1. ការដួលរលំនៃសភាអាមេរិក និងការដកតំណែងប្រធានសភា

យោងតាមសារព័ត៌មាន Reuters ចុះផ្សាយថ្ងៃទី០៣ ខែតុលាបានអោយដឹងថា គណបក្សសាធារណរដ្ឋមួយក្តាប់តូចនៅក្នុងសភាតំណាងរាស្រ្តសហរដ្ឋអាមេរិកកាលពីថ្ងៃអង្គារបានបណ្តេញប្រធានសភាមកពីគណបក្សសាធារណរដ្ឋលោក Kevin McCarthy ខណៈដែលជម្លោះបក្សបានធ្វើឱ្យសភាមានភាពវឹកវរបន្ថែមទៀតត្រឹមតែប៉ុន្មានថ្ងៃបន្ទាប់ពីពួកគេបានបញ្ចៀសការបិទរដ្ឋាភិបាល។ ការបោះឆ្នោតពី 216 ទល់នឹង 210 បានកត់សម្គាល់ជាលើកដំបូងក្នុងប្រវត្តិសាស្ត្រដែលសភាបានដកមេដឹកនាំរបស់ខ្លួនចេញដោយគណបក្សសាធារណរដ្ឋចំនួន8បានបោះឆ្នោតជាមួយនឹងគណបក្សប្រជាធិបតេយ្យចំនួន 208 ដើម្បីដកលោក McCarthy ។ សភាមើលទៅហាក់ដូចជាគ្មានអ្នកដឹកនាំយ៉ាងហោចណាស់មួយសប្តាហ៍ ខណៈដែលអ្នកសាធារណរដ្ឋជាច្រើនបាននិយាយថាពួកគេមានគម្រោងជួបនៅថ្ងៃទី10 ខែតុលា ដើម្បីពិភាក្សាអំពីអ្នកស្នងតំណែងលោក McCarthy ដែលអាចធ្វើឡើងជាមួយនឹងការបោះឆ្នោតជ្រើសរើសប្រធានថ្មីដែលគ្រោងនឹងធ្វើឡើងនៅថ្ងៃទី 11 ខែតុលា។ ការបះបោរកាលពីថ្ងៃអង្គារត្រូវបានដឹកនាំដោយអ្នកតំណាងលោក Matt Gaetz ដែលជាគណបក្សសាធារណរដ្ឋស្តាំនិយមមកពីរដ្ឋផ្លរីដា និងជាអ្នកប្រឆាំងលោក McCarthy ដែលទីបំផុតបានវាយប្រហារប្រធានសភាបន្ទាប់ពីលោកកាលពីថ្ងៃសៅរ៍បានពឹងផ្អែកលើការបោះឆ្នោតពីគណបក្សប្រជាធិបតេយ្យដើម្បីជួយអនុម័តច្បាប់បញ្ចៀសការបិទរដ្ឋាភិបាលមួយផ្នែក។

2. ចៅក្រមចេញបញ្ជាហាមឃាត់ Trump បញ្ចេញសំណុំរឿងជាសាធារណៈ

យោងតាមសារព័ត៌មាន The​​​ Washington Post ចុះផ្សាយថ្ងៃទី០៣ ខែតុលាបានអោយដឹងថា ចៅក្រមដែលមើលការខុសត្រូវលើការកាត់ក្តីរដ្ឋប្បវេណីលើការចោទប្រកាន់ពីការក្លែងបន្លំអាជីវកម្មដែលប្រព្រឹត្តដោយលោក Donald Trump និងក្រុមហ៊ុនរបស់លោកបានចេញដីកាក្នុងសំណុំរឿងនេះកាលពីថ្ងៃអង្គារដោយរារាំងអតីតប្រធានាធិបតីពីការនិយាយជាសាធារណៈអំពីបុគ្គលិកតុលាការរបស់លោក។ ការសម្រេចចិត្តរបស់ចៅក្រមលោក Arthur Engoron ដែលបានប្រកាសឡើងប្រហែលបានមួយថ្ងៃកន្លះនៅក្នុងសវនាការបានកើតឡើងភ្លាមៗបន្ទាប់ពីលោក Trump បានបង្ហោះនៅលើប្រព័ន្ធផ្សព្វផ្សាយសង្គមអំពីបុគ្គលិកចៅក្រមនោះ និងរួមទាំងរូបភាពរបស់គេផងដែរ។ ចៅក្រមបាននិយាយថា លោកបានបញ្ជាឱ្យលុបចោលការបង្ហោះនេះ ហើយវាហាក់ដូចជាត្រូវបានលុបចេញពីគេហទំព័រ Truth Social របស់លោក Trump ពិតមែននៅរសៀលថ្ងៃអង្គារ។ លោក Engoron ក៏​បាន​ព្រមាន​ដែរ​ថា​ការ​បំពាន​លើ​បញ្ជា​ហាមប្រាមបញ្ចេញសំណុំរឿងជាសាធារណៈនេះនឹង​នាំ​ឱ្យ​មាន​ការដាក់«ទណ្ឌកម្ម​ធ្ងន់ធ្ងរ»។

3. ចិនកំពុងជួបបញ្ហាចំណាកស្រុក តែអាមេរិកមិនបានទាញយកពីក្នុងនេះទេ

យោងតាមសារព័ត៌មាន The New York Times ចុះផ្សាយថ្ងៃទី០៣​​​ ខែតុលាបានអោយដឹងថា ក្នុងឆ្នាំ2016 ជាង 80​​​ ភាគរយនៃជនជាតិចិនដែលបានសិក្សានៅបរទេសបានត្រឡប់ទៅប្រទេសកំណើតវិញនេះបើយោងតាមក្រសួងអប់រំ កើនឡើងពីប្រហែលមួយភាគបួនកាលពីពីរទសវត្សរ៍មុន។ ទំនោរ​បាន​ប្រែ​ប្រួល។ ក្នុងឆ្នាំ2022 ទោះបីជាមានការរឹតបន្តឹងលើលិខិតឆ្លងដែន និងការធ្វើដំណើរក៏ដោយ ក៏ជនជាតិចិនជាង 310,000 នាក់ បានធ្វើអន្តោប្រវេសន៍ នេះបើយោងតាមទិន្នន័យរបស់អង្គការសហប្រជាជាតិ។  ម្យ៉ាងវិញទៀតផងដែរ អ្នកដែលបានសិក្សាខ្ពង់ខ្ពស់របស់ប្រទេសចិន រួមទាំងអ្នកជំនាញខាងបច្ចេកវិទ្យាក៏កំពុងតែធ្វើចំណាកស្រុកផងដែរ ប៉ុន្តែមនុស្សជាច្រើនមិនបានទៅអាមេរិកទេ។  អ្នកជំនាញផ្នែកបច្ចេកវិទ្យាមួយចំនួនបានជ្រើសរើសប្រទេសកាណាដា និងបណ្តាប្រទេសអ៊ឺរ៉ុបច្រើនជាងសហរដ្ឋអាមេរិកដោយសារតែផលប្រយោជន៍ពីសង្គមដែលពួកគេទទួលបាន តុល្យភាពជីវិតការងារ និងច្បាប់គ្រប់គ្រងកាំភ្លើង។