ឧត្ដមក្រុមប្រឹក្សានៃអង្គចៅក្រម នៅព្រឹកថ្ងៃទី០៩ ខែតុលា ឆ្នាំ២០២៣នេះ បានបើកសម័យប្រជុំលើកទី៣៧ នៅព្រះបរមរាជវាំង ក្រោមព្រះរាជាធិបតីភាពដ៏ខ្ពង់ខ្ពស់ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងជាព្រះប្រធានឧត្តមក្រុមប្រឹក្សានៃអង្គចៅក្រម ដើម្បីពិនិត្យ សម្រេច និងពិគ្រោះយោបល់លើរបៀបវារៈចំនួន៧។
នៅក្នុងសម័យប្រជុំ ក្រោមព្រះរាជាធិបតីភាពរបស់ព្រះមហាក្សត្រនៃកម្ពុជានេះ បានសម្រេចតែងតាំងលោក ជីវ កេង ជាប្រធានតុលាការកំពូល ជំនួសលោកប្រធានចាស់ គឺលោក ឌិត មន្ទី។ ការស្នើតែងតាំងនេះ គឺបន្ទាប់ពីរដ្ឋមន្ត្រីក្រសួងយុត្តិធម៌ចេញលិខិតបង្គាប់តែងតាំងជាប្រធានស្ដីទីតុលាការកំពូលជាបណ្ដោះអាសន្ន ជំនួសលោក ឌិត មន្ទី ដែលបានប្រកាសលាលែង។ សូមបញ្ជាក់ថា មុនការតែងតាំងនេះ លោក ជីវ កេង មានតួនាទីជាអនុប្រធានតុលាការកំពូល ហើយលោកក៏ធ្លាប់ធ្វើជាប្រធានសាលាដំបូងរាជធានីភ្នំពេញផងដែរ។
បើតាមលទ្ធផលពីកិច្ចប្រជុំបានឱ្យដឹងថា សម័យប្រជុំឧត្ដមក្រុមប្រឹក្សានៃអង្គចៅក្រមបានពិនិត្យសម្រេច និងពិគ្រោះយោបល់ លើរបៀបវារៈចំនួន៧រួមមាន៖
ទី១, ពិនិត្យ សម្រេច តែងតាំងប្រធានតុលាការកំពូល និងការពិនិត្យ សម្រេច អំពីការផ្ទេរ តែងតាំងប្រធាន អនុប្រធាន និងចៅក្រម ក្នុងនោះអង្គប្រជុំបានសម្រេចយល់ព្រមស្នើតែងតាំងលោក ជីវ កេង ជាប្រធានតុលាការកំពូល នៃព្រះរាជាណាចក្រកម្ពុជា និងការផ្ទេរ តែងតាំងមុខតំណែង ប្រធាន អនុប្រធាន និងចៅក្រមចំនួន៤៧រូបផ្សេងទៀតនៅតុលាការកំពូល សាលាឧទ្ធរណ៍ និងសាលាដំបូងរាជធានី-ខេត្ត។
ទី២, ពិគ្រោះយោបល់ លើសំណុំផ្ទេរ និងតែងតាំង ព្រះរាជអាជ្ញា ព្រះរាជអាជ្ញារង មួយចំនួនតាមសំណើរបស់រដ្ឋមន្ត្រីក្រសួងយុត្តិធម៌។ អង្គប្រជុំបានផ្តល់យោបល់យល់ព្រម លើសំណើផ្ទេរ និងតែងតាំងមុខតំណែងអគ្គព្រះរាជអាជ្ញារង ព្រះរាជអាជ្ញា និងព្រះរាជអាជ្ញារង សរុបចំនួន២៥រូប នៅមហាអយ្យការអមតុលាការកំពូល មហាអយ្យការអមសាលាឧទ្ធរណ៍ និងនៅតាមអយ្យការអមសាលាដំបូងរាជធានី-ខេត្ត។
ទី៣, ពិនិត្យ និងសម្រេច លើសំណើសុំដាក់ ឲ្យនៅទំនេរគ្មានបៀវត្សរយៈពេល២ឆ្នាំ របស់ចៅក្រម០១រូប នៃសាលាឧទ្ធរណ៍ត្បូងឃ្មុំ៖ អង្គុប្រជុំបានសម្រេចអនុញ្ញាត ឲ្យលោកស្រី រស់ បូផាណា ចៅក្រមសាលាឧទ្ធរណ៍ត្បូងឃ្មុំ ស្ថិតនៅក្នុងភាពទំនេរគ្មានបៀវត្ស រយៈពេល២ (ពីរ) ឆ្នាំ ចាប់ពីថ្ងៃទី១ ខែកក្កដា ឆ្នាំ២០២៣ ដល់ថ្ងៃទី១ ខែកក្កដា ឆ្នាំ២០២៥។
ទី៤, ពិនិត្យ និងសម្រច អំពីសំណើសុំចូលបម្រើការងារនៅអង្គភាពដើមវិញ របស់លោក អ៊ុត សម្ផស្ស អតីតអនុប្រធានសាលាឧទ្ធរណ៍ព្រះសីហនុ។ ដោអង្គប្រជុំបានសម្រេចអនុញ្ញាតឲ្យលោក អ៊ុត សម្ផស្ស ចូលបំពេញមុខងារជាចៅក្រមនៅអង្គភាពដើមវិញ និងស្នើតែងតាំងមុខតំណែងជាអនុប្រធានសាលាឧទ្ធរណ៍ព្រះសីហនុ។
ទី៥, ពិនិត្យ និងសម្រេចលើសំណើសុំតាំងស៊ប់ក្នុងក្របខណ្ឌចៅក្រម ចំពោះចៅក្រមកម្មសិក្សាចំនួន៤០រូប។ អង្គប្រជុំបានសម្រេចយល់ព្រមលើសំណើសុំតាំងស៊ប់ចំពោះចៅក្រមកម្មសិក្សា៤០រូប ដោយស្ថិតក្នុងឋានន្តរស័ក្ដិជាអនុចៅក្រម ថ្នាក់លេខ៤ នៃក្របខណ្ឌចៅក្រម ចាប់ពីថ្ងៃទី២៤ ខែមិថុនា ឆ្នាំ២០២៣ នឹងចាត់ឲ្យទៅបំពេញការងារនៅសាលាដំបូងរាជធានី-ខេត្ត។
ទី៦, ពិគ្រោះយោបល់ លើសំណើសុំតាំងស៊ប់ក្នុងក្របខណ្ឌព្រះរាជអាជ្ញា ចំពោះព្រះរាជអាជ្ញារងកម្មសិក្សាចំនួន១៦រូប តាមសំណើរបស់រដ្ឋមន្ត្រីក្រសួងយុត្តិធម៌៖ អង្គប្រជុំបានផ្តល់យោបល់ យល់ព្រមលើសំណើ សុំតាំងស៊ប់ចំពោះព្រះរាជអាជ្ញារងកម្មសិក្សា ១៦រូប ដោយស្ថិតក្នុងឋានន្តរស័ក្តិជាអនុព្រះរាជអាជ្ញា ថ្នាក់លេខ៤ នៃក្របខណ្ឌព្រះរាជអាជ្ញា គិតចាប់ពីថ្ងៃទី២៤ ខែមិថុនា ឆ្នាំ២០២៣ និងចាត់ឲ្យទៅបំពេញការងារនៅអយ្យការអមសាលាដំបូងខេត្ត។
ទី៧, បញ្ហាផ្សេងៗ ចំពោះរបៀបវារៈនេះ ដោយយោងទៅលើការចាំបាច់ លោកឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានទូលស្នើសុំអង្គប្រជុំដើម្បីពិនិត្យ សម្រេច និងពិគ្រោះយោបល់ អំពីការស្នើតែងតាំងជាចៅក្រមកម្មសិក្សា និងជាព្រះរាជអាជ្ញារងកម្មសិក្សា ចំពោះសិស្សចៅក្រម និងសិស្សព្រះរាជអាជ្ញា ជំនាន់ទី១០ចំនួន ៥៥រូប នៃសាលាភូមិន្ទចៅក្រម និងព្រះរាជអាជ្ញា នៃបណ្ឌិត្យសភាភូមិន្ទយុត្តិធម៌កម្ពុជា ដោយក្នុងនោះមានសិស្សចៅក្រមចំនួន ៣៥រូប និងសិស្សព្រះរាជអាជ្ញាចំនួន ២០រូប ដែលបានបញ្ចប់ការសិក្សារបស់ខ្លួនប្រកបដោយជោគជ័យ។
ជាលទ្ធផលអង្គប្រជុំបានឯកភាពយល់ព្រម ស្នើតែងតាំងជាចៅក្រមកម្មសិក្សា និងជាព្រះរាជអាជ្ញារងកម្មសិក្សា និងចាត់ឲ្យទៅបំពេញកម្មសិក្សានៅតាមសាលាដំបូង និងអយ្យការអមសាលាដំបូងខេត្ត៕