សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ច្បាស់ៗពីករណីយកពន្ធដី និងអចលនទ្រព្យនៅប្រទេសកម្ពុជា ក្រោយពីមានការលើកឡើងមិនច្បាស់លាស់ នាំឲ្យមានការរិៈគន់ ក្រោយរដ្ឋាភិបាលថ្មីបង្កើតឡើង។
មានប្រកាសន៍នៅក្នុងឱកាសចុះជួបកម្មករជិត២ម៉ឺននាក់ នៅរាជធានីភ្នំពេញ នាព្រឹកថ្ងៃទី០៣ ខែតុលា ឆ្នាំ២០២៣នេះ សម្តេចធិបតី ហ៊ុន ម៉ាណែត បានលើកឡើងថា រាជរដ្ឋាភិបាលគណបក្សប្រជាជនក្នុងអាណត្តិថ្មីនេះ មិនមានការបង្កើតពន្ធថ្មីនោះទេ ហើយពន្ធដែលមានស្រាប់មិនមានការតម្លើងអត្រាពន្ធទេ ហើយនឹងដាក់ចេញនូវគោលការណ៍មួយចំនួនពាក់ព័ន្ធទៅនឹងពន្ធ នៅក្នុងកិច្ចប្រជុំជាមួយវិស័យឯកជន នាខែវិច្ឆិកា ខាងមុខ។
បើតាមសម្តេចធិបតី ហ៊ុន ម៉ាណែត ការប្តេជ្ញារបស់គណបក្សប្រជាជន ទី១, បន្តមិនយកពន្ធទៅលើដីស្រែកសិកម្ម ដីស្រែជាលក្ខណៈគ្រួសាររបស់ប្រជាពលរដ្ឋ ទី២, មិនយកពន្ធលើសម្ភារៈកសិកម្ម ទី៣, មិនយកពន្ធទៅលើកសិផលកសិកម្ម ទី៤, មិនយកពន្ធលើអចលនទ្រព្យដែលមានតម្លៃថោកជាង២៥០០០ដុល្លា ទី៥, រដ្ឋាភិបាលលើកទឹកចិត្តចំពោះវិស័យអចលនទ្រព្យ ដោយមិនយកពន្ធប្រថាប់ត្រា ដែលមានតម្លៃក្រោម៧ម៉ឺនដុល្លារ។ ក្នុងនោះពន្ធប្រថាប់ត្រាផ្ទេរពីឳពុកម្តាយទៅកូនជាដើម មិនអស់លុយទេ។ ទី៦, ម៉ូតូ កង់បី បន្តមិនកពន្ធផ្លូវតទៅទៀត។ ទី៧, ការលក់ដូរតាមកញ្ច្រែង ល្អី កញ្ជើ តូចតាច បន្តមិនយកភាស៊ីដដែល។ ជារួមពន្ធដែលមិនបានយកកន្លងមក គឺបន្តមិនយកដដែល។
ជាមួយគ្នានោះ សម្តេចធិបតី ហ៊ុន ម៉ាណែត បានប្រាប់កុំឲ្យប្រជាពលរដ្ឋ កុំជឿតាមការឃោសនារបស់បុគ្គលមួយចំនួន ដែលខំលើកយកបញ្ហាពន្ធ ដែលអនុវត្តតាំងពីឆ្នាំ១៩៨២ មកផ្សាយដើម្បីបំភ័យ។ ក្រៅពីមិនបានបង្កើតពន្ធថ្មី បច្ចុប្បន្នរាជរដ្ឋាភិបាលបានអនុគ្រោះពន្ធជាច្រើន។ លោកថា គ្រប់ប្រទេសទាំងអស់នៅលើពិភពលោក គ្មានប្រទេសណាមិនយកពន្ធទេ គ្រាន់តែតិច និងច្រើនប៉ុណ្ណោះ។
លោកអះអាងថា ការប្រមូលពន្ធ គឺជាមធ្យោបាយ ដើម្បីរចែករំលែកពីអ្នកដែលមានលទ្ធភាពទៅអ្នកដែលគ្មានលទ្ធភាព។ ជាក់ស្តែងរាជរដ្ឋាភិបាលបានប្រមូលពន្ធពីអ្នកដែលមានលទ្ធភាព ទៅជួយប្រជាពលរដ្ឋក្រីក្រយ៉ាងច្រើន ក្នុងនោះរាជរដ្ឋាភិបាលបានចំណាយថវិកាប្រមាណ១២០០លានដុល្លាជួយដល់ប្រជាពលរដ្ឋតាមរយៈបណ្ណក្រីក្រ។
គួររំលឹកថា ថ្មីៗនេះក្រោយពីរាជរដ្ឋាបាលថ្មីបានបង្កើតឡើង បានលេចចេញនូវព័ត៌មានមិនច្បាស់លាស់នៃការយកពន្ធផ្សេងៗ នាំឲ្យមានការយកច្រឡំ៕