោ ហ៊ុន សែន ក្នុងនាមប្រធានគណបក្សប្រជាជនកម្ពុជា បានប្រកាសស្វាគមន៍ចំពោះគំនិតផ្ដួចផ្ដើមដ៏ល្អ របស់បណ្ដាគណបក្សនយោបាយទាំងនោះ។ សម្ដេចតេជោបញ្ជាក់ថា “គណបក្សប្រជាជនកម្ពុជា ពេញចិត្តជាមួយនឹងការចងសម្ព័ន្ធភាពលើមូលដ្ឋាន នៃការគោរពឯករាជ្យភាព នៃគណបក្សរៀងៗខ្លួន គណបក្សប្រជាជនកម្ពុជា មិនព្យាយាមដើម្បីត្រួតត្រាទៅលើគណបក្សនយោបាយដទៃទេ ប៉ុន្តែគណបក្សប្រជាជនកម្ពុជា ពេញចិត្តនឹងធ្វើការជាមួយគណបក្សផ្សេងទៀត ដោយគោរពនូវឯករាជ្យរបស់គណបក្សទាំងអស់ ហើយចាត់ទុកគណបក្សទាំងអស់ ជាដៃគូស្មើភាពជាមួយនឹងគណបក្សប្រជាជនកម្ពុជា”។
បើតាមសម្ដេចតេជោ ហ៊ុន សែន គណបក្សប្រជាជនកម្ពុជា មិនបានគិតថា គណបក្សរបស់ខ្លួនជាគណបក្សធំ ហើយគណបក្សនយោបាយដទៃ ដែលចូលរួមការបោះឆ្នោត ឬមិនបានចូលរួមការបោះឆ្នោត ជាគណបក្សតូចតាច ឬក៏ជាគណបក្ស ដែលមិនស័ក្ដិសមធ្វើជាដៃគូនោះទេ។
សម្ដេចបញ្ជាក់ថា គណបក្សប្រជាជនកម្ពុជា ផ្ដល់ការគោរពចំពោះគណបក្សនយោបាយទំាងអស់ ដែលបានចុះបញ្ជីស្របច្បាប់នៅក្រសួងមហាផ្ទៃ។
សម្តេចតេជោ ហ៊ុន សែន បានគូសបញ្ជាក់ទៀតថា “យើងពិតជាមានតម្រូវការនៅក្នុងការរួបរួមរវាងគណបក្សនយោបាយនៅកម្ពុជា ដើម្បីសម្រេចគោលដៅនៃការរក្សាសន្តិភាពធានាការអភិវឌ្ឍន៍រក្សាពេលវែង ចូលរួមជាមួយគ្នា ដើម្បីការពារនូវឯករាជ្យ អធិបតេយ្យជាតិ បូរណភាពទឹកដី នៃព្រះរាជាណាចក្រកម្ពុជា ការពារនូវរបបរាជានិយម អាស្រ័យធម្មនុញ្ញ ការពារនូវលទ្ធិប្រជាធិបតេយ្យ សិរីពហុបក្ស ការពារសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋ។ ... យើងក៏មានកាតព្វកិច្ចក្នុងការកម្ចាត់ចោលនូវនយោបាយជ្រុលនិយម ចេញឱ្យផុតពីព្រះរាជាណាចក្រកម្ពុជា ដើម្បីធានាទៅដល់សាមគ្គីភាព ឯកភាពជាតិ ក៏ដូចជារក្សានូវសន្តិភាព ដើម្បីធានានូវការអភិវឌ្ឍន៍ក្នុងរយៈពេលវែង”។
ប្រធានគណបក្សកាន់អំណាចរូពនេះ បានឱ្យដឹងដែរថា សម្តេចបានឱ្យមន្ត្រីបក្សប្រជាជនកម្ពុជា ត្រៀមកិច្ចព្រមព្រៀងកិច្ចសហប្រតិបត្តិការរវាងគណបក្សទាំងអស់ ដែលនឹងចងសម្ព័ន្ធភាពជាមួយបក្សប្រជាជន ហើយសម្តេចនឹងជួបជាមួយថ្នាក់ដឹកនាំបក្សសម្ព័ន្ធភាព នាពេលខាងមុខ ដើម្បីពិភាក្សាលើពង្រាងខ្លឹមសារ និងឈានទៅដល់ការចុះកិច្ចព្រមព្រៀង៕